តារាបាល់ទាត់របស់ក្លិបយក្សអេស្ប៉ាញ Real Madridកីឡាករ Karim Benzemaបានប្រកាសឲ្យដឹងថា លោកមិនមែនជាតារាសម្តែងអ្វីនោះទេ ហើយលោកមានជំនឿយ៉ាង មុតមាំថា ឥរិយាបថរបស់លោកនៅក្នុងទីលានប្រកួតគឺជាឫសគល់តែមួយគត់ ដែលនាំឲ្យគាត់ ទទួលបានប្រជាប្រិយភាពខ្លាំងបែបហ្នឹងនៅក្នុងចំណោម សាធារណជន។
សូមបញ្ជាក់ថា តារាស៊ូពើស្តាដូចជាអតីតកីឡាករ David Beckham និងកីឡាករ Cristiano Ronaldo ត្រូវបានគេចោទប្រកាន់ពីមុនថា ជាមនុស្សដែលខ្វាយខ្វល់ខ្លាំងពីរូបភាពរបស់ខ្លួនឯង ខណៈដែលពួកគេបានអភិវឌ្ឍមកជាកីឡាករដែលរកប្រាក់ចំណូលកាក់កបបំផុតនៅក្នុងចំណោមវិស័យកីឡាដទៃទៀត ក្នុងរយៈពេល២ទសវត្សរ៍ចុងក្រោយនេះ។
ទោះបីជាយ៉ាងណាក៏ដោយ កីឡាករ Benzemaនិងជាខ្សែប្រយុទ្ធដ៏រឹងមាំម្នាក់នៅក្នុងក្រុមជម្រើសជាតិបារាំង បានឲ្យដឹងថា បញ្ហាផ្ទាល់ខ្លួននៅលើទីលានប្រកួតបាល់ទាត់មិនបានធ្វើឲ្យគាត់ចាប់អារម្មណ៍នោះទេ ប៉ុន្តែលោកគ្រាន់តែដឹងម្យ៉ាងគត់ថា ខ្លួនឯងកំពុងធ្វើរឿងត្រឹមត្រូវ និងអស្ចារ្យបំផុត ទើបអាចទទួលបានប្រជាប្រិយភាពបែបនេះ។
កីឡាករវ័យ២៧ឆ្នាំម្នាក់នេះ បាននិយាយប្រាប់ទស្សនាវដ្ដី Surface Magazine ថា លោកមិនមែនជាតារាសម្តែងហូលីវូដអ្វីនោះទេ ហើយលោកក៏មិនចូលចិត្តសម្លឹងដាក់កាមេរ៉ានោះដែរ។ មានកីឡាករខ្លះ គេធ្វើបែបនេះ ប៉ុន្តែសម្រាប់រូបលោកផ្ទាល់មិនចូលចិត្តឡើយមារយាទដែលគេគិតថា ប្រហែលជាចង់ល្បីខ្លាំងណាស់ហើយ បានជាខំរត់ដាក់កាមេរ៉ាខ្លាំងបែបនេះ៕
Post a Comment