ប្រធានក្រុម Real Madrid អ្នកចាំទី Iker Casillas បាននិយាយថាខ្សែបម្រើ Isco ទៅថ្ងៃអនាគតនឹងអាចក្លាយជាកីឡាករសំខាន់ម្នាក់នៅក្នុងលីកលំដាប់កំពូលអេស្ប៉ាញ។
កីឡាករវ័យ៣៣ឆ្នាំរូបនេះបាននិយាយក្រោយពី Real Madrid បានយកឈ្នះក្រុម Elche កាលពីយប់មិញនេះថា៖ “Isco នឹងក្លាយជាកីឡាករសំខាន់ម្នាក់នៅអេស្ប៉ាញក្នុងពេលប៉ុន្មានឆ្នាំខាងមុខនេះ។ យើងមានទំនុកចិត្តលើគាត់ ប៉ុន្តែគាត់ខ្លួនឯងក៏ត្រូវតែប្រយ័ត្នផងដែរ ត្រូវតាំងចិត្តឱ្យមូលទៅលើការប្រកួត និងឈានឡើងពីមួយដំណាក់ទៅមួយដំណាក់ដោយមានភាពជឿជាក់បំផុត”។
ការប្រកួតយប់មិញនេះដែរ ជាប្រកួតទី៥០០របស់អ្នកចាំទី Casillas នៅក្លិបស្ដេចស Real Madrid ខណៈដែល៥០០ប្រកួតនេះ គឺឈ្នះ៣២៨ ស្មើ៨៥ និងចាញ់៨៧។
Isco ជាកីឡាករដែល Real Madrid ទិញពី Malaga នៅឆ្នាំ២០១៣ ក្នុងតម្លៃខ្លួន៣០លានអឺរ៉ូ (៣៤លានដុល្លារអាមេរិក) ហើយរដូវកាលនេះ រូបគេបានបង្ហាញទម្រង់លេងល្អមែនទែនដែលអាចជាប់ជម្រើស១១នាក់ដំបូងរបស់លោក Carlos Ancelotti សឹងតែគ្រប់ប្រកួតតែម្ដង។ ខ្សែបម្រើប្រយុទ្ធវ័យ២២ឆ្នាំរូបនេះក៏ជាកីឡាករដែលជាប់ជម្រើសជាតិអេស្ប៉ាញតាំងពី U16៕
Post a Comment