កីឡាករ ធី តុងហ៊ី ប៉ះថៃ គ្រាដែល ថៃ ប៊ុនហាន ប៉ះ អៀង ច័ន្ទល័ក្ខ នៅ​វគ្គ​ជម្រុះ​ខ្សែ​ក្រវាត់​នៅ​សង្ទៀន TV5

ព្រឹត្តិការណ៍ប្រកួតជម្រុះដណ្ដើមខ្សែក្រវាត់ជើងឯក “អធិរាជស៊ីម៉ងត៍អូដ្ឋ” ទម្ងន់ ៦៣,៥ គីឡូក្រាមនៅសង្ទៀនTV5 ទីលាន TIFFY ARENA នាល្ងាចថ្ងៃសៅរ៍ ទី១២ ខែកញ្ញា ឆ្នាំ២០១៥ នេះមានចំនួន២គូក្នុងពូល B នេះមានអ្នកប្រដាល់កម្ពុជា ៣រូប និងអ្នកប្រដាល់ជនជាតិថៃ១រូប ដោយក្នុងនោះ អ្នកប្រដាល់ ធី តុងហ៊ី ក្លឹប សាលវ័ន្ត កីឡា ប៉ះជា មួយអ្នកប្រដាល់ថៃ Weerachai Menayuthin ។

កីឡាករ ធី តុងហ៊ី ទើបតែផ្ដួលអ្នកប្រដាល់ថៃ Yort Tonthy ឲ្យសន្លប់ក្នុងទឹកទី៣ កាលពីពាក់កណ្ដាលខែសីហា កន្លងមកសម្រាប់ ការជួបប្រកួតជាមួយ Weerachai Menayuthin នេះជាលើកទី២ សម្រាប់គេ ហើយក៏ប្រហែលជាមិនមានបញ្ហាអ្វីចោទសម្រាប់រូបគេនោះដែរ ។ យ៉ាងណាអ្នកលេងជង្គង់ និងកែងម្នាក់ នេះ អាចនឹងធ្វើឲ្យ TIFFY អស់លុយដោយសារកែងរបស់គេមិនខាន ព្រោះ TIFFY ប្រកាសឲ្យមួយថ្នេររហូតដល់ទៅ ៣០.០០០ រៀលឯណោះ ។

អ្នកប្រដាល់ថៃរូបនេះពុំធ្លាប់ដែលមកប្រកួតនៅភ្នំពេញនោះទេ ដូច្នេះមិនដឹងថា ខ្លាំងឬក៏ខ្សោយយ៉ាងណាទេ តែ ធី តុងហ៊ី ត្រូវតែយកឈ្នះ អ្នកប្រដាល់ថៃរូបនេះ ឲ្យខាង តែបាន ដើម្បីរក៣ពិន្ទុក្នុងថ្ងៃប្រកួតលើកដំបូងនៃវគ្គជម្រុះនេះ ។

ចំណែកគូខ្សែក្រវាត់មួយគូទៀត ថៃ ប៊ុនហាន អ្នកប្រដាល់ក្លឹបឫទ្ធីពោធិ៍សែនជ័យ ត្រូវជួបជាមួយ អៀង ច័ន្ទល័ក្ខ អ្នកប្រដាល់ក្លឹបកងទ័ពជើងគោក ។

កីឡាករ ថៃ ប៊ុនហាន ជាអ្នកប្រដាល់ដែលវាយកាចបំផុត ព្រោះមុខរបស់គេវាយមិនឈឺម្ល៉ោះហើយប្រកួតគឺគេដើរចូលទៅវាយគូប្រកួតជានិច្ចដែលគូប្រកួតល្មមៗ បាក់ដោយសារខ្លាចញញើតនោះ ។ កីឡាករ អៀង ច័ន្ទល័ក្ខ ប្រហែលជាមិនអាចទៅរួចជាមួយថៃ ប៊ុនហាននោះឡើយ ព្រោះ ច័ន្ទល័ក្ខ មានស្នៀតប្រដាល់ ខ្លាំងដូច ប៊ុនហាន ទេ ហើយណាមួយមានចិត្តប្រដាល់តូចថែមទៀត ។ កីឡាករ ថៃ ប៊ុនហាន ប្រកួតចុងក្រោយនេះវាយស្មើជាមួយ ឡេះ តើក ក្លឹបពុទ្ធសេរីវង្សកីឡា ។

ឯការប្រកួតចុងក្រោយរបស់ អៀង ច័ន្ទល័ក្ខ បានវាយឈ្នះ ឯម លីថូ ក្រោយពី លីថូ ជ្រុលជើងទាត់ថែមមួយជើងឲ្យសន្លប់ក្នុងទឹកទី៣ ធ្វើឲ្យ ច័ន្ទល័ក្ខ បានឈ្នះ នោះឯង ។ គួរបញ្ជាក់ថា ការប្រកួតដណ្ដើមខ្សែក្រវាត់ជើងឯក “អធិរាជស៊ីម៉ងត៍អូដ្ឋ” ទម្ងន់៦៣,៥ គីឡូក្រាម នេះមានអ្នកប្រដាល់ចំនួន៨រូប ចូលរួមប្រកួត ក្នុងនោះអ្នកប្រដាល់កម្ពុជាមាន៦រូប ជនជាតិអង់គ្លេស១រូប និងជនជាតិថៃ១រូប ៕