កីឡាករប្រណាំងរថយន្ត Fernando Alonso មានសុទិដ្ឋិនិយម និងជំនឿចិត្តយ៉ាងមុតមាំថា ក្រុម McLaren របស់លោក នឹងមាននូវយុទ្ធនាការដ៏ជោគជ័យមួយសម្រាប់រដូវកាលប្រណាំងរថយន្ត F1ឆ្នាំ២០១៥នេះ។
សូមបញ្ជាក់ថា យុទ្ធនាការថ្មីនៃការប្រណាំងរថយន្ត F1 នឹងចាប់ដំណើរការនៅថ្ងៃទី១៥ខែមីនាខាងមុខនេះ នៅក្នុងប្រទេសអូស្ត្រាលី ហើយក្រុម McLaren នឹងមកដល់សម្រាប់ការបើកឆាករដូវកាលនេះ ជាមួយនឹងរថយន្ត Honda ជាលើកដំបូង ចាប់តាំងពីឆ្នាំ១៩៩២មក។
ការចាប់ដៃគូរវាងក្រុម McLaren-Hondaបានធ្វើឲ្យកីឡាករប្រណាំងរបស់ក្រុមមួយនេះ ឈ្នះជើងឯក៤លើកជាប់ៗ ចាប់ពីឆ្នាំ១៩៨៨ រហូតដល់ឆ្នាំ១៩៩១ ហើយកីឡាករ Alonsoដែលបាននិយាយរួមគ្នាជាមួយកីឡាករ Jenson Button នៅក្នុងទីក្រុងតូក្យូ ប្រទេសជប៉ុនកាលពីថ្ងៃអង្គារនោះ មានជំនឿចិត្តយ៉ាងមុតមាំថា ថ្ងៃដ៏ល្បីរន្ទឺ នឹងវិលត្រឡប់មកកាន់ក្រុមរបស់លោកវិញជាក់ជាពុំខានឡើយ។
កីឡាករសញ្ជាតិអេស្ប៉ាញម្នាក់នេះ ដែលបានបង្ហាញរថយន្តថ្មីរបស់លោករួមគ្នាជាមួយមិត្តរួមក្រុម Button ទៅដល់សារព័ត៌មានជប៉ុនបាននិយាយថាយើងទាំង អស់គ្នា បានត្រៀមខ្លួនរួចជាស្រេច សម្រាប់ជោគជ័យទាំងនេះ។ លោកបានបន្តទៀតថា នេះគឺជាការងារដំបូងដែលយើងត្រូវធ្វើឲ្យសម្រេច ជាមួយក្រុមដែលមានការរួមសាមគ្គីពីក្រុមហ៊ុន Honda៕
Post a Comment