ក្លិប Aston Villa បានបណ្ដេញអ្នកចាត់ការ Pual Lambert ចោលហើយ បន្ទាប់ពីបុរសសញ្ជាតិស្កុតឡែនរូបនេះដឹកនាំក្រុមធ្លាក់មកដល់លេខ១៨ជិតបាតតារាង និង១០ប្រកួតចុងក្រោយនេះ រកគ្រាប់បាល់បានតែ២គ្រាប់គត់។
លោក Paul Lambert ដឹកនាំក្រុម Aston Villa រដូវកាលនេះធ្លាក់មែនទែន ដោយ២៥ប្រកួតមកនេះឈ្នះបានតែ៥ដងគត់ ចាញ់ដល់ទៅ១៣ដង និងស្មើ៧ដង ហើយរកគ្រាប់បាល់បានតែ១២គ្រាប់ប៉ុណ្ណោះក្នុងក្របខ័ណ្ឌ Premier League នេះ។ អ្នកគាំទ្រ Aston Villa បានប្រកាសដេញបុរសវ័យ៤៥ឆ្នាំរូបនេះតាំងពីក្នុងប្រកួតដែលចាញ់ Hull City ២-០ ឯណោះ ខណៈដែលក្លិបទើបតែប្រកាសបណ្ដេញចេញនាពេលប៉ុន្មានម៉ោងមុននេះ។
អតីតអ្នកចាត់ការក្រុម Norwich City ខាងលើនេះចូលមកដឹកនាំក្រុម Aston Villa នៅឆ្នាំ២០១២ ហើយកុងត្រារបស់គេនឹងត្រូវចប់នៅឆ្នាំ២០១៨ខាងមុខ ប៉ុន្តែដោយសារមានរឿងរ៉ាវខាងលើនេះកើតឡើងទើបធ្វើឱ្យម្ចាស់ក្លិបនេះសម្រេចចិត្តដេញចេញមុនផុតកុងត្រាដូច្នេះ។ ទន្ទឹមនឹងមិនទាន់បានរកអ្នកចាត់ការថ្មីមកជំនួយ គ្រូបង្វឹក Scott Marshall និង Andy Marshall នឹងត្រូវរ៉ាប់រងមើលការខុសត្រូវក្រុមជាបណ្ដោះអាសន្នសិន ៕
Post a Comment