Costa ៖ រងរបួស មិនអាចជួយអេស្ប៉ាញបានទេ

កីឡាករខ្សែប្រយុទ្ធដ៏លេចធ្លោ Diego Costa នឹងមិនអាចជួយក្រុមជម្រើសជាតិគោជល់អេស្ប៉ាញបានទេ ដោយសារតែមានបញ្ហារបួសពេលជួយឲ្យ Chelsea ឈ្នះ ក្រុមម្ចាស់ផ្ទះ Hull City ៣-២ នៅ Premier League កាល ពីសប្តាហ៍មុន ។

នេះមានន័យថា តារាឆ្នើមដើមកំណើតប្រេស៊ីល សញ្ជាតិអេស្ប៉ាញរូបនេះមិនអាចជួយអេស្ប៉ាញពេលជួបប្រកួតទល់នឹងក្រុមជម្រើសជាតិអ៊ុយក្រែនក្នុងព្រឹត្តិការណ៍ ជម្រុះពានរង្វាន់ប្រចាំទ្វីបអឺរ៉ុប UEFA Euro 2016 នៅបារាំងនារាត្រីថ្ងៃទី២៧ខែមីនានិងមិត្តភាពអន្តរជាតិទល់នឹងក្រុមជម្រើសជាតិទឹកក្រូចហូឡង់នាពេលបន្ទាប់។

តារាឆ្នើមវ័យ២៦ បានកំពុងតែនាំមុខគេនៅលើកំពូល តារាង Premier League ក្នុងនាមជាកីឡាករស៊ុតបញ្ចូលទីបាន២០គ្រាប់ច្រើនជាងគេក្នុងរដូវកាល ឆ្នាំ ២០១៤ -២០១៥នេះ ដែលត្រូវប្តូរចេញនៅនាទី៧៥ពីការជំនួសមកវិញដោយមិត្ត រួមក្រុម Loic Remy កាលពីរាត្រីថ្ងៃអាទិត្យ តែអតីតខ្សែប្រយុទ្ធក្លឹប Atletico Madrid រូបនេះប្រហែលជាមិនអវត្តមាន ក្នុងក្លឹបតោខៀវ Chelsea នោះទេ ក្នុងគ្រាដែលរបួសហើមសរសៃពួរនេះអាចជាសះស្បើយទាន់ពេលវេលា ។

ខ្សែប្រយុទ្ធ Juanmi ដែលត្រូវជំនួស Costa

ដើម្បីជំនួសកន្លែងរបស់ Diego Costa គ្រូបង្វឹកក្រុម ជម្រើសជាតិអេស្ប៉ាញលោក Vicente del Bosque សម្រេចជ្រើសរកខ្សែប្រយុទ្ធក្លឹបអេស្ប៉ាញដូចគ្នា មកពីក្លឹប Malaga វ័យ២១ឆ្នាំ Juanmi មកជំនួសវិញ ដើម្បីចាប់ដៃគូជាមួយ នឹង Torres, Mata និង David Silva ជាដើម ៕