ក្រុម Manchester City នឹងដកខ្សែប្រយុទ្ធ Steven Jovetic ចេញ ហើយដាក់ជំនួសដោយខ្សែប្រយុទ្ធទើបតែទិញបាន Wilfried Bony នៅក្នុងបញ្ជីឈ្មោះកីឡាករសម្រាប់ការប្រកួតពានរង្វាន់ធំជាងគេនៅអឺរ៉ុប UEFA Champions League ខាងមុខ។
ក្រុម Man City នឹងត្រូវប៉ះជាមួយក្រុម Barcelona ក្នុងជើងទី១ វគ្គ១៦ក្រុមចុងក្រោយនៃពានរង្វាន់ Champions League នៅថ្ងៃទី២៤ ខែកុម្ភៈក្នុងដីខ្លួនឯង ហើយក៏បានរើសកីឡាករដើម្បីចូលលេងរួចរាល់អស់ហើយដែរ។ ប៉ុន្តែរឿងដែលនឹងស្មានមិនដល់នោះ គឺលោក Manuel Pellegrini អ្នកចាត់ការក្រុមមេឃខៀវនេះ បានដកកីឡាករ Jovetic ចេញហើយដាក់កីឡាករចំណូលថ្មី Bony ចូលទៅវិញ។ ហេតុផលដែលមានការផ្លាស់ប្ដូរដូច្នេះគឺបណ្ដាលមកពីក្រុមមួយនេះរងពិន័យពី UEFA មិនឱ្យមានកីឡាករបរទេសនៅក្នុងក្រុមនេះលើសពី១៦នាក់នោះទេពេលទៅលេងនៅក្នុងពានរង្វាន់នេះ (ជាធម្មតាច្បាប់ចែងមកអាចមាន១៧នាក់) ទើបតម្រូវឱ្យអ្នកចាត់ការវ័យ៦១ឆ្នាំខាងលើពិចារណាដកម្នាក់ចេញ។
ខ្សែប្រយុទ្ធ Steven Jovetic
ខ្សែប្រយុទ្ធ Wilfried Bony
ខ្សែប្រយុទ្ធជម្រើសជាតិម៉ុងតេណេក្រូវ័យ២៥ឆ្នាំខាងលើនេះទើបតែផ្លាស់ពី Fiorentina មក Man City នេះនៅឆ្នាំ២០១៣ទេក្នុងតម្លៃខ្លួន២២លានផោន ហើយក្រោយពីផ្លាស់មករូបគេមានរបួសជាប់ជានិច្ច និងរកគ្រាប់បាល់ទើបតែបាន១១គ្រាប់គត់។ ចំណែកឯកីឡាករ Wilfried Bony វិញគឺលោក Pellegrini ទើបតែទិញយកពី Swansea នៅខែមករាមុននេះទេ ក្នុងតម្លៃខ្លួន២៥លានផោន ៕
Post a Comment