Falcao អាច​នឹង​ចាក​ចេញ​ពី Man Utd ទៅ​លេង​ឲ្យ Valencia នៅ​៤ខែ​ខាងមុខ

បន្ទាប់ពីការចាប់ផ្តើមលេង នៅទឹកដីថ្មីនៃកីឡដ្ឋាន Old Trafford មិនសូវសមប្រកបមួយរយៈមក កីឡាករខ្សែប្រយុទ្ធជួរ មុខជនជាតិ កូឡុំប៊ី Radamel Falcao អាចនឹងបង្ខំចិត្តចាកចេញពីទឹកដីអង់គ្លេស ទៅលេងឲ្យក្លឹបអេស្ប៉ាញ Valencia វិញក្នុងខែកក្កដា ឆ្នាំ២០១៥ខាងមុខ ។

ទីភ្នាក់ងារគ្រប់គ្រងកីឡាករ Jorge Mendes បានថ្លែងប្រាប់គេហទំព័រ Mirror ថា “ថ្នាក់ដឹកនាំក្លឹបលំដាប់លេខ១ អង់ គ្លេសនឹងជួបពិភាក្សាជាមួយនឹងគណៈ គ្រប់គ្រងក្លឹប Valencia ជុំវិញការផ្លាស់ទ្រនំរបស់ខ្សែប្រយុទ្ធដែលមានតម្លៃពល កម្ម ២៦៥០០០ផោនក្នុង ១សប្តាហ៍ Falcao ក្នុងសប្តាហ៍នេះ នៅមុនពេល រដូវកាលដោះដូរ កីឡាករលើកទី២ប្រចាំឆ្នាំ ២០១៥នឹងបើកទ្វារជាផ្លូវការនាខែកក្កដាខាងមុខ” ។

តែយ៉ាងណាក៏ដោយ តារាឆ្នើមវ័យ២៩ឆ្នាំដែលបានខកខាន World Cup ឆ្នាំ២០១៤នៅប្រេស៊ីលដោយសារតែបញ្ហា របួសជង្គង់ធ្ងន់ធ្ងរ បានចាប់ផ្តើមនៅក្នុង
ក្លឹបថ្មី Man Utd ទាំងត្រដាបត្រដួសបំផុតក្នុងនាមជាកីឡាករខ្ចីជើង ១រដូវកាល ពេញពីក្លឹបបារាំង AS Monaco ដូចទៅនឹងមិត្តរួមក្រុមខ្សែបម្រើប្រយុទ្ធ Angel Di Maria ក្រោយពេលចាកចេញពីក្លឹប ស្តេចស Real Madrid របស់អេស្ប៉ាញ ។

Falcao រកមិនបាន ១គ្រាប់សោះក្នុងចំណោម៤ប្រកួតចុងក្រោយ ដែលគាត់បានចូលលេងក្នុងជម្រើស១១នាក់ដំបូង ប៉ុន្តែបានជួយឲ្យបិសាចក្រហម ឈានមក ដល់វគ្គ៨ក្រុមចុងក្រោយនៃពានលំដាប់ទី២អង់គ្លេស FA Cup ដោយបាន ទម្លាក់គូប្រជែង Preston ដើម្បីឡើងទៅជួបកាំភ្លើងធំ Arsenal នៅរាត្រីថ្ងៃទី០៩ ខែមីនា ឆ្នាំ២០១៥ខាងមុខ ។

ក្រៅពី Falcao និង Di Maria ខ្សែប្រយុទ្ធ Robin van Persie ក៏បានធ្លាក់ទម្រង់លេងផងដែរ ហើយក៏អាចចាកចេញពីក្លឹបផងដែរ ខណៈដែលអ្នកចាំទីដៃទី ១ ជនជាតិអេស្ប៉ាញ David De Gea កំពុងតែត្រូវបានក្លឹប Real Madrid ចែចូវផង ដែរ ដើម្បីយកមកជំនួសកៅអីអ្នកចាំទី Iker Casillas ដែលមានវ័យកាន់តែ ចាស់ហើយនោះ ៕