FA ពិន័យខ្សែបម្រើក្រុមតោខៀវ Matic ២ប្រកួត (Video Inside)

សហព័ន្ធកីឡាបាល់ទាត់អង់គ្លេស FA សម្រេចដាក់ពិន័យខ្សែបម្រើប្រយុទ្ធ Nemanja Matic របស់ Chelsea ២ប្រកួតដោយសារតែការប៉ះទង្គិចគ្នាជាមួយនឹង កីឡាករក្រុមភ្ញៀវ Burnley កាលពីរាត្រីថ្ងៃសៅរ៍ សប្តាហ៍មុនបញ្ចប់ទៅដោយលទ្ធផលស្មើ ១-១ ក្នុង Premier League ។

ដើមឡើយ FA គ្រោងនឹងដាក់ទណ្ឌកម្មកីឡាករវ័យ២៦ឆ្នាំជនជាតិស៊ែប៊ី Matic ៣ប្រកួត តែក្រោយមករកឃើញ កំហុសមិនសូវជាធ្ងន់ធ្ងរក៏ព្យួរជើងត្រឹមតែ២ប្រកួត ដោយមានន័យថា Nemanja Matic នឹងមិនអាចចូលលេងបានពេល Chelsea ជួបជាមួយក្រុមមាន់ខ្នាយមាស Tottenham Hotspur នៅកីឡដ្ឋាន Wembley នៃវគ្គផ្តាច់ព្រ័ត្រក្នុងពានរង្វាន់លំដាប់ទី៣អង់គ្លេស Capital One Cup រាត្រីថ្ងៃអាទិត្យចុងសប្តាហ៍នេះ។

១ប្រកួតបន្ទាប់ Matic ក៏មិនអាចជួយ Chelsea បានដដែលពេលជួបប្រកួតទល់នឹងក្រុមញញួរធំ West Ham United នាថ្ងៃទី០៤ ខែមីនា ឆ្នាំ២០១៥ខាងមុខនៅ Premier League ប្រចាំសប្តាហ៍ទី២៧ តែអាចនឹងចូលលេង វិញបានពេល ក្រុមដែលកំពុងកាន់កាប់តំណែង កំពូលតារាងប៉ះក្រុម Southampton នៅសប្តាហ៍ បន្ទាប់ ។

ក្នុងសេចក្តីថ្លែងការណ៍មួយដែលចេញដោយក្លឹប Chelsea បានឲ្យដឹងថា “វាពិតជាអយុត្តិធម៌ខ្លាំងណាស់សម្រាប់ Matic ហើយពិតជាគួរឲ្យខកចិត្តខ្លាំងណាស់ ដល់ ក្លឹបទាំងមូល ។

វាគួរណាស់ដែលត្រូវពិន័យតែ១ប្រកួតបានហើយ មិន មែនពី៣ប្រកួតមកនៅត្រឹម២ប្រកួតនោះទេ ។ ការពិន័យនេះវាប្រៀបប្រដូចទៅនឹងឧក្រិដ្ឋកម្មសុទ្ធសាធ” ៕

<