ប្រជាជនកូឌីវ័ររាប់លាននាក់ ណែនណាន់តាន់តាប់គ្រប់ផ្លូវទាំងអស់ ក្នុងរដ្ឋធានី Abidjan កាលពីថ្ងៃចន្ទម្សិលមិញ បានចេញមកចាំទទួលស្វាគមន៍ក្រុមបាល់ទាត់ជម្រើសជាតិរបស់ពួកគេ ដែលត្រឡប់មកកាន់មាតុភូមិវិញ បន្ទាប់ពីឈ្នះពានរង្វាន់ CAF Africa Cup of Nations។
ជ័យជម្នះ ៩-៨ ដោយបាល់ប៉េណាល់ទី ឈ្នះលើក្រុមហ្គាណាកាលពីថ្ងៃអាទិត្យ មានន័យថាក្រុមកូឌីវ័របានបញ្ចប់ភាពរាំងស្ងួត ក្នុងការខកខានលើកពានអស់រយៈពេល២៣ឆ្នាំហើយ។
ពិធីដង្ហែក្បួនព្យុហយាត្រា ត្រូវបានធ្វើឡើងនៅតាមផ្លូវនានា និងនៅកីឡដ្ឋានក្នុងទីក្រុងតែម្ដង ខណៈដែលអ្នកគាំទ្រទាំងអស់ឈរតម្រៀបជួរតគ្នា ពីកីឡដ្ឋានជាតិ Felix Houphouet-Boigny រហូតដល់ប្រលានយន្តហោះ។
ប្រធានាធិបតីកូឌីវ័រ លោក Alassane Ouattara ក៏បានទៅស្វាគមន៍សមាជិកក្រុមបាល់ទាត់ជម្រើសជាតិទាំងអស់ដែរ ខណៈដែលពិធីអបអរបានបន្តធ្វើឡើងនៅក្នុងកីឡដ្ឋាន ដែលមានកៅអីត្រឹមតែ៣ម៉ឺន៥ពាន់នាក់៕
Post a Comment