វីរបុរសបាល់ទាត់របស់ក្រុមជម្រើសជាតិបារាំងលោក Zinedine Zidaneបានអះអាងថា លោកមិនធ្លាប់ដែលនឹកភ្នក ឬគិតថាខ្លួនឯងអាចក្លាយជាគ្រូបង្វឹកបាល់ទាត់បែបហ្នឹងទាល់តែសោះ។
សូមបញ្ជាក់ថា លោក Zinedine Zidaneបានចំណាយពេលកាលពីរដូវកាលមុនជាគ្រូបង្វឹកជំនួយការរបស់លោក Carlo Ancelotti នៅក្នុងក្លិប Real Madridហើយចាប់តាំងពីពេលនោះមក គាត់ក៏ទទួលយកការងារជាគ្រូបង្វឹកនៅក្រុម Bក្នុងរដូវកាលនេះ។ យ៉ាងណាមិញ មុនពេលទទួលយកតំណែងគ្រូបង្វឹកនេះ គាត់ធ្លាប់ជានាយកគ្រប់គ្រងផ្នែកកីឡានៅក្នុងទឹកដី Santiago Bernabeu ប៉ុន្តែក្រោយមកគាត់ក៏បានលាលែងវិញ អំឡុងរជ្ជកាលរបស់លោក Jose Mourinhoព្រោះយល់ថា ការងារមួយនេះ មិនស័ក្តិសមនឹងលោក។
ស្របពេលដែលមានក្រុមអ្នកគាំទ្រ ចង់អតីតខ្សែប្រយុទ្ធវ័យ៤២ឆ្នាំម្នាក់នេះថ្ងៃណាមួយទទួលយកការងារជាគ្រូបង្វឹករបស់ក្រុម Real Madridតែម្តងនោះ លោក Zidaneបាននិយាយថា បច្ចុប្បន្នលោកកំពុងគិតគូរផ្លូវដែលគាត់ត្រូវដើរនៅពេលអនាគត។
លោកបាននិយាយប្រាប់កាសែត L'Equipe ថា មានមនុស្សច្រើនណាស់ប្រាថ្នាចង់ក្លាយជាគ្រូបង្វឹកបាល់ទាត់ ប៉ុន្តែភាគតិចណាស់ដែលអាចសម្រេចក្តីប្រាថ្នាមួយនេះ។ ដូច្នេះហើយលោកពិតជាមានការស្ញប់ស្ញែងណាស់ដែលអាចធ្វើការងារមួយនេះបាន។ លោកបានបន្តទៀតថា កាលពីមុន លោកមិនដែលមានបំណងចង់ធ្វើជាគ្រូបង្វឹកនោះទេ ប៉ុន្តែពេលនេះ ទើបលោកយល់ច្បាស់ថាការងារមួយនេះ ពិតជាល្អខ្លាំងណាស់សម្រាប់មនុស្សម្នាក់ដែលធ្លាប់មានអាជីពជាតារាបាល់ទាត់ ដូចជារូបលោក៕
Post a Comment