CR7 មាន​កំណត់​ត្រា​​ស៊ុត​បាល់​ពិន័យ​១១​ម៉ែត្រ​ល្អ​ជាង​ Messi

Lionel Messi បាន​ស៊ុត​បាល់​ពិន័យ​១១ម៉ែត្រ​មិន​បាន​សម្រេច​​​នៅ​​ចុង​ម៉ោង​នៃ​ការ​​​ប្រកួត​ដ៏​សំខាន់​កាល​ពី​យប់​មិញ។ តើ​គ្រាប់​បាល់​ប៉េណាល់ទី​ដែលស៊ុត​មិន​ចូល Manchester City ក្នុង​ជំនួប​ជើង​ទី​១ វគ្គ​១៦ក្រុម​ចុង​ក្រោយ​ UEFA Champions League នេះ ជា​គ្រាប់​ស៊ុត​មិន​ចូល​លើក​ទី​ប៉ុន្មាន​ហើយ​សម្រាប់​​ខ្សែ​ប្រយុទ្ធ​​ក្រុម​ Barcelona ​រូប​នេះ?

យោង​តាម​ទិន្នន័យ​ពី​គេហទំព័រ 101greatgoals ​​បាន​ឲ្យ​ដឹង​ថា​​កំណត់​ត្រា​ស៊ុត​បាល់​ពិន័យ​១១​ម៉ែត្រ​របស់​ Messi គឺ​មិន​សូវ​ល្អ​នោះ​ទេ បើ​ធៀបជាមួយ​ម្ចាស់​ពាន​រង្វាន់ FIFA Ballon d’Or កីឡាករ Cristiano Ronaldo។ ចង់​ដឹង​លម្អិត​ច្បាស់ សូម​មើល​ដូច​ខាង​ក្រោម៖

១. ​Lionel Messi

កីឡាករ​វ័យ​២៧​ឆ្នាំ​រូប​នេះ​ធ្លាប់​ស៊ុត​បាល់​ពិន័យ​១១​ម៉ែត្រ​៥៩​ដង​មក​ហើយ​តាំង​ពី​ចូល​លេង​នៅ Barcelona ​មក។ ​​៥៩​ដង​​នោះ Messi ​ស៊ុត​មិន​ចូល​រហូត​ដល់​ទៅ​១៣​ដងឯណោះ​ ពោល​គឺ​ នៅ​ La Liga អត់​ចូល​​៥​ដង , Copa del Rey ​អត់​ចូល​ ៤​ដង , Champions League ​អត់​ចូល​៣​ដង​ និង​ Supercopa អត់​ចូល​ម្ដង។ ​បើ​​និយាយ​ពី​ជម្រើស​ជាតិ​អាហ្សង់ទីន​វិញ​ បុរស​កម្ពស់​១,៦៩​ម៉ែត្រ​រូប​នេះ ​ធ្លាប់​ស៊ុត​បាល់​ពិន័យ​១១​ម៉ែត្រ ​១២​ដង ដែល​ក្នុង​នោះ​ចូល​១០​ដង ​និង​មិន​ចូល​២​ដង។

២. ​Cristiano Ronaldo

កីឡាករ​វ័យ​៣០​ឆ្នាំ​រូប​នេះ​ធ្លាប់​បាន​ស៊ុត​បាល់​ពិន័យ​១១​ម៉ែត្រ​បាន​៥៩​ដង​ដូច​ Messi ​ដែរ​នៅ​ Real Madrid ​ប៉ុន្តែ​​អាច​ធ្វើ​បាន​ល្អ​ជាង ពោល​គឺ​ម្ចាស់​​កំណត់ត្រា​ស៊ុត​បញ្ចូល​ទី​ច្រើន​ជាង​គេ​ប្រចាំ​ក្រុម​ជម្រើស​ជាតិ​ព័រទុយហ្គាល់​មួយ​នេះ ​ស៊ុត​មិន​ចូល​​ទឺ តែ​៥​ដង​​ប៉ុណ្ណោះ។ ​​៥​ដង​នោះ​មាន ​៣​ដង​ក្នុង​ការ​ប្រកួត​​ UEFA Champions League ​ដូច​​​ Messi ​ដែរ។