កីទ្បាករខ្សែបម្រើប្រយុទ្ធ Eden Hazard បានព្រមព្រៀង បន្តកិច្ចសន្យាថ្មី ជាមួយនឹងក្រុមតោខៀវ Chelsea រយៈពេល៥ឆ្នាំកន្លះ ទៅមុខទៀត ក្នុងការបន្តលេង នៅកីទ្បដ្ឋាន Stamford Bridge ។
តារាឆ្នើមជនជាតិប៊ែលហ្ស៊ិក វ័យ២៤ឆ្នាំរូបនេះ បានមកចូលរួមលេងឲ្យ Chelsea ឆ្នាំ២០១២ ក្នុងតម្លៃខ្លួន ៣២លានផោន ពីក្លឹប Lille របស់បារំាង ដោយបានចូលលេង ៣៦ប្រកួត នឹងស៊ុតបញ្ចូលទីបាន ១៣គ្រាប់នារដូវកាលនេះ ។ ក្នុងនាមជាកីទ្បាករឆ្នើមមួយរូប ដែលបានជួយឲ្យ ក្រុមជម្រើសជាតិ ប៊ែលហ្ស៊ិក ទ្បើងមកដល់វគ្គ ៨ក្រុមចុងក្រោយនៃ World Cup 2014 នៅប្រទេសប្រេស៊ីល កាលពីឆ្នាំទៅ ។
Hazard បានថ្លែងប្រាប់គេហទំព័រ BBC ថា "តំាងពីខ្ញុំបានផ្លាស់មកលេង នៅអង់គ្លេស ឆ្នាំ២០១២មក ខ្ញុំតែងតែមាន អារម្មណ៍ល្អជានិច្ច ដោយសារតែក្លឹប បានផ្តល់អ្វីៗគ្រប់យ៉ាងមកខ្ញុំ ។ ខ្ញុំតែងតែព្យាយាមលេងឲ្យ អស់ពីសមត្ថភាព បើទោះបីជាពេលខ្លះសិ្ថត នៅក្រោមសម្ពាធក៏ដោយ ដើម្បីបញ្ជាក់ឲ្យ អ្នកគំាទ្រដឹងថា ខ្ញុំពិតជាកីទ្បាករ ដ៏ស៊ូទ្រំានឹងការងារមែន" ។
គួរបញ្ជាក់ថា ការផ្លាស់មកលេងឲ្យ Chelsea ជិត៣ឆ្នាំមកនេះ Hazard បានជួយឲ្យក្រុមតោឈ្នះពាន UEFA Champions League បានម្តង ឆ្នាំ២០១២ នឹងពានលំដាប់ទី២ប្រចាំទ្វីបអឺរ៉ុប UEFA Europa League បានម្តងដែរឆ្នាំ២០១៣ ហើយក៏កំពុងតែជួយឲ្យក្រុមមួយនេះ ឈរនៅកំពូលតារាង Premier League ដោយនំាមុខ ៧ពិន្ទុដាច់បណ្តោះអាសន្នផងដែរ ៕
Post a Comment