កាំភ្លើងធំ Arsenal មិនទាន់ស្គាល់ពាក្យ “ចាញ់” តាំងពី Monaco លត់ ៣-១ក្នុងដី

ជ័យជម្នះ ៨ប្រកួតចុងក្រោយរបស់កាំភ្លើងធំ Arsenal ស្ថិតក្រោមការដឹកនាំរបស់អ្នកចាត់ការចាស់វស្សា Asene Wenger លេចចេញជារូបរាងឡើង បន្ទាប់ពីបំបាក់ម្ចាស់ផ្ទះ Burnley ដល់កីឡដ្ឋាន Turf Moor ក្នុងលទ្ធផល ១-០ ក្នុងក្របខណ្ឌ EPL។

៣ពិន្ទុបន្ថែមពី ការសុតចំគោលដៅ ៦ជើង តែធ្លាយសំណាញ់ទី បានតែ ១គ្រាប់របស់កូនក្រុមលោក Wenger Aaron Ramsey នៅនាទីទី ១២ ជួយឲ្យកាំភ្លើងធំ មាន ៦៦ពិន្ទុក្នុងដៃ និង ឈរនៅលេខរៀងទី ២បន្ទាប់ពីតោខៀវ ក្រុមកំពូលតារាងរបស់ Jose Mourinho។

Arsenal បន្តភាពខ្លាំងរបស់ខ្លួនរហូត ឈ្នះ ៨ប្រកួតជាប់គ្នា បន្ទាប់ពីចាញ់ ក្រុមខ្លាំងបារាំង Monaco ក្នុងដីខ្លួនឯង រហូតដល់ ៣-១ ក្នុងក្របខណ្ឌ Champion League វគ្គ ១៦ក្រុមចុងក្រោយ កាលពីថ្ងៃទី ២៥ កុម្ភៈ កន្លងទៅ។

ថ្មីៗនេះ ក្រោយពីឃើញទម្រង់លេងដ៏ល្អរបស់ Arsenal អ្នកចាត់ការក្រុមតោខៀវ លោក Jose Mourinho ក៏បានសរសើរក្រុមកំពុងឡើងជើងរបស់ Arsene Wenger ដែរថា មានតែ កាំភ្លើងធំ Arsenal មួយទេ ដែលអាចប្រជែងពានកំពូលរបស់អង់គ្លេស (EPL) ជាមួយក្រុមលោកបាន។