ខ្លាចាស់ ឡៅ ស៊ីណាត ចង់ផ្ដួលអ្នកប្រដាល់ជើងចាស់ជនជាតិថៃ Pirabkao ជាបេក្ខភាពដណ្ដើមខ្សែក្រវាត់ ខារ៉ាបាវ ឲ្យបាននៅល្ងាចថ្ងៃស្អែកលើសង្វៀនប្រដាល់បាយ័នស្ទឹងមានជ័យ លើប្រភេទទម្ងន់ ៦៩ គីឡូក្រាម ស្របពេលអ្នកលេងកណ្ដាប់ដៃគ្មានមេត្តារូបនេះមិនមានឈ្មោះក្នុងការប្រកួតដណ្ដើមខ្សែក្រវាត់អមទឹកប្រាក់ ១ ម៉ឺនដុល្លារនាដើមខែ មិនាខាងមុខឡើយ។
ជើងចាស់ ឡៅ ស៊ីណាត សង្កត់ធ្ងន់ថា៖ «បើផ្ដួលបានខ្ញុំចង់វាយកីឡាករថៃ ឲ្យសន្លប់ក្នុងទឹកណាមួយដើម្បីបញ្ជក់ថាខ្ញុំមិនមែនអ្នកដណ្ដើមខ្សែក្រវាត់តែខ្ញុំមានសមត្ថភាពដែរដូចគេដែរ»។ អ្នកប្រដាល់កំពូលល្បិចកំពុងតែបង្កើនការហ្វឹកហាត់ ដោយបែងចែកពេលវេលាទាំងព្រឹក និង ល្ងាចដើម្បីត្រៀមប្រកួតក្នុងមិត្តភាពអន្តរជាតិនេះ។
អ៊ុង វីរៈ និង ព្រំ សំណាង ជាដៃគូហ្វឹកហាត់រួមគ្នាក្នុងក្លិបប្រដាល់កងពលតូចឆត្រយោង ៩១១ ដើម្បីបង្កើនបច្ចេកទេសដល់ ឡៅ ស៊ីណាត ត្រៀមប្រយុទ្ធឱ្យចំចំណុចខ្សោយរបស់ដៃគូប្រកួត និង បន្ថែមចំណុចខ្លាំងក្នុងខ្លួន។
២ ប្រកួតចុងក្រោយរបស់ ឡៅ ស៊ីណាត សុទ្ធតែធ្វើបានល្អដោយបានយកឈ្នះកូននាគ វង្ស ណយ ត្រឹមទឹកទី ២ នៅបាយ័នរោងសៀក និងបន្តយកឈ្នះ អ្នកប្រដាល់មកពីអាមេរិក ត្រឹមទឹកទី ៣ ដោយប្រើមួយកែងមុតស្រួចរបស់ខ្លួន នៅសង្វៀនប៉ុស្តិ៍លេខ ៣ (TV3) ផងដែរ។
ចំណែក កីឡាករ Pirabkao ជាបេក្ខភាពម្នាក់ក្នុងចំណោម ៨ នាក់ ដែលត្រូវឡើងប្រកួតដណ្ដើមខ្សែក្រវាត់ ខារ៉ាបាវ លើសង្វៀនបាយ័ន ដែលមានទឹកប្រាក់ ១ ម៉ឺនដុល្លារ នៅដើមខែមីនា ខាងមុខ ជាមួយកីឡាករ ខ្មែរ វង្ស ណយ, ម៉ីន សុភា, កែវ រំចង់, ឡុង សុភី រួមទាំងកីឡាករ ថៃ ៤ នាក់ផ្សេងទៀត មាន Tilek Pithak ,Sareung Lukchampachai និង Singha Thorngnoy។
ឡៅ ស៊ីណា កាលប្រកួតជាមួយ វង្ស ណយ
យោងតាមអ្នករៀបចំកម្មវិធីប្រកួតនៅប៉ុស្ដិ៍បាយ័ន ឡៅ ស៊ីណាត មានកម្ពស់ ១.៧០ ម៉ែត្រធ្លាប់ប្រកួតបាន ១១៥ ដងឈ្នះ ១០០ ដងចាញ់ ១៥ ដងនិងផ្ដួលដៃគូឲ្យសន្លប់បាន ៣៧ ដង។ ចំណែកអ្នកប្រដាល់ឆ្លងដែនថៃ Pirabkao មានកម្ពស់ ១.៧០ ម៉ែត្រដូចគ្នាមានប្រវត្តិប្រកួតចំនួន ៩០ ដងឈ្នះ ៧០ ដងចាញ់ ២០ ដងហើយធ្លាប់ផ្ដួលដៃគូបាន ២៥ ដង៕
Post a Comment