លោក Florentino Perez ម្ចាស់ក្លិបយក្ស Real Madrid បាននិយាយថារូបលោកនឹងលក់កីឡាករ Cristiano Ronaldo ចេញ ប្រសិនបើមានក្លិបណាមកឱ្យតម្លៃខ្លួនសមល្មមនឹងអាចលក់បាន។
កាសែតអេស្ប៉ាញ El Confidencial បានស្រង់សម្ដីមហាសេដ្ឋី Florentino Perez ម្ចាស់ក្លិប Real Madrid ថា ប្រសិនបើមានក្លិបណាមកឱ្យតម្លៃខ្លួនខ្សែប្រយុទ្ធ Ronaldo ច្រើនសមនឹងអាចលក់បាននោះ រូបលោកនឹងអនុញ្ញាតឱ្យកីឡាករវ័យ៣០ឆ្នាំរូបនេះដើរចេញពី Santiago Bernabeu ។ ខណៈដែលកាលពីមុន បុរសវ័យ៦៧ឆ្នាំរូបនេះធ្លាប់បាននិយាយថានឹងមិនលក់ម្ចាស់ពានរង្វាន់ Ballon d’Or ៣សម័យខាងលើក៏ដោយ។
រឿងរ៉ាវដែលធ្វើម្ចាស់ក្លិបមិនសប្បាយចិត្តគឺបណ្ដាលមកពីថ្ងៃដែល Real Madrid ចាញ់ Atletico Madrid ៤-០ នោះ អតីតខ្សែប្រយុទ្ធរបស់ Man Utd រូបនេះបែរជាទៅធ្វើពិធីជប់លៀង ច្រៀង Karaoke និងថែមទាំងបានហៅមិត្តរួមក្រុម James Rodriguez និង Sami Khedira ទៅទៀតផង។
ដំណឹងខាងលើនេះ គឺជាផលវិជ្ជមានដល់ក្លិប Manchester United ដែលតែងតែចង់បានខ្សែប្រយុទ្ធកូនមួយខាងលើនេះទៅវិញ ស្របពេលខែមករាកន្លងទៅក៏មានព័ត៌មានជាច្រើនចុះផ្សាយថាបិសាចក្រហមត្រៀមលុយធំទិញកីឡាករល្អចូលដែរនោះ។
ចាំមើលទាំងអស់គ្នាថាអាចទៅរួចឬអត់ថា Ronaldo នឹងចាកចេញពី Real?
Post a Comment