អតីតប្រធានក្រុមជម្រើសជាតិអង់គ្លេសលោក David Beckham បានគាំទ្រដល់ការប៉ុនប៉ងលោក Luis Figo ក្នុងការក្លាយខ្លួនជាប្រធានសហព័ន្ធបាល់ទាត់FIFA។
លោក Figo អាយុ៤២ឆ្នាំដែលជាអតីតកីឡាករស្ថិតនៅក្នុងក្រុមជម្រើសជាតិព័រទុយហ្គាល់ និងកីឡាករបាល់ទាត់ឆ្នើមប្រចាំឆ្នាំនោះ បានប្រកាសឲ្យដឹងកាលពីខែមុនថា លោក
នឹងឈរឈ្មោះឡើងដណ្តើមតំណែងពីលោក Sepp Blatter ដែលជាប្រធាន FIFA បច្ចុប្បន្ន។
នៅក្នុងយុទ្ធនាការប្រកួតប្រជែងជាមួយលោក Sepp Blatter នៅការបោះឆ្នោតដែលគ្រោងនឹងរៀបចំឡើងនៅខែឧសភាខាងមុខនេះ លោក Figo នៅមានគូប្រកួតឈានមុខ២រូបផ្សេងទៀត គឺព្រះអង្គម្ចាស់ Ali Bin Al Hussein មកពីប្រទេសហ្សកដានី និងប្រធានសមាគមបាល់ទាត់ហុល្លង់លោក Michael van Praag។
ទោះបីជាយ៉ាងណាក៏ដោយ លោក Beckham ដែលជាអតីតកីឡាកររបស់ក្លិប Man Utd និងក្លិប Real Madrid ដែរនោះ ពេញចិត្តខ្លាំងណាស់ នៅពេលដែលទទួលបានដំណឹងថា អតីតមិត្តរួមក្រុមម្នាក់ ឈរឈ្មោះធ្វើជាប្រធាន FIFA។
លោកបាននិយាយថា លោកសូមស្វាគមន៍ចំពោះបេក្ខភាពឈរឈ្មោះរបស់មិត្តសម្លាញ់ Luis សម្រាប់តំណែងប្រធាន FIFA ពីព្រោះថា គណៈគ្រប់គ្រងបាល់ទាត់ពិភពលោកមួយនេះ គួរមានប្រធានដែលមានចិត្តស្មោះ និងសមត្ថភាពខ្ពង់ខ្ពស់ដូចជាលោក Figo៕
Post a Comment