កីឡាករ ឃឹម បូរ៉ា ឡើង​វគ្គ​ផ្តាច់​ព្រ័ត្រ ដោយ​ស្វ័យ​ប្រវត្តិ​នៃ​ខ្សែ​ក្រវាត់ K-Cement

ព្រឹត្តិការណ៍ប្រកួតខ្សែក្រវាត់ K-Cement លើសង្វៀន SEA-TV កាលពេលថ្មីៗនេះកីឡាករ ឃឹម បូរ៉ា ក្លឹបរស្មីភូមិគាប បានឡើងទៅវគ្គផ្តាច់ព្រ័ត្រដោយស្វ័យប្រវត្តិ បន្ទាប់ពីរូបគេបានយកឈ្នះ មាស ច័ន្ទមាន ក្លឹបក្រសួង ការពារជាតិ ដោយពិន្ទុ។ បូរ៉ា ក្នុងជុំទី៣នេះ ២ប្រកួត ឈ្នះទាំង២ គឺឈ្នះ សូត្រ ប៊ុនធី ក្លឹបបក្សីស្លាបដែក ដោយពិន្ទុ និង មាស ច័ន្ទមានក្លឹបក្រសួងការពារជាតិដោយពិន្ទុ ។

ចំណែកអ្នកប្រដាល់ លាស់ យីន ក្លឹបសម្រែករាជសីហ៍ខ្ទាតចេញពីការប្រកួតជាស្ថាពរហើយ បន្ទាប់ពីការប្រកួតជុំទី៣ នេះចំនួន២ ប្រកួតទោះបីគេនៅសល់មួយ ប្រកួតទៀតក៏ដោយ ។ រីឯ អ្នកប្រដាល់ មាស ច័ន្ទមាន និងអ្នប្រដាល់ សូត្រ ប៊ុនធី ក្លឹបបក្សីស្លាបដែក អ្នកទាំង ២នាក់ត្រូវប្រជែងគ្នាយ៉ាងខ្លំាង នៅសប្តាហ៍ក្រោយ ដើម្បីរកកៅអីមួយទៅវគ្គផ្តាច់ ព្រ័ត្រជាមួយ បូរ៉ា ។

សម្រាប់ការប្រកួតមិត្តភាពអន្តរជាតិវិញ បូរ៉ា មិនទាន់បានបញ្ចេញមួយស្នៀតនៅឡើយទេ គ្រាដែលអ្នកប្រដាល់ថៃ ឈ្មោះ Yorth Sing វាយចេញតែមួយដៃ ប៉ុណ្ណោះ ធ្វើឲ្យ បូរ៉ា សន្លប់ក្រោកលែងរួចតែម្ដង ។ គួរបញ្ជាក់ថានេះជាអ្នក ប្រដាល់ខ្មែរទី២ហើយ ដែលចាញ់ Yorth Sing នោះ ។ អ្នកដែលចាញ់ដំបូងគេគឺ ម៉ន សាម៉េត ក្លឹប ការិយាល័យទី៥ កងទ័ពជើងគោក ។

ម៉ន រដ្ឋា ក្លឹបការិយាល័យទី៥ កងទ័ពជើងគោក ប្រកួតឈ្នះពិន្ទុអ្នកប្រដាល់ថៃ Meung May ដោយពិន្ទុទាំងលំបាក ក្នុង២ទឹកដំបូង រដ្ឋា ហាក់ដូចជាចាញ់ប្រៀប តែចាប់ពីទឹកទី៣ទៅ រដ្ឋា វាយបានយ៉ាងល្អ និងមានប្រៀបលើអ្នក ប្រដាល់ថៃទៀតផង ។ ចប់ទឹកទី៥ រដ្ឋា បានទទួលជ័យជំនះលើ Meung May ដោយពិន្ទុ ។

ឈិន ក្វាន់ង៉ុយ វីសនឹងចាញ់អ្នកប្រដាល់ថៃឈ្មោះ Roeur Rob ដោយអ្នកប្រដាល់ថៃរូបនេះស្រុតកម្លាំងកុំអី ង៉ុយបរា ជ័យបាត់ទៅហើយ ។ អ្នកប្រដាល់វាយ ស្នៀត ម៉ែចែករូបនេះ ត្រូវអ្នកប្រដាល់ថៃវាយឡើងវង្វេងនៅ៣ទឹកដំបូងតែ ២ទឹកចុងក្រោយ ង៉ុយ ស្ដារស្ថានភាពបានឡើងវិញរហូតបានស្មើពិន្ទុគ្នា ៕