បិទការប្រកួតជើងឯកជាតិកីឡាតេក្វាន់ដូ ឆ្នាំ ២០១៥ ខណៈក្លឹបកងរាជអាវុធហត្ថភ្នំពេញ ឈ្នះមេដាយច្រើនជាងគេ

ការប្រកួតកីឡាតេក្វាន់ដូជើងឯកថ្នាក់ជាតិ ឆ្នាំ ២០១៥ ត្រូវបានបញ្ចប់ដោយជោគជ័យកាលថ្ងៃទី២៥ ខែ កក្កដាម្សិលមិញនៅក្នុងសាលដំបូលទូកនៃពហុកីឡដ្ឋាន ជាតិដោយ មានការ អញ្ជើញចូលរួមប្រគល់ជ័យលាភីពីលោកព្រំ ប៊ុណ្ណយី អគ្គនាយករងកីឡា លោកឧត្តមសេនីយ៍ នួន ភា ប្រធានខេមរសហព័ន្ធតេក្វាន់ដូ ព្រម ទាំង លោកឧត្តមសេនីយ៍ រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ។

លោក រ័ត្ន ស្រ៊ាង បានមានប្រសាសន៍ថា កត្តាវិន័យ និងការលើកទឹកចិត្តបានធ្វើឲ្យកីឡាករតេក្វាន់ដូរបស់លោកដណ្ដើម បានមេដាយច្រើនលើសលប់បែបនេះ ។ ចំណែកលោក សៀ ទីន ដែលជាប្រធានក្លឹបតេក្វាន់ដូកងរាជអាវុធហត្ថរាជ ធានីភ្នំពេញបញ្ជាក់ថា ក្លឹបរបស់លោកបង្ហាត់ដោយលោកគ្រូ ជា ច័ន្ទឡា ទើបធ្វើឲ្យ កីឡាករទាំងអស់ទទួលលទ្ធផល ល្អបែបនេះ ក្នុងចំណោមកីឡាករមកចូលរួមប្រកួតចំនួន២៨រូបទទួលបានមេដាយទាំងអស់២៨គ្រឿងដែរក្នុងនោះមានមេដាយ មាសចំនួន ១១គ្រឿង មេដាយប្រាក់៩គ្រឿង និងមេដាយសំរិទ្ធ៨គ្រឿង ។

សម្រាប់ការប្រកួតទាំងតេក្វាន់ដូ W.T.F (World Taekwondo Federation) របស់សាធារណរដ្ឋកូរ៉េខាងត្បូង និងតេក្វាន់ដូស្ទី I.T.F (International Taekwondo Federation) របស់កូរ៉េខាងជើង ។

រីឯតេក្វាន់ដូ W.T.F មានក្លឹបចូលរួមចំនួន៣៨ ដែលក្នុងនោះមានកីឡាករចំនួន២៧១នាក់ និងកីឡាការិនីចំនួន១០៦នាក់ សរុបចំនួន៣៧៧ នាក់ ។ ចំពោះតេក្វាន់ -ដូស្ទីល I.T.F មានក្លឹបចូលរួមចំនួន១៤ក្លឹបដែលមានកីឡាករសរុបចំនួន២៩៣នាក់ ក្នុងនោះកីឡាករ២៥៣នាក់ និងកីឡាការិនីចំនួន៤០នាក់ ។

ចំពោះវិញ្ញាសាប្រកួតតេក្វាន់ដូស្ទីល W.T.F មាន២៧វិញ្ញាសាដែលមានទាំងវិញ្ញាសាសំដែងមេគុន (Poom Sae) និង វិញ្ញាសាប្រយុទ្ធ ។ វិញ្ញាសាមេគុនបែង ចែកតាមប្រភេទ អាយុ និងកម្រិតខ្សែក្រវាត់ ។ ចំពោះវិញ្ញាសាប្រយុទ្ធបែងចែកជាប្រភេទទម្ងន់ និងកម្រិតខ្សែក្រវាត់ ។ ឯតេក្វាន់ដូស្ទីល I.T.F មានចំនួន២០ វិញ្ញាសា ដែលមានវិញ្ញាសា សំដែងមេគុន(Kae-In-Jon Tul) មេគុនជាក្រុមបុរស-នារី (Kae-In-Jon Tuk-Gi) ។ វិញ្ញាសាប្រយុទ្ធឯកត្តជន (Kae-In-Jon-Mat-So-Gi) និងវិញ្ញាសាប្រយុទ្ធជាក្រុមបុរស (Dan-Che-Jon-Mat- So-Gi) ៕