ឡៅ ចន្រ្ទា, ឡុង សុវណ្ណឌឿន ប៉ះជើងខ្លាំងថៃ ល្បីសង្វៀន SEA-TV យប់ថ្ងៃអាទិត្យ

កីឡាករ ឡៅ ចន្រ្ទា ក្លឹបកងពលតូចឆ័ត្រយោង ៩១១ ត្រូវប៉ះអ្នកប្រដាល់ជើងខ្លាំងថៃ Dy Sivlek ស្របពេល ឡុង សុវណ្ណឌឿន ក្លឹបសាលវ័ន្តកីឡាជួបអ្នក ប្រដាល់ថៃ Lek Ying ក្នុងកម្មវិធីប្រដាល់កំពូលជើងឯក Black Cat នៅ លើសង្វៀន SEA-TV ដែលចាប់ផ្តើមនាម៉ោង៨យប់ថ្ងៃអាទិត្យ ទី១៥ ខែកុម្ភៈ ឆ្នាំ២០១៥ចុងសប្តាហ៍នេះ ។

ជើងខ្លាំងវ័យក្មេង ចន្រ្ទា ដែលជាប្អូនប្រុសបង្កើតរបស់ ឡៅ ស៊ីណាត ត្រូវធ្វើការប្រកួតជាមួយកីឡាករថៃ Dy Sivlek ក្នុងទម្ងន់៦០គីឡូក្រាម ។ ឡៅ ចន្ទ្រា ព្រោះ ជួប ថៃ៥រូបកន្លងមកនេះគេវាយមិនដែលចាញ់នោះឡើយ ។ ការប្រកួតចុង ក្រោយនេះ ចន្ទ្រា ដែលជាកីឡាករជើងខ្លាំងវ័យក្មេងរបស់កម្ពុជាមានក្បាច់សម្លាប់ដ៏សម្បូរបែប ជាពិសេសទៀតនោះសម្រាប់ការជួបថៃ ចន្ទ្រា ស្នៀតជាច្រើនក្នុងការផ្តួលថៃ ។

ចន្ទ្រា បាននិយាយថា “ខ្ញុំមិនទាន់ហ៊ានអះអាងបែបណានោះទេ ព្រោះខ្ញុំមិនដឹងថា ថៃម្នាក់នោះមានកម្រិតនៃការប្រកួត ដល់កម្រិតណានោះឡើយ ។ ប៉ុន្តែចំពោះរូបខ្ញុំ គឺបានប្រឹងប្រែងហ្វឹកហាត់មិនដែលប្រហែសឡើយ ព្រោះខ្ញុំពិតជាមិនចង់ឲ្យមានពាក្យថាចាញ់ ក្នុងការប្រកួតជាមួយកីឡាករបរទេសនោះឡើយ គឺខ្ញុំចង់ឈ្នះដើម្បីកិត្តិយសខ្ញុំក្លឹបរបស់ខ្ញុំ ពិសេសដើម្បីកិត្តិយសក្បាច់គុនបុរាណខ្មែរយើង” ។

ឡុង សុវណ្ណឌឿន ក្លឹបសាលវ័ន្តកីឡា ប្រកួតជាមួយអ្នកប្រដាល់ថៃ Lek Ying ក្នុងទម្ងន់៦៩គីឡូក្រាម ។ តាមអ្នកគ្រប់ គ្រងកម្មវិធីកីឡាប្រចាំសង្វៀន ទូរទស្សន៍អាស៊ីអាគ្នេយ៍ (SEA-TV) បានឲ្យដឹងថា Lek Ying នេះខ្លាំងគួរសមដែរ ហើយ ថៃម្នាក់នេះរឹងមាំវាយមិនស្រុតកម្លាំងនោះឡើយ ហើយថែមទាំងខ្ពស់ជាង សុវណ្ណឌឿន បន្តិចផង ។ សម្រាប់អ្នកស្គាល់ប្រវត្តិកីឡាករតាមរយៈប្រកួតតាមប៉ុស្តិ៍ថៃនោះ បើកីឡាកររូបនេះមកមែន គឺ ឡុង សុវណ្ណឌឿន ពិតជាលំបាកយកឈ្នះណាស់ ។

រីឯអ្នកប្រដាល់ ពុទ្ធ ឆាយារិទ្ធី ក្លឹបពុទ្ធសេរីវង្សកីឡាប្រកួតជាមួយអ្នកប្រដាល់ ពេជ្រ ម៉ាប់ ក្លឹបឡុងសាលវ័ន្តកីឡា, អ្នកប្រដាល់គង់ ហូវ ក្លឹបមជ្ឈមណ្ឌល ខ.ភ.ម ប៉ះអ្នកប្រដាល់ ចាន់ គង់រាជ ក្លឹបតាព្រហ្មមានជ័យបង្រ្កាបគ្រឿងញៀន និង អ្នកប្រដាល់ សំណាង ឌីណា ក្លឹបដួងសែនសុខគុនខ្មែរ ជួបជាមួយអ្នកប្រដាល់ គឿន សុខហេង ក្លឹបគីសែមានរិទ្ធអាជ្ញាធរជាតិអាវុធគីមី ក.ព.ជ ៕