មូលហេតុអ្វីខ្លះ ដែលនាំឲ្យ បឹងកេត ចែកផ្លូវពីគ្រូបង្វឹក ជនជាតិអូស្ដ្រាលី John Mcglynn

ពេលនេះក្លឹបបាល់ទាត់ ជួរមុខនៃលីកកំពូលកម្ពុជា បឹងកេតអង្គរ បានសម្រេចចែកផ្លូវ ជាមួយគ្រូបង្វឹកជនជាតិ អូស្ដ្រាលីលោក John Mcglynn ហើយក្រោយដឹកនាំ ក្លឹបអស់រយៈពេល ជិតកន្លះឆ្នាំ បានត្រឹមហាលអាវ នៅវគ្គជម្រុះ៨ ក្រុមចុងក្រោយ នៃពានរង្វាន់បាល់ទាត់ Hun Sen-Cup លើកទី៩ កាលពីថ្មីៗ កន្លងទៅ ។

កាលពីល្ងាចថ្ងៃទី០៤ កុម្ភៈម្សិលមិញក្លឹប បឹងកេតអង្គរ ដែលទើបប្ដូរឈ្មោះ ពីក្រុមចម្ការកៅស៊ូបឹងកេត បានសរសេរសេច ក្ដីជូនដំណឹងមួយ បង្ហោះលើ Facebook ផ្ទាល់ខ្លួនថា “ក្លឹបបឹងកេតអង្គរ បានសម្រេចចែកផ្លូវ ជាមួយគ្រូបង្វឹក ជនជាតិអូស្ត្រាលី John Mcglynn ហើយ ។ ក្លឹបសូមអរគុណ ចំពោះកិច្ចខិតខំប្រឹងប្រែង អស់ពីកម្លាំងកាយចិត្ត របស់លោកសម្រាប់ក្លឹបមួយ រយៈមកនេះ ហើយក្លឹបសូមជូនពរ ឲ្យលោកជួបតែជោគជ័យ នាពេលខាងមុខ” ។ តើមានមូលហេតុអ្វីខ្លះ ទើបធ្វើឲ្យក្លឹបបឹងកេត សម្រេចចិត្តដូច្នេះ ស្របពេលការប្រកួត លីកកំពូលខិតជិតចូល មកដល់ទៅហើយនោះ?

លោក បែ មករា អ្នកចាត់ការទូទៅ ក្លឹបបឹងកេតអង្គរ បានថ្លែងប្រាប់គេហទំព័រ Looking TODAY នៅព្រឹកថ្ងៃទី០៥ កុម្ភៈនេះថា “នេះគឺជារឿងធម្មតាទេ សម្រាប់ក្លឹបបាល់ទាត់ នៅលើពិភពលោក ។ ក្លឹបមានសិទ្ធិដោះ ដូគ្រូបង្វឹកប្រសិនបើ គ្រូបង្វឹកនោះមិនអាច សម្រេចបំណងតាមគោលដៅ ក្លឹបចង់បាន” ។

អ្នកចាត់ការទូទៅជួយឲ្យក្លឹបបឹងកេត លើកពានលីកកំពូលកម្ពុជា កាលពីឆ្នាំ ២០១២នេះបានបន្ដថា “សម្រាប់ក្លឹបបឹងកេត ក៏ដូច្នេះដែរ យើងបាននិយាយគ្នា រួចហើយ មុននឹងចុះកិច្ចព្រមព្រៀង ដឹកនាំក្លឹបបឹងកេត ហើយលោក John Mcglynn ក៏បានយល់ព្រម តាមគោលការណ៍ ក្លឹបផងដែរប៉ុន្ដែដល់ពេលលោកដឹកនាំក្លឹប មិនទទួលបានលទ្ធផលល្អ គណៈកម្មការប្រតិបត្តិក្លឹប ក៏ពិចារណា ហើយសម្រេចបញ្ចប់កិច្ចសន្យា ដើម្បីរកគ្រូបង្វឹកថ្មី មកជំនួសលោក John Mcglynn តែម្ដង” ។

លោកបានបញ្ជាក់ថា ក្រោមការសម្រេចចែកផ្លូវគ្នា រវាងក្លឹបបឹងកេតអង្គរ និងគ្រូបង្វឹកជនជាតិ អូស្ដ្រាលី John Mcglynn នេះគឺមិនមានភាព អវិជ្ជមានអ្វីនោះទេ ព្រោះក្លឹប និងលោក John Mcglynn សុទ្ធតែបាននិយាយគ្នា រួចតាំងពីខាងដើម មកម្ល៉េះ ។ ដូច្នេះទាំងក្លឹប និងលោក John សុទ្ធតែព្រមព្រៀងគ្នា រំលាយកិច្ចសន្យា ដែលបង្កើតឡើង កាលពីខែកញ្ញា ឆ្នាំ២០១៤ កន្លងទៅដូចគ្នា ។

គួរបញ្ជាក់ថា ការហាលអាវត្រឹមវគ្គ ១/៤ ផ្ដាច់ព្រ័ត្រ នៃពានរង្វាន់ Hun Sen-Cup 2015 ក្រោមការដឹកនាំ ផ្ទាល់ពីសំណាក់លោក John Mcglynnនេះគឺដោយសារប្រកួត ចាញ់ស្ពឹកមុខក្រោមថ្វីជើង ក្រុមណាហ្គាវើល ក្នុងលទ្ធផល ៣-០ ។ ប៉ុន្ដែពេលនេះគណៈកម្មការ ប្រតិបត្តិក្លឹបក៏កំពុង តែស្វែងរកគ្រូបង្វឹកថ្មី មកជំនួសកៅអីលោក John Mcglynn ផងដែរ ដើម្បីត្រៀមប្រកួត ក្នុងព្រឹត្តិការណ៍បាល់ទាត់ លីកកំពូលកម្ពុជា ដែលនឹងចាប់ផ្ដើម នៅខែមីនា ខាងមុខនេះ ៕