អ្នកចាត់ការរបស់ក្រុមជម្រើសជាតិរដ្ឋវែលស៍ លោក Chris Coleman បាននិយាយយ៉ាងទទូចថា កីឡាករ Gareth Bale មានសមត្ថភាពគ្រប់គ្រាន់ក្នុងការលាងជម្រះមន្ទិលសង្ស័យទាំងឡាយលើទម្រង់លេងរបស់គាត់ឲ្យក្រុម Real Madrid។
ក្រុមជម្រើសជាតិរដ្ឋវែលស៍ នឹងចាប់ផ្តើមយុទ្ធនាការទាត់ជម្រុះ Euro 2016 របស់ពួកគេឡើងវិញនៅខែក្រោយនេះជាមួយនឹងប្រវត្តិលេងមិនដែលចាញ់ ក្រោយលេងបាន៤ប្រកួត និងឈរនៅលេខ២លើតារាងពូលរបស់ពួកគេ ប៉ុន្តែកីឡាករ Bale បានក្លាយជាកម្មវត្ថុមួយនៃមន្ទិលសង្ស័យ ដោយសារតែលេងមិនសូវកើត ខណៈដែលក្រុមឡើងការពារតំណែងជើងឯកអឺរ៉ុប Real Madrid ធ្លាក់ទម្រង់លេងនោះ។
ខ្សែប្រយុទ្ធដ៏មុតស្រួចម្នាក់នេះ រងការចោទប្រកាន់ជាច្រើនលើកច្រើនសាថា ជាកីឡាករអាត្មានិយម មិនចេះចែកបាល់លេងឲ្យមិត្តរួមក្រុមដែលលេងខ្លាំងជាងខ្លួន ដូចជាកីឡាករ Cristiano Ronaldo ជាដើម ជាហេតុធ្វើឲ្យក្រុមរបស់ពួកគេ លេងអន់បែបនេះ។
ជាក់ស្តែងក្រោយពីមានបរាជ័យដ៏អាម៉ាស់មុខ០-៤របស់ក្រុម Real Madrid ជាមួយក្រុម Atletico Madrid កាលពីចុងសប្តាហ៍មុន កីឡាករតម្លៃខ្លួនឯតទគ្គកម្មពិភពលោក៨៥.៣លានផោនម្នាក់នេះ ត្រូវសារព័ត៌មានក្នុងស្រុកវាយប្រហារចំៗមកលើទម្រង់លេងរបស់គាត់។
ប៉ុន្តែទោះបីជាយ៉ាងណាក៏ដោយ លោក Coleman បានអះអាងថា មនុស្សរបស់គាត់ម្នាក់នេះ នឹងអាចបង្កព្យុះភ្លៀងនៅក្នុងក្រុម Real Madrid ជាក់ជាពុំខានឡើយ ដោយគាត់បានធ្វើការបញ្ជាក់ដល់កាសែត Press Association Sport ថា គាត់ជាគឺជាកីឡាករមានតម្លៃខ្លួនខ្ពស់បំផុត ដូច្នេះហើយ គាត់នឹងគ្មានបញ្ហានោះទេ ចំពោះការទិះតៀនគ្មានឫសគល់ដូចខាងលើ៕
Post a Comment