វង្ស ណយ និង ឡៅ ស៊ីណាត ទុកគំនុំមួយដុំ ចាប់ដៃគ្នាស្វាគមន៍ ជើងខ្លាំងថៃ ចុងសប្ដាហ៍​នេះ

កន្លងមកទស្សនិកជន ធ្លាប់តែទស្សនា ជំនួបសងសឹក ដ៏អស្ចារ្យរវាងកីឡាករ វង្ស ណយ និងខ្លាចាស់ ឡៅ ស៊ីណាត ហើយក៏ជាសត្រូវ ស្លាប់-រស់នឹងគ្នាផងដែរ ។ ប៉ុន្ដែចុងសប្ដាហ៍នេះ ពួកគេនឹងទុកគំនុំសងសឹក មួយឡែកសិន ហើយងាកមកចាប់ដៃគ្នាវិ ដើម្បីទទួលស្វាគមន៍ កីឡាករជើងខ្លាំងថៃ ២រូប នៅលើសង្វៀន បាយ័ន ស្ទឹងមានជ័យ នាល្ងាចថ្ងៃទី២២ ខែកុម្ភៈ ឆ្នាំ២០១៥នេះ ។

ចំពោះកីឡាករ វង្ស ណយ សិស្សគុនក្លឹបក្រសួងការពារជាតិ នឹងត្រូវជួបប្រកួតជាមួយ កីឡាករ Singha Thornnoy របស់ថៃ ក្នុងប្រភេទទម្ងន់ ៦៩គីឡូក្រាម ។ ជើងខ្លាំងទាំង ២រូបនេះ សុទ្ធតែជាបេក្ខភាព ត្រូវប្រកួតដណ្ដើមប្រាក់រង្វាន់ ១ម៉ឺនដុល្លារ របស់ស្ថានីយ៍ទូរទស្សន៍បាយ័ន នាខែមីនាខាងមុខដូចគ្នា ជាមួយនឹង កីឡាករ ជើងខ្លាំងកម្ពុជា-ថៃ ចំនួន ៦រូបផ្សេងទៀត ។

វង្ស ណយ ធ្លាប់បានកសាងកេរ្ដិ៍ឈ្មោះល្បីរន្ទឺ កាលពីឆ្នាំ២០១៤កន្លងទៅ ប៉ុន្ដែដោយសារបញ្ហា ជីវភាពគេបានលាលែង ពីសង្វៀនប្រដាល់ មួយរយៈនៅចុងឆ្នាំ ហើយក៏ បាន វិលត្រឡប់ប្រកួតវិញ កាលពីដើមឆ្នាំ២០១៥នេះ ដោយត្រូវប្រកួតសងសឹកជាមួយកីឡាករ ឡៅ ស៊ីណាត ប៉ុន្ដែត្រូវសន្លប់ក្រោមកណ្ដាប់ដៃស៊ីណាត តឹ្រមទឹកទី២ ។ មិនបានប៉ុន្មាន ណយ បានឡើយប្រកួត លើសង្វៀន SEA-TV វិញម្ដង ហើយក៏បានផ្ដួល កីឡាករថៃ Phit Chak ក្នុងទឹកទី៣ ដើម្បីស្ដារមុខមាត់ខ្លួន ឡើងវិញ ។

ប៉ុន្ដែសម្រាប់ជំនួបមិត្តភាពអន្ដរជាតិ ចុងសប្ដាហ៍នេះ មិនដឹងថា វង្ស ណយ អាចស៊ីកីឡាករ Singha បានស្រួល ឬក៏អត់នោះទេ ព្រោះកីឡាករថៃ រូបនេះ ពុំធ្លាប់ បង្ហាញ វត្តមាន លើសង្វៀនកម្ពុជាឡើយ ហើយសាច់ស្នៀត ប្រកួតយ៉ាងណា ក៏មិនទាន់ដឹងដែរ ដូច្នេះ វង្ស ណយ មិនអាចធ្វេសប្រហែល បានឡើយ ។

ងាកទៅមើលគូប្រកួត របស់កីឡាករ ឡៅ ស៊ីណាត វិញ គឺកីឡាករថៃ Pirabkao គេទើបតែមកប្រកួត លើសង្វៀនកម្ពុជា កាលពីថ្ងៃទី០៨ កុម្ភៈកន្លងទៅ ប៉ុន្ដែត្រូវ សន្លប់ធំក្រោម ទម្ងន់ជង្គង់កីឡាករ អ៊ុង វីរៈ របស់កម្ពុជា ត្រឹមទឹកទី៣ ។ ដូច្នេះ សម្រាប់ការផ្គូរផ្គង់ ឲ្យជួបជាមួយ ឡៅ ស៊ីណាត លើកនេះ Pirabkao ប្រហែលជា មិនអាចសងសឹក ដើម្បីស្ដារមុខមាត់ខ្លួន បានឡើយ ព្រោះ ស៊ីណាត រឹតតែមាន ស្នៀតពិសេសៗ ច្រើនជាងកីឡាករ អ៊ុង វីរៈ ទៅទៀត ថាមិនត្រូវនោះ Pirabkao អាចនឹងសន្លប់ម្ដងទៀតក៏ថាបានដែរ ៕