Samir Nasri ខ្សែបម្រើក្រុម Manchester City បាននិយាយវាយប្រហារទៅលើក្រុម Chelsea យ៉ាងខ្លាំង ខណៈដែលកីឡាករវ័យ២៧ឆ្នាំរូបនេះ បានលើកឡើងថាក្រុមរបស់លោក Jose Mourinho គ្មានអ្វីអស្ចារ្យនោះទេ គង់តែមានការភ្លាត់ស្នៀត ហើយមេឃខៀវនឹងលើកពាន Premier League ដូចរដូវកាលមុន។
កីឡាករ Playmaker របស់បារាំងរូបនេះ បាននិយាយថា៖ «ខ្ញុំជាអ្នកគាំទ្ររបស់លោក Mourinho ម្នាក់ ប៉ុន្តែខ្ញុំមិនស្ងើចសរសើរក្រុមរបស់គាត់នោះទេ។ យើងបានជួប Chelsea ពីរដងនៅរដូវកាលនេះ និង១ដងយើងមានគ្នាតែ១០នាក់ ហើយយើងល្អជាងពួកគេ»។
អតីតកីឡាករ Arsenal រូបនេះបានបន្តថា៖ «ពេលខ្ញុំបានមើលការប្រកួតរបស់គេ ខ្ញុំគិតថាពួកគេគ្មានអ្វីអស្ចារ្យនោះទេ។ ពួកគេគ្រាន់តែខ្លាំងបន្តិច ព្រោះមានខ្សែប្រយុទ្ធល្អ។ សម្រាប់ខ្ញុំ ពួកគេគ្មានអ្វីពិសេសសូម្បីតែបន្តិច ហើយខ្ញុំគិតថាពួកគេប្រាកដជាមានកំហុសភ្លាត់ស្នៀត។ ដូច្នេះយើងត្រូវតែលេងឲ្យឈ្នះគ្រប់ការប្រកួតរបស់យើង នោះយើងនឹងដឹងថា នឹងមានអ្វីកើតឡើង»។
តោខៀវ Chelsea កំពុងឈរលេខ១ នាំមុខ៧ពិន្ទុលើក្រុមមេឃខៀវ Man City បន្ទាប់ពីយកឈ្នះ Everton ១គ្រាប់ចុងម៉ោងដោយ Willian កាលពីយប់ថ្ងៃពុធ ខណៈដែលក្រុមរបស់លោក Manuel Pellegrini ឈ្នះក្រុម Stoke ៤-១ ដែរ។
សម្រាប់ប្រិយមិត្តវិញ យល់ស្របការលើកឡើងរបស់ Nasri ដែរឬទេ?
Post a Comment