លោក David Moyes អ្នកចាត់ការថ្មីរបស់ក្រុម Real Sociedad បានបញ្ចេញពាក្យឌឺដងទៅ Real Madrid មុនការប្រកួតរវាងក្រុមទាំងពីរនៅយប់នេះថា Sociedad អាចយកឈ្នះ Barcelona បាន ហើយ Real Madrid យប់នេះក៏ប្រហែលជាមានវាសនាដូចគ្នាដែរ។
David Moyes ដែលទើបតែមកដឹងនាំក្រុម Real Sociedad នៅចុងឆ្នាំ២០១៤នេះ បាននិយាយមុនទៅសួរសុខទុក្ខ Real Madrid នៅម៉ោង១០:០០នាទីយប់នេះថា៖ “នេះជាលើកដំបូងហើយសម្រាប់ខ្ញុំដែលទៅ Bernabeu ។ ខ្ញុំមិនដែលទៅទីនោះទេតាំងពីដើមរៀងមក ហើយយប់នេះដែរខ្ញុំនឹងធ្វើឱ្យមានការភ្ញាក់ផ្អើលមួយនៅទីនោះ។ ការឈ្នះ Barcelona កាលពីដើមខែនេះគឺជាមូលហេតុមួយដែលអ្នកគ្រប់គ្នាត្រូវយល់ដឹង ហើយក៏ជាសារមួយដាស់តឿនដល់លោក Carlo Ancelotti ផងដែរ។ យើងមិនសង្ឃឹមថាបានឈ្នះ១០០%នោះទេ ប៉ុន្តែក៏មិនសង្ឃឹមថាចាញ់នោះដែរ”។
ចំណែកឯលោក Carlo Ancelotti វិញក៏បាននិយាយដែរថា៖ “ប៉ះ Real Sociedad នៅយប់នេះគឺមិនអាចមើលស្រាលបានទេ។ យើងត្រូវតែការពារឱ្យបានម៉ត់ចត់ មិនត្រូវឱ្យមានចន្លោះប្រហោងនៅតំបន់ខាងក្រោមបាននោះទេ។ អត់ Ronaldo យប់នេះ មានតែ Gareth Bale ហើយជាអ្នកជំនួយតំណែងឆ្វេង ហើយ James ជាអ្នកនៅស្លាបស្ដាំវិញ ខណៈ Illarramendi នឹងត្រូវលេងនៅកណ្ដាល”។
សូមបញ្ជាក់ថា Real Sociedad ជាក្រុមដែលនៅពាក់កណ្ដាលតារាងមែន ប៉ុន្តែឱ្យតែជួបក្រុមខ្លាំងពួកគេក៏លេងខ្លាំងតាមហ្នឹងដែរ។ ជាក់ស្ដែងដូចថ្ងៃទី៤ខែមករាកន្លងទៅ Sociedad អាចយកឈ្នះ Barcelona ១-០។ ចំណែកឯប្រវត្តិប៉ះ Real Madrid វិញ ឆ្នាំមុនពួកគេអាចយកឈ្នះក្រុមលោក Carlo Ancelotti ដល់ទៅ៤-២។ ចាំមើលយប់នេះវិញ ថាតើក្រុមកំពុងឈរចំណាត់ថ្នាក់លេខ១នៅតារាង La Liga អាចសងសឹកក្រុមឈរនៅចំណាត់ថ្នាក់លេខ១១បានដែរឬអត់?
Post a Comment