អ្នកចាត់ការរបស់ក្លិប Man City លោក Manuel Pellegrini បានធ្វើការច្រានចោលទាំងស្រុងចំពោះកង្វល់នៃបញ្ហារបួសរបស់កីឡាករ Sergio Aguero ក្រោយពីគាត់ត្រូវបានគេដកចេញ អំឡុងជ័យជម្នះ៤-១លើក្រុម Stoke City។
ក្រុមឡើងការពារជើងឯកបាល់ទាត់អង់គ្លេស Barclays Premier League មួយនេះ បានវិលត្រឡប់មករកជ័យ ជម្នះរបស់ពួកគេវិញ ក្រោយពីទាត់ស្មើជាមួយ ក្រុម ភ្ញៀវ Hull City កាលពីថ្ងៃសៅរ៍ចុងសប្តាហ៍មុន ប៉ុន្តែពេលនេះ មាននូវការព្រួយបារម្ភជាខ្លាំងថា កីឡាករ Agueroអាចនឹងមិនអាចលេងបានសម្រាប់ការប្រកួតសំខាន់ៗរបស់ក្រុម Man City ពិសេសនៅពេលពួកគេជួបជាមួយក្រុម Newcastle, Barcelonaនិងក្រុម Liverpool។
នៅពេលសួរនាំពីស្ថានភាពរបួសរបស់កីឡាករ Aguero លោក Pellegrini បានអះអាងថា ប្រសិនបើគាត់លេងកាន់តែច្រើននោះ សមត្ថភាពរបស់គាត់នឹងទៅ តាមនោះដែរ។ គាត់ទើបតែ បានវិលត្រឡប់មករកការប្រកួតវិញទេ ក្រោយបាត់មុខអស់រយៈពេលជាង១ខែ ដោយសាររបួស ហើយកីឡាករគ្រប់រូប ត្រូវការពេលវេលា ដើម្បីអាចឲ្យពួកគេវិលត្រឡប់មកលេងដូចធម្មតាវិញ។
លោកបញ្ជាក់ទៀតថា កីឡាករ Aguero នឹងមានចំណែកដ៏សំខាន់មួយសម្រាប់ការប្រកួតជាមួយក្រុម Newcastle នៅថ្ងៃទី២១ ខែកុម្ភៈខាងមុខនេះ ហើយយើងទាំងអស់គ្នាមានជំនឿចិត្តយ៉ាងមុតមាំលើសមត្ថភាពលេងដ៏អស្ចារ្យរបស់ខ្សែប្រយុទ្ធសញ្ជាតិអាហ្សង់ទីនម្នាក់នេះ៕
Post a Comment