អ្នកលេងក្បាច់គុនបុរាណខ្មែរ ចាន់ រតនា នឹងតំណាងឲ្យប្រទេសកម្ពុជាចូលរួមប្រកួតក្នុងព្រឹត្តិការណ៍កីឡាគុនចម្រុះក្នុងទ្រុង One FC: Age of Champion នាថ្ងៃទី១៣ ខែមីនា ឆ្នាំ២០១៥ នៅទីក្រុងកូឡាឡាំពួរ ប្រទេសម៉ាឡេស៊ី។ តាមការឲ្យដឹងពីកញ្ញា Tammy Chan ប្រធានទំនាក់ទំនងសាធារណៈរបស់ស្ថាប័ន One Fighting Championship បានប្រាប់ថា កីឡាករកម្ពុជា ចាន់ រតនា ត្រូវបានផ្គូផ្គងឲ្យប្រកួតនឹងកីឡាករហ្វីលីពីនឈ្មោះ Ramon Gonzalex។ កីឡាករហ្វីលីពីនរូបនេះមិនធ្លាប់បានឆ្លងកាត់ការប្រកួតក្នុងកម្មវិធី One FC ឡើយ។
កីឡាករ ចាន់ រតនា
កញ្ញាបាននិយាយថា ៖«Ramon អត់មានប្រវត្តិប្រកួតទេ ព្រោះគេមិនធ្លាប់វ៉ៃក្នុងទ្រុងរបស់កម្មវិធីប្រដាល់គុនចម្រុះ One FC ឡើយ»។ ទោះបីជាយ៉ាងណាកញ្ញាមិនបានបញ្ជាក់ថាតើកីឡាករហ្វីលីពីនម្នាក់នេះធ្លាប់បានប្រកួតក្នុងកម្មវិធីប្រដាល់គុនចម្រុះនៅកម្មវិធីដទៃ ព្រោះនៅប្រទេសម៉ាឡេស៊ីមានកម្មវិធីប្រដាល់ក្នុងទ្រុងផ្សេងទៀត។ បុរសប្រពន្ធបារាំងរូបនេះជាកីឡាករដែលធ្លាប់បានប្រកួតក្បាច់គុនខ្មែរបុរាណច្រើនដង និងធ្លាប់បានប្រកួតក្នុងទ្រុង One FC ម្តងកាលពីថ្ងៃទី១៣ ខែកញ្ញា ឆ្នាំ២០១៤ ប៉ុន្តែជាការប្រកួតនឹងកីឡាកររួមជាតិដែលពេលនោះត្រូវបានចៅក្រមកាត់ឲ្យចាញ់កីឡាករ សំអាង ឌុន ព្រោះការប្រកួតបំពានលើបច្ចេកទេស។ ការប្រកួតរបស់តារាល្បុក្កតោកម្ពុជាម្នាក់នេះនៅថ្ងៃទី១៣ ខែមីនា ធ្វើឡើង បន្ទាប់ពីបញ្ចប់ការហ្វឹកហាត់រយៈពេលមួយខែពេញនៅប្រទេសថៃ។ ចាន់ រតនា និង សំអាង ឌុន ទើបតែចេញទៅហ្វឹកហាត់នៅក្លិប Tiger Mauy Thai ស្ថិតនៅខេត្ត Phuket ប្រទេសថៃកាលពីថ្ងៃទី២៩ ខែមករា កន្លងទៅថ្មីៗនេះ។ នៅក្លិបដែលសម្ភារៈហ្វឹកហាត់ទំនើប និងស្តង់ដារអន្តរជាតិ កីឡាករទាំងពីរនាក់នឹងចំណាយពេលហ្វឹកហាត់រយៈពេលមួយខែពេញក្រោមការឧបត្ថម្ភទាំងស្រុងពីណាហ្គាវើល។ ចាប់តាំងពីវិស័យក្បាច់គុនចម្រុះលេចមុខនៅប្រទេសកម្ពុជាមក កីឡាករកម្ពុជាជាច្រើននាក់មកហើយបានចេញទៅប្រកួតនៅក្រៅប្រទេសដូចជា ឡុង សុភី, ឃីម ឌីម៉ា, តក់ សោភ័ណ្ឌ, សំ ថារ័ត្ន, ចាន់ ហេង, ពេជ្រ សីហា, សរ សី ជាដើម ប៉ុន្តែមិនទាន់មានកីឡាករណាម្នាក់ស្គាល់ពាក្យ ឈ្នះនៅឡើយទេ៕ 
ចាន់ រតនា (ខោខៀវ) ប្រកួតនឹង សំអាង ឌុន (ខោលឿងលាយខ្មៅ)
Post a Comment