ការប្រកួតក្របខ័ណ្ឌ La Liga កាលពីយប់មិញនេះ ក្រុម Real Madrid ឈ្នះក្រុម Cordoba ទាំងប្រផុតប្រផើយ ២-១ បន្ទាប់ពីកីឡាករ Cristiano Ronaldo ទទួលបានកាតក្រហម។ ចំណែកឯក្រុម Barcelona វិញយក៣ពិន្ទុបានយ៉ាងងាយស្រួលបំផុតក្រោយពីយកឈ្នះ Elche ៦-០ ។
ការប្រកួតរវាង Real Madrid និង Cordoba កាលពីយប់មិញនេះពិតជាស្វិតស្វាញមែនទែន ខណៈដែលម្ចាស់ផ្ទះ Cordoba រកបានគ្រាប់បាល់នាំមុខតាំងពីនាទីទី៣ដោយទទួលបានបាល់ពិន័យ១១ម៉ែត្រក្រោយពេលខ្សែបការពារ Ramos បង្កកំហុសនៅតំបន់គ្រោះថ្នាក់។ តែទោះជាយ៉ាងនេះក្ដី មកដល់នាទីទី២៧ ខ្សែប្រយុទ្ធ Karim Benzema អាចរកគ្រាប់បាល់ឱ្យ Real តាមស្មើបានវិញក្រោយពីទទួលបាល់ពីការតែតរបស់ Gareth Bale ។
ចូលមកដល់តង់ទី២ រឿងដែលគួរឱ្យភ្ញាក់ផ្អើលបានកើតឡើង ពោលគឺខ្សែប្រយុទ្ធ Cristiano Ronaldo ទទួលបានកាតក្រហមបណ្ដេញចេញបន្ទាប់ពីរូបគេទៅទាត់កីឡាករខាង Cordoba ពីក្រោយដោយចេតនានៅនាទីទី៨២។ ៣នាទីបន្ទាប់ពី Ronaldo ដើរចេញពីទីលាន កីឡាករ Cartabia របស់ Cordoba ក៏ទទួលបានកាតក្រហមវិញដែរ (កាតលឿង២ដង) បន្ទាប់ពីយកដៃទៅរាំងបាល់ពេល Bale ទាត់បាល់ហ្វ្រីឃីត ហើយពេលនោះហើយដែលខាង Real Madrid បានបាល់ពិន័យ១១ម៉ែត្រម្ដងដោយ Gareth Bale ជាអ្នកស៊ុតបានសម្រេច។ ចប់ការប្រកួតម្ចាស់ផ្ទះ Cordoba ១-២ Real Mdrid ។
ងាកមកខាង Barcelona ឯណោះវិញ ទៅលុតក្រុម Elche ៦-០ដល់ផ្ទះតែម្ដង ពោលគឺ១គ្រាប់រកបានដោយ Pique នាទី៣៥ , Lionel Messi ២គ្រាប់នាទី៥៥និង៨៨ , Neymar ២គ្រាប់នៅនាទី៦៩និង៧១ហើយមួយគ្រាប់ចុងក្រោយរកបានដោយ Pedro នាទី៩០+៣ ។
Post a Comment