តោកំណាចអង់គ្លេស អាចស៊ីលីទុយអានី បានឬអត់យប់នេះ?

ក្រុមបាល់ទាត់ជម្រើសជាតិអង់គ្លេស នឹងត្រូវបើកទ្វារកីឡដ្ឋានជាតិ Wembley ស្វាគមន៍ក្រុមលីទុយអានី សម្រាប់ការប្រកួតវគ្គជម្រុះពានរង្វាន់ UEFA EURO 2016 នៅពូល E នាវេលាម៉ោង២:៤៥នាទីរំលងអាធ្រាត្រយប់នេះ។

តោកំណាចអង់គ្លេស កំពុងតែឡើងជើងមែនទែន ខណៈដែល៤ប្រកួត នៅពូល E កន្លងមក ក្រុមខ្លាំងមួយនេះ មិនទាន់ស្គាល់ពាក្យថាចាញ់ ឬក៏ស្មើទេ ពោលគឺ ៤ប្រកួត ឈ្នះទាំង៤ ក្នុងនោះឈ្នះក្រៅដី២ប្រកួត និងក្នុងដី២ប្រកួត។

ដូច្នេះយប់នេះ អង់គ្លេសនឹងកាន់តែមានទំនុកចិត្ត ដើម្បីយក៣ពិន្ទុបន្ថែមទៀត ព្រោះលេងនៅក្នុងទឹកដីខ្លួនឯង។

ប្រវត្តិជួបគ្នា៖

នេះជាលើកទី១ហើយ ដែលក្រុមទាំង២ ត្រូវជួបគ្នានៅពានអឺរ៉ុប ក្នុងឈុតធំ។ អង់គ្លេស និងលីទុយអានី ធ្លាប់ជួបគ្នា ៧ដងនៅឈុត U-21 ក្នុងការប្រកួតជម្រុះពាន Euro ហើយក្នុងនោះ ជាលទ្ធផល អង់គ្លេសឈ្នះ៥ និងស្មើ២។ ដូច្នេះសរុបមក លីទុយអានី ពុំដែលមានប្រវត្តិយកឈ្នះអង់គ្លេសម្ដងណាឡើយ។

ការពិតមួយចំនួន៖

អង់គ្លេស គឺជាក្រុមមួយ ក្នុងចំណោមក្រុម៣ផ្សេងទៀត ដែលរក្សាកំណត់ត្រាឈ្នះ ១០០% ក្នុងការប្រកួតវគ្គជម្រុះ UEFA EURO 2016 កន្លងមក។ ៣ក្រុម ដែលឈ្នះទាំងអស់ដូចអង់គ្លេសដែរនោះគឺ ស្លូវ៉ាគី អ៊ីស្រាអែល និង សាធារណរដ្ឋឆេក។

អង់គ្លេស គឺជាក្រុមដែលមិនដែលចាញ់ ក្នុងការប្រកួតវគ្គជម្រុះពានរង្វាន់ EURO និង FIFA World Cup ២៣លើកចុងក្រោយ ខណៈដែលលីទុយអានីវិញ ឈ្នះតែ២ដងប៉ុណ្ណោះ ក្នុងការប្រកួតក្រៅដី ១០ប្រកួតចុងក្រោយ ខណៈដែល២ប្រកួតនោះ ពួកគេបានយកឈ្នះក្រុមអន់ សាន់ម៉ារីណូ និង លិចធិនស្តែន៕