ឡៅ ចន្រ្ទា និងហុន ឈុនហេង សហការ​គ្នា​ផ្តួល​ថៃ​នៅ​សង្វៀន​អប្សរា

ម្ចាស់ខ្សែក្រវាត់ស្រាបៀរ Leo-Cup ឡៅ ចន្រ្ទា មកពីក្លឹបកងពលតូចទ័ពឆ័ត្រយោង៩១១ ត្រៀមជួបកីឡាករ ថៃ បាក់ ចូតេក ក្នុងប្រភេទទម្ងន់៦០គីឡូក្រាម ខណៈមិត្តរួមជាតិជាតិ ហុន ឈុនហេង ក្លឹបបង្ក្រាបគ្រឿងញៀនប្រកួត ជាមួយអ្នកប្រដាល់ថៃដូចគ្នា ដាវ សាយ៉ាម លក្ខណៈមិត្តភាពអន្តរជាតិរបស់ស្ថានីយ ទូរទស្សន៍អប្សរានាល្ងាចថ្ងៃសៅរ៍ ទី២៨ ខែកុម្ភៈ ឆ្នាំ២០១៥នៅលើសង្វៀនអប្សរា ។

ព្រឹត្តិការណ៍នេះទូរទស្សន៍អប្សរា សហការនឹងសហព័ន្ធកីឡាប្រដាល់កម្ពុជាក្រោម ការឧបត្ថម្ភពីណាហ្គាវើល ហុន ឈុនហេង ជួបជាមួយអ្នកប្រដាល់ថៃ ដាវ សាយ៉ាម ក្នុងប្រភេទទម្ងន់៥១គីឡូក្រាម ។

អ្នកប្រដាល់ថៃរូបនេះពុំធ្លាប់មកប្រកួតនៅស្រុកខ្មែរឡើយ តែបើតាមការអះអាងរបស់អ្នកផ្គូផ្គងនៅអប្សរានោះថា គេមិនអន់ឡើយគេនៅវ័យក្មេងមែនតែក្បាច់គុនគេ មិនក្មេងដូចវ័យនោះទេ ។

សម្រាប់អ្នកប្រដាល់កម្ពុជា ហុន ឈុនហេងក៏មិនអន់ដែរ គេក៏នឹងអាចធ្វើឲ្យ ដាវ សាយ៉ាម វេទនាដែរប៉ុន្តែការជួប លើកនេះឈុនហេងអាចនឹងលំបាក ព្រោះ ដាវ សាយ៉ាម មានសមត្ថភាពល្អទាំងជង្គង់ និងកែង ។

រីឯ ឡៅ ចន្ទ្រា ក្លឹបទ័ពឆ័ត្រយោង៩១១ ជួបប្រកួតជាមួយអ្នកប្រដាល់ថៃ បាក់ ចូតេក ក្នុងប្រភេទទម្ងន់៦០គីឡូក្រាម ។ឡៅ ចន្ទ្រា ជាអ្នកប្រដាល់មួយរូបដែលមាន ស្ថិតិ ចាញ់តិចបំផុត ហើយប្រវត្តិប្រកួតជាមួយបរទេសរបស់ ចន្ទ្រា សុទ្ធតែ បានទទួលជ័យជំនះគ្រប់គូប្រកួត ។

សម្រាប់ការប្រកួតមួយនេះទោះបីចន្ទ្រាមិនដឹងពីសមត្ថភាពរបស់គូប្រកួត ក៏ពិត មែន តែចន្ទ្រាបានត្រៀមខ្លួនយ៉ាងល្អ ដើម្បីដណ្ដើមជ័យជំនះ ៕