បឺត ខាំ ប្រើជង្គង់ហោះបំបាក់កីឡាករថៃយកបីពិន្ទុ កក្រើកសង្វៀនស្ទឹងមានជ័យ(Video inside)

ពិតជាគួរឲ្យអស្ចារ្យនិងធ្វើឲ្យអ្នកទស្សនា ហើបគូទអង្គុយរួចឈរស្រែកហ៊ោកញ្ជ្រៀវទះដៃគាំទ្រកីឡាករកម្ពុជា បឺត ខាំ ដែលបានផ្ដួលកីឡាករថៃ ដោយប្រើជង្គង់ហោះឲ្យសន្លប់នៅក្នុងទឹកទី៣ ដើម្បីកាន់បីពិន្ទុក្នុងដៃ ឈានទៅដណ្ដើមខ្សែក្រវាត់ Carabao វគ្គ២ នៅសង្វៀនស្ទឹងមានជ័យ កាលពីថ្ងៃអាទិត្យ ទី០២ ខែសីហា ឆ្នាំ២០១៥។

ខ្លាចាស់កំពូលល្បិច ដៃរហ័សដូចផ្លេកបន្ទោរ គឺកីឡាករ បឺត ខាំ របស់កម្ពុជា បានធ្វើឲ្យអ្នកគាំទ្រក៏ដូចជាអ្នកចូលទស្សនា ពេញចិត្តយ៉ាងខ្លាំង ក្រោយដែលរូបគេធ្វើការប្រកួតដោយបំបាក់កីឡាករថៃ Plangchork ឬ Yuthchia ឲ្យអាជ្ញាកណ្ដាលរាប់ដល់ដប់មិនអាចបន្តការប្រកួតបានត្រឹមទឹកទី៣ ដោយសារតែមួយជង្គង់ហោះ របស់ បឺត ខាំ ខណៈដែលគូដណ្ដើមខ្សែក្រវាត់ទី២ កីឡាករ ពេជ្រ សីហា របស់កម្ពុជា ចាញ់កីឡាករថៃ Kla Khunserk chompea Tour ដោយពិន្ទុ។

សូមបញ្ជាក់ថា កាលពីសប្ដាហ៍ទី១ នៃការប្រកួតដណ្ដើមខ្សែក្រវាត់ Carabao រដូវកាលទី២ កីឡាករកម្ពុជាពីររូប គឺ វង្ស ណយ និង ឡៅ ស៊ីណាត បានត្រឹមតែម្នាក់១ពិន្ទុ ដោយសារចាញ់កីឡាករនៃព្រះរាជាណាចក្រថៃ ចំណែកឯ សប្ដាហ៍ទី២ បឺត ខាំ ទទួលបានបីពិន្ទុមុនគេដោយផ្ដួលថៃឲ្យសន្លប់ក្នុងទឹកទី៣ ខណៈដែល ពេជ្រ សីហា ចាញ់កីឡាករថៃដោយពិន្ទុ។

ដូចនេះ គិតត្រឹមសប្ដាហ៍ទី២ កីឡាករថៃ៣រូប គឺកីឡាករ Jongangfight កីឡាករ Watcharalek និង Kla Khunserk chompea Tour បាន៣ពិន្ទុដូចគ្នា ស្របពេលកម្ពុជា មានតែកីឡាករ បឺត ខាំ ដែលទទួលបាន៣ពិន្ទុមុនគេ ខណៈបីនាក់ទៀត គឺ វង្ស ណយ ឡៅ ស៊ីណាត និងពេជ្រ សីហា បានតែម្នាក់១ពិន្ទុ៕