Diego Costa ត្រូវបានសហព័ន្ធកីឡាបាល់ទាត់អង់គ្លេស (FA) រកឃើញថាពិតជាបង្កកំហុសចេតនាទៅលើខ្សែការពារ Emre Can របស់ Liverpool មែន ហើយក៏ត្រូវទទួលពិន័យ៣ប្រកួតដែរ។
បន្ទាប់ពីមានការតវ៉ាច្រើនពីសំណាក់គ្រូបង្វឹក Liverpool ក៏ដូចជាអ្នកគាំទ្រទូទៅ ខាង FA បានហៅអាជ្ញាកណ្ដាល Michael Oliver មកសាកសួរនិងបានចាក់វីដេអូឃ្លីបក្នុងការប្រកួតនោះឡើងវិញ ក៏រកឃើញថា Costa ពិតជាជាន់ជើង Can ដោយចេតនាមែន មិនមែនដូចពាក្យលោក Jose Mourinho បាននិយាយនោះទេ។ ខណៈដែលការជាន់ជើងនេះក៏មិនមែនតែម្ដងនោះដែរក្នុងប្រកួតកាលពីម្សិលមិញនោះ ពោលគឺ Costa ជាន់ជើង Can នៅនាទីទី១២ ហើយក៏បានជាន់ជើង Martin Skrtel ទៀតដែរនៅនាទីទី៥៥។ រឿង២នេះហើយទើបធ្វើឱ្យ FA សម្រេចចិត្តដាក់ពិន័យអតីតខ្សែប្រយុទ្ធ Atletico Madrid រូបនេះដល់ទៅ៣ប្រកួត។
អវត្តមាន៣ប្រកួតរបស់ខ្សែប្រយុទ្ធជម្រើសជាតិអេស្ប៉ាញរូបនេះ មានន័យថារូបគេមិនបានជួយក្រុម Chelsea ពេលប៉ះ Manchester City នៅថ្ងៃសៅរ៍នេះនោះទេ។ Diego Costa បច្ចុប្បន្ននេះជាខ្សែប្រយុទ្ធមុតស្រួចជាងគេនៅ Premier League ព្រោះអាចរកគ្រាប់បាល់បាន១៧គ្រាប់មកហើយ លើសខ្សែប្រយុទ្ធ Aguero របស់ Manchester City ដែលទើបតែរកបាន១៤គ្រាប់ ៕
Post a Comment