អ្នកប្រដាល់ជើងចាស់ ខុន រាជ អ្នកប្រដាល់ក្លិបខ្លារខិនមានរិទ្ធ នឹងជួបសងសឹកជាមួយជើងខ្លាំងព្រំ សំណាង អ្នកប្រដាល់ក្លិបកងពលតូចទ័ពឆត្រយោង៩១១ នារសៀលថ្ងៃអាទិត្យ ទី០៨ ខែកុម្ភៈ ឆ្នាំ២០១៥នេះ នៅលើសង្វៀនរោងសៀកទល់មុខរដ្ឋសភា។
ខុនរាជ ជាអ្នកប្រដាល់ជើងចាស់ធ្លាប់មានឈ្មោះបោះសំឡេងគ្រាន់បើដែរពីមុនមក តែសម្រាប់ពេលបច្ចុប្បន្នខុន រាជ ស្រុតធ្លាក់ហៅមិនឮទេ។ ឥឡូវនេះ គេវាយចាញ់ទាំងអ្នកប្រដាល់ស្រករក្រោយៗទៀតផង កុំថាឡើយជួបជាមួយព្រំ សំណាង ដែលជាអ្នកប្រដាល់ជើងខ្លាំងគ្មានគូប្រកួតនោះ។
ខុន រាជ អ្នកណាក៏ស្គាល់គេច្បាស់ដែរ តែមួយរយៈពេលចុងក្រោយនេះ គេវាយធ្លាក់ខ្លាំងទាល់តែមែនទែន សឹងតែអ្នកផ្គូផ្គងមិនហ៊ានចាប់ឲ្យប្រកួតនោះ។ គេវាយចាញ់សំណាងតាំងពីពេលព្រំ សំណាង មិនទាន់មានឈ្មោះបោះសំឡេងម្ល៉េះ ចុះទម្រាំពេលនេះព្រំ សំណាង គេក្លាយជាជើងខ្លាំងទៅហើយនោះ តើខុន រាជ អាចយកឈ្នះបានដែរទេ ?
ព្រំ សំណាង មានស្នៀតប្រដាល់មិនអស្ចារ្យក៏ពិតមែន ប៉ុន្តែគេប្រកួតកម្រចាញ់ណាស់។ សំណាង មានកាយសម្បទាល្អ ខ្ពស់ ដៃ ជើងវែង ដែលជាការអំណោយផលដល់ការប្រកួតរបស់គេ។ គេគ្រាន់តែលើកជើងធាក់ ក៏គូប្រកួតពិបាកទប់ជាមួយនឹងគេដែរ។ ជាមួយនេះ សំណាងដាល់ត្រង់ៗ និងអាចប្រើកែងវាយទៅលើគូប្រកួត ដែលប្រកបដោយគ្រោះថ្នាក់បំផុត។ ប្រកួតចុងក្រោយ ព្រំ សំណាង វាយឈ្នះថៃក្នុងទឹកទី៣ កាលពីថ្ងៃទី០១ ខែកុម្ភៈកន្លងមកនេះ។
ការជួបគ្នារវាងព្រំ សំណាង និង ខុន រាជ នេះ បើតាមក្រុមអ្នកវិភាគប្រដាល់ក្នុងស្រុកអះអាងនោះ ខុន រាជមានសង្ឃឹមតិចតួចណាស់ ក្នុងការឈ្នះព្រំ សំណាង។ សំណាង អន់ទិចនិចប្រកួតមែន តែកម្លាំងចិត្តនិងកម្លាំងកាយរបស់គេ ខ្លាំងនិងល្អជាងខុនរាជ។ ចាំមើល តើអ្នកណាឈ្នះពីរនាក់នេះ ? ខុន រាជ ប្រកួតចុងក្រោយនេះ វាយចាញ់ពុទ្ធ ឆាយរិទ្ធី ក្លិបពុទ្ធសេរីវង្សក្នុងទឹកទី៤។
ហ៊ល ដារ៉ា អ្នកប្រដាល់ក្លិបសាលវ័ន្តកីឡា នឹងសាកកណ្តាប់ដៃជាមួយចាន់ ស៊ីណាត អ្នកប្រដាល់ក្លិបនិរោធមានជ័យ។ អ្នកប្រដាល់ទាំងពីរនេះ មិនធ្លាប់ដែលជួបគ្នាទេពីមុនមក។
ចាន់ ស៊ីណាត ជាអ្នកប្រដាល់ស្រករក្រោយទេ តែគេមានកណ្តាប់ដៃល្អ ស្នៀតកែងនិងជង្គង់ ក៏ល្អដែរ ហើយមួយទៀត គេស៊ូចំពោះការប្រកួតថែមទៀត។ គេធ្លាប់វាយឈ្នះអ្នកប្រដាល់ជើងចាស់ច្រើននាក់មកហើយ។
ចំណែក ហ៊ល ដារ៉ា ជាអ្នកប្រដាល់ជើងចាស់ គេក៏ល្អដែរ។ គេឡើងប្រកួតមិនសូវដែលចាញ់ឡើយ ។ ការប្រកួតចុងក្រោយរបស់គេ គឺវាយឈ្នះងួន គា អ្នកប្រដាល់ក្លិបតាឡីដំរីមានរិទ្ធដោយពិន្ទុ។
ទោះជាយ៉ាងណា សម្រាប់ការជួបគ្នានេះ ហ៊ល ដារ៉ា ប្រហែលជាពិបាកយកឈ្នះចាន់ ស៊ីណាតហើយ ព្រោះដារ៉ាឥឡូវនេះមិនជាខ្លាំងនិងល្អដូចពីមុនប៉ុន្មានទេ ដោយសារគេវាយឆាប់អស់ស៊ុហ្វ ហើយមួយទៀតស៊ីណាត មានកណ្ដាប់ដៃខ្លាំងជាង។ ស៊ីណាត ប្រកួតចុងក្រោយនេះវាយឈ្នះថៃ ដោយពិន្ទុ។
ណាម ម៉ូរ៉ាក់ អ្នកប្រដាល់ក្លិបពន្លឺសាមគ្គីខេត្តបាត់ដំបង នឹងជួបប្រកួតជាមួយ ម៉ន ភីរម្យ អ្នកប្រដាល់ក្លិបការិយាល័យទី៥ កងទ័ពជើងគោក ខណៈដែលប្រាក់ស៊ីណាត ជួបប្រកួតជាមួយអមតៈ ដានី អ្នកប្រដាល់ក្លិបអមតៈគុនខ្មែរ ខេត្តសៀមរាប៕
Post a Comment