ខ្សែបម្រើ Eden Hazard របស់ក្រុម Chelsea គឺជាកំពូលកីឡាករដែលពូកែញាក់ និងបង្កើតឱកាសស៊ុតបានច្រើនជាងគេបង្អស់នៅក្របខ័ណ្ឌ Premier League នារដូវកាលនេះ។
យោងតាមស្ថិតិពីគេហទំព័រ WhoScored.com បានបង្ហាញថា កីឡាករវ័យ២៤ឆ្នាំរូបនេះ បានបង្កើតឱកាសស៊ុត៦៧ដង ដែលស្មើនឹងមិត្តរួមក្រុមរបស់គេ Cesc Fabregas និងច្រើនជាង Stewart Downing ដែលស្ថិតនៅចំណាត់ថ្នាក់លេខ៣ ចំនួន៣ដង។
កីឡាករជម្រើសជាតិបែលហ្សិក ក៏ជាកីឡាករដែលពូកែញាក់បាល់ដាច់ច្រើនជាងគេផងដែរ នៅលីកកំពូលអង់គ្លេស នារដូវកាល២០១៤-២០១៥នេះ ដោយញាក់ដាច់គូបដិបក្ខបានចំនួន ១១២ដង ខណៈដែលកីឡាកររបស់ក្រុមកាំភ្លើងធំ Alex Oxlade-Chamberlain ញាក់បាន៧៦ដង និង Alexis Sanchez បាន៧៤ដង។
Hazard ក៏ជាកីឡាករដែលធ្វើឲ្យគូប្រកួតមានកំហុសច្រើនជាងគេដែរ ពោលគឺ៧៤ដង ខណៈដែលកីឡាករ Raheem Sterling របស់ Liverpool មានចំនួន៦០ដង។ ជាងនោះទៀត អតីតកីឡាករក្រុម Lille ក៏ជាអ្នកប៉ះបាល់សម្រេច (passes in the final third) បានរហូតដល់ ៧១៤ដងច្រើនជាងគេ ខណៈដែល Fabregas ប៉ះបាន៥៧៣ដង និង Santi Cazorla របស់ Arsenal បាន៥៥៥ដង។
កំពូលតារាឆ្នើមរបស់តោខៀវ ដែលទើបតែបន្តកុងត្រា៥ឆ្នាំកន្លះទៀត កាលពីម្សិលមិញរូបនេះ បានបង្ហាញទម្រង់លេងយ៉ាងល្អឥតខ្ចោះនៅរដូវកាលនេះ ខណៈដែលមកទល់នឹងពេលនេះ គេស៊ុត និង assists សរុបបាន១៤គ្រាប់៕
តើប្រិយមិត្តយល់ថា Hazard ស័ក្ដិសមជាកំពូលកីឡាករនៅ English Premier League ដែរឬទេ?
Post a Comment