បន្ទាប់ពីក្ដីសុបិនលើកពាន World Cup ត្រូវបានរលាយ ដោយសារបញ្ហារបួសរួចមក កីឡាករ Neymar បានប្រកាសប្រាប់ថា រូបគេនឹងដឹកនាំក្រុមជម្រើសជាតិបាល់ទាត់ប្រេស៊ីល ទៅចូលរួមប្រកួតនៅអូឡាំពិកឆ្នាំ២០១៦ នាទីក្រុង Rio បន្តទៀត ដោយសង្ឃឹមថានឹងយកមេដាយមាសឲ្យបាន។
ជិតកន្លះឆ្នាំមកហើយ ដែលក្រុមបាល់ទាត់ប្រេស៊ីល ចាញ់យ៉ាងអាម៉ាស់ ៧-១ ក្នុងទឹកដីខ្លួនឯង ក្នុងការប្រកួត World Cup ឆ្នាំ២០១៤ វគ្គពាក់កណ្ដាលផ្ដាច់ព្រ័ត្រក្រោមស្នាដៃក្រុមអាល្លឺម៉ង់ ខណៈដែលពេលនោះ Neymar កំពុងរបួសមិនអាចចូលលេងបាន។ ប៉ុន្តែពេលនេះ កីឡាករឆ្នើមប្រេស៊ីល រូបនេះ ចង់ស្តាមុខមាត់ឲ្យក្រុមជម្រើសជាតិឡើងវិញ នៅអូឡាំពិកឆ្នាំក្រោយ។ ខ្សែបម្រើប្រយុទ្ធរបស់ក្រុម Barcelona បានប្រាប់ដល់កាសែត Marca របស់អេស្ប៉ាញថា រូបគេមានសង្ឃឹម និងក្ដីស្រមៃថា នឹងដឹកនាំក្រុមប្រេស៊ីល ឲ្យទទួលបានមេដាយមាសនៅអូឡាំពិកជាក់ជាមិនខាន។ កីឡាករវ័យ២២ឆ្នាំ បាននិយាយថា៖ «ខ្ញុំសង្ឃឹមថា ខ្ញុំគឺជាផ្នែកមួយនៃក្រុម ដែលនឹងអាចឈ្នះពានរង្វាន់សម្រាប់ប្រជាជនប្រេស៊ីល ជាពិសេសព្រោះតែយើងលេងនៅផ្ទះខ្លួនឯង។ ជ័យជម្នះនៅក្នុងកីឡដ្ឋាន Maracana ពិតជាអស្ចារ្យ មិនអាចបំភ្លេចបាន ហើយយើងជឿជាក់ថា យើងនឹងលេងឲ្យបានល្អបំផុត ដើម្បីទៅដល់ភាពជោគជ័យមួយនេះ»។
Neymar ក៏ធ្លាប់បានដឹកនាំប្រេស៊ីលទៅលេងនៅអូឡាំពិក នាទីក្រុងឡុងដុងម្ដងដែរ កាលពីឆ្នាំ២០១២ ខណៈដែលពេលនោះក្រុមប្រេស៊ីលបានត្រឹមជ័យលាភីមេដាយប្រាក់ បន្ទាប់ពីប្រកួតចាញ់ក្រុមជម្រើសជាតិម៉ិកស៊ីកូនៅវគ្គផ្ដាច់ព្រ័ត្រ៕
Post a Comment