ក្លិបអធិរាជស Real Madrid កំពុងត្រៀមខ្លួនផ្លាស់ប្ដូរឈ្មោះកីឡដ្ឋាន Santiago Bernabeu បច្ចុប្បន្ន ដោយមានបន្ថែមឈ្មោះរបស់ក្រុមហ៊ុនដៃគូឧបត្ថម្ភ International Petroleum Investment Company (IPIC) របស់ United Arab Emirates បន្ថែមទៀត។
ឈ្មោះកីឡដ្ឋានថ្មី ដែលភាគីទាំង២កំពុងពិចារណានោះគឺមាន២ជម្រើស ពោលគឺអាចជា Abu Dhabi Santiago Bernabeu ឬ Cepsa Santiago Bernabeu។ ក្លិបយក្សអេស្ប៉ាញ និងក្រុមហ៊ុនរបស់អារ៉ាប់រួម បានចុះកិច្ចសន្យាចាប់ដៃគូនឹងគ្នា កាលពីខែតុលាឆ្នាំ២០១៤ ក្នុងរយៈពេល២០ឆ្នាំ ដែលមានតម្លៃប្រមាណ ៥០០លានអឺរ៉ូ (ជាង៥៦៤លានដុល្លារ)។ Bernabeu គឺជាឈ្មោះកីឡដ្ឋានរបស់ក្រុម Real តាំងពីឆ្នាំ១៩៤៧មក។ ការសម្រេចផ្លូវការ នឹងត្រូវរង់ចាំប្រធានក្លិបលោក Florentino Perez ជាអ្នកសម្រេចចិត្ត។ លោកPerez ចង់ប្រើប្រាស់លុយដែលបានមកពីដៃគូឧបត្ថម្ភទាំងអស់នោះ ទៅអភិវឌ្ឍន៍កីឡដ្ឋានបន្ថែមទៀត ដោយលោកចង់ពង្រីកឲ្យធំជាងមុន ដែលអាចដាក់អ្នកទស្សនាបាន៩ម៉ឺននាក់ ខណៈដែលបច្ចុប្បន្នកីឡដ្ឋានមួយនេះ អាចផ្ទុកអ្នកទស្សនាបានចំនួន៨ម៉ឺន១ពាន់នាក់។
អ្នកជំនួញជនជាតិអេស្ប៉ាញ វ័យ៦៧ឆ្នាំរូបនេះ បាននិយាយថា៖ «ខ្ញុំខំស្ទើរស្លាប់ស្ទើររស់នេះ គឺព្រោះតែចង់អភិវឌ្ឍន៍កីឡដ្ឋានមួយនេះ ឲ្យទៅជាកីឡដ្ឋានល្អបំផុតលើពិភពលោក។ ហើយដើម្បីធ្វើរឿងទាំងអស់នេះទៅបាន យើងត្រូវតែយល់ព្រមទទួលយកឈ្មោះក្រុមហ៊ុនដៃគូឧបត្ថម្ភ មកធ្វើជាឈ្មោះកីឡដ្ឋានយើងទៀត ព្រោះគេអាចនឹងផ្ដល់លុយដល់យើងពី៤០០លានអឺរ៉ូ ទៅ៥០០លានអឺរ៉ូ»។ 
លោកបានបន្តថា៖ «យើងបានពិភាក្សាគ្នាជាមួយនឹងក្រុមហ៊ុនចំនួន១០ ដើម្បីស្វែងរកក្រុមហ៊ុនណាមួយ ដែលចង់ដាក់ឈ្មោះរបស់ពួកគេនៅពីមុខកីឡដ្ឋាន Bernabeu ។ ខ្ញុំនឹងធ្វើការផ្លាស់ប្ដូរកីឡាដ្ឋាននេះ ប៉ុន្តែជំហានដំបូងខ្ញុំត្រូវតែយកឈ្នះផលលំបាកទាំងអស់នេះសិន»៕
Post a Comment