អ្នកប្រដាល់កំពុងទទួលបានការគាំទ្រច្រើន ផល សោភ័ណ្ឌ មិនមានឈ្មោះនៅក្នុងបញ្ជីកីឡាករប្រដាល់សាកលជម្រើសជាតិកម្ពុជាទៅចូលរួមប្រកួតព្រឹត្តិការណ៍កីឡាស៊ីហ្គេមឆ្នាំ២០១៥នៅប្រទេសសិង្ហបុរីនោះទេ។
តារាលេចធ្លោនៅក្លិបតាឡីដំរីមានឬទ្ធិ រូបនេះបានប្រាប់ថា ការគ្មានឈ្មោះក្នុងបញ្ជីអ្នកប្រដាល់សាកលជម្រើសជាតិកម្ពុជាដោយសារូបគេលែងចង់ចូលរួមប្រកួតជាមួយជម្រើសជាតិទៀតហើយ។ បុរសទើបរៀបការកាលពីពេលថ្មីៗនេះចង់ប្រកួតសេរីច្រើនជាង ពីព្រោះការប្រកួតនៅស៊ីហ្គេមរូបគេមិនសង្ឃឹមទទួលបានលទ្ធផលល្អជួនជាតិឡើយ។
ផល សោភ័ណ្ឌ ដែលត្រូវបានគេមើលឃើញថា កំពុងមានបច្ចេកទេសប្រកួតដ៏ល្អបានរៀបរាប់ទៀតថា ៖«និយាយពីសមត្ថភាពទៅដណ្ដើមមេដាយឲ្យប្រទេសជាតិជារឿងពិបាក ពីព្រោះកីឡាករគេខ្លាំងៗជាងយើង។ ប្រដាល់សាកល យើងនៅមានកម្រិត ការប្រជែងទាមទារឲ្យមានបទពិសោធន៍ច្រើនបង»។
អតីតអ្នកប្រដាល់ជម្រើសជាតិរូបនេះប្រាប់ទៀតថា មានកត្តាជាច្រើនទៀតដូចជាកីឡាប្រដាល់សាកលកម្ពុជានៅទន់ខ្សោយ ខ្វះបទពិសោធន៍ប្រកួតជាមួយប្រទេសខ្លាំងៗ ហើយកម្លាំងដៃ និងភាពរហ័សនៃការប្រើកណ្ដាប់ដៃក៏យឹតជាងគេ។
អ្នកប្រដាល់ឡើងជើងម្នាក់នេះនិយាយទៀតថា មុនចេញទៅប្រកួតស៊ីហ្គេមកាលពីឆ្នាំ២០១៣ សហព័ន្ធបាននាំកីឡាករទាំងអស់ឲ្យទៅហាត់នៅប្រទេសថៃ ប៉ុន្តែគេនិយាយថា មិនជាជាងគ្នាទេ គ្រាន់តែសំខាន់ខាងថៃមានការហាមមិនឲ្យដើរលេងផ្ដេសផ្ដាស ហើយអាហារគ្រប់គ្រាន់ និងហាត់បានដិតដល់តែប៉ុណ្ណោះ។
ចំណែករឿងបច្ចេកទេសវិញ សោភ័ណ្ឌ ប្រាប់ថា គ្មានអ្វីលើសគ្នាទេ រឿងដែលសំខាន់គឺស្ថិតលើកីឡាករផ្ទាល់មានសមត្ថភាពឬអត់។
ផល សោភ័ណ្ឌ ធ្លាប់បានចេញទៅប្រកួតប្រដាល់សកលក្នុងព្រឹត្តិការស៊ីហ្គេមបានពីរដងគឺឆ្នាំ២០១១ និង២០១៣ ប៉ុន្តែមិនទទួលបានលទ្ធផលល្អឡើយ៕
Post a Comment