ឃីម បូរ៉ា សង្ឃឹមបាន ៣ពិន្ទុ នៅថ្ងៃបើកឆាក ខ្សែក្រវាត់ K-Cement

ព្រឹត្តិការណ៍ប្រកួត ប្រដាល់ដណ្ដើម ខ្សែក្រវាត់ទម្ងន់ ៦០គីឡូក្រាម ក្រុមហ៊ុនស៊ីម៉ងត៍ K-Cement នៅសង្វៀនទូរ ទស្សន៍អាស៊ីអាគ្នេយ៍ (SEA-TV) នាថ្ងៃសៅរ៍ ទី១៤ ខែកុម្ភៈ ឆ្នាំ២០១៥ ក្រោមការសហការ ជាមួយសហព័ន្ធកីឡា ប្រដាល់កម្ពុជា ។

កីទ្បាករ ជ័យ ប៊ុនសង់ (ឆ្វេង) ប្រកួតជាមួយនឹងកីទ្បាករ ឃីម បូរ៉ា (ស្តំា)

អ្នកប្រដាល់ដែលចូលរួម ប្រកួតមានចំនួន ៨នាក់គឺ មាស ច័ន្ទមាន មកពីសមាគម ក្រសួងការពារជាតិ, ឃីម បូរ៉ា ក្លឹបរស្មីភូមិគាប ខេត្តបន្ទាយមានជ័យ, ជ័យ ប៊ុនសង់ ក្លឹបគីសែនមានរិទ្ធិ, លាស់ យីន ក្លឹបបង្ក្រាបគ្រឿងញៀន, ថុល មករា ក្លឹបឃ្លាំងមឿងកីឡា, សូត្រ ប៊ុនធី ក្លឹបបក្សីស្លាបដែក, ឱម សំរេច ក្លឹបទ័ពឆ័ត្រយោង៩១១ និង ណាម ម៉ូរ៉ាក់ ក្លឹបពន្លឺសាមគ្គី ខេត្តបាត់ដំបង ។

សម្រាប់ថ្ងៃទី១៤ ខែកុម្ភៈ ដែលជាថ្ងៃបើកដំបូង មាន៤គូ គឺអ្នកប្រដាល់ទាំង ៨រូប ប្រកួតទាំងអស់គ្នា តែម្ដង ខណៈអ្នកប្រដាល់ ឱម សំរេច ប្រកួតជាមួយអ្នកប្រ ដាល់ ណាម ម៉ូរ៉ាក់ និង ថុល មករា ប្រកួតជាមួយ អ្នកប្រដាល់ មាស ច័ន្ទមាន ជ័យ ប៊ុនសង់ ប្រកួតជាមួយ ឃីម បូរ៉ា និងអ្នកប្រដាល់ សូត្រ ប៊ុនធី ប្រកួតជាមួយ អ្នកប្រដាល់ លាស់ យីន ក្លឹបបង្ក្រាបគ្រឿងញៀន ។

ការប្រកួតគឺអនុវត្តន៍ តាមរូបមន្តវិលជុំ ដោយអ្នកប្រដាល់ទាំង ៨រូបត្រូវជួបគ្នា ទាំងអស់ដែលជុំទី១នេះ ជម្រុះ២នាក់ចេញ នៅសល់ ៦នាក់ពួកគេ នឹងប្រកួតនៅជុំ ទី២ ដោយត្រូវជួបគ្នា ជាថ្មីឡើងវិញ ដើម្បីទម្លាក់ ២នាក់ទៀតនៅសល់ ៤នាក់ទើបប្រកួតជុំទី៣ ដើម្បីទម្លាក់ ២នាក់ទៀត ទុក ២នាក់សម្រាប់ប្រកួតផ្ដាច់ព្រ័ត្រ ។

ការប្រកួតជម្រុះទាំង ៣ជុំនេះ គឺគិតពិន្ទុដោយអ្នកឈ្នះបាន ៣ពិន្ទុ ចាញ់បាន ១ពិន្ទុ និងបោះបង់ការប្រកួតបាន ០ពិន្ទុ ។ ការប្រកួតក្នុងជុំទាំង៣ នេះប្រាក់តម្លៃខ្លួន សម្រាប់អ្នកឈ្នះ ១៥០ដុល្លារ អ្នកចាញ់ ១០០ដុល្លារ ។ ចំពោះអ្នកដែលដណ្ដើម បានជើងឯក នឹងទទួលបានខ្សែក្រវាត់ ១ពានធំ ១ និងថវិកាអម ២០.០០០.០០០រៀល និងចំណាត់ថ្នាក់លេខ២ បានពានតូច១ និងថវិការអម ១០.០០០.០០០រៀល ៕