រឿង សោភ័ណ្ឌ ប៉ះថៃ Sen Sep គូសងសឹងថ្ងៃ បើកឆាកកំពូល ជើងឯក Black Cat

ផល សោភ័ណ្ឌ និង ឈិន ក្វាន់ង៉ុយ ជួបថៃ ចំណែកអ្នកប្រដាល់ ជើងខ្លាំងកម្ពុជា មួយរូបទៀត រឿង សោភ័ណ្ឌ ក្លឹបមកុដរាជសីហ៍ ប៉ះអ្នកប្រដាល់ថៃ Sen Sep ដែលជាគូសងសឹង ក្នុងកម្មវិធីប្រដាល់ថ្មី កំពូលជើងឯក Black Cat នៅលើសង្វៀន SEA-TV ដែលចាប់ផ្តើម នាម៉ោង៨យប់ ថ្ងៃអាទិត្យ ទី០១ ខែកុម្ភៈ ឆ្នាំ២០១៥ ចុងសប្តាហ៍នេះ ។

អ្នកប្រដាល់ទាំងពីរនាក់នេះ ធ្លាប់ជួបគ្នាម្តងហើយ កាលពីថ្ងៃទី២៤ ខែមករា ឆ្នាំ២០១៥ នៅលើសង្វៀនខេត្តកំពង់ស្ពឺ ដែលក្នុងការប្រកួតគ្នានោះ ពួកគេវាយស្មើពិន្ទុគ្នា ហើយជើងខ្លាំងពីរនាក់នេះ ប្រកួតគ្នាក្នុងទម្ងន់ ៦៧គីឡូក្រាម ។

Sen Sep ជាអ្នកប្រដាល់ខ្លាំង និងល្អណាស់ ហើយបើក្រៅពីរឿង សោភ័ណ្ឌ ក៏ពិបាកទប់ទល់ជាមួយ Sen Sep ណាស់ ហើយអ្នកប្រដាល់ថៃរូបនេះ ល្អទាំងកណ្ដាប់ដៃ ទាត់ ជង្គង់ កែង ។ នៅចាំបានថា វាយ៤ទឹកដំបូងនោះ Sen Sep នេះមានប្រៀបឈ្នះលើ រឿង សោភ័ណ្ឌ ទៅហើយ តែបើកុំ សោភ័ណ្ឌ យកប្រៀបឈ្នះក្នុងទឹកទី៥វិញ ដោយទាត់ចូលកណ្ដៀតក្អមរបស់ Sen Sep មួយជើងពេញ ដែលធ្វើឲ្យគេចង់គាំងម្តងៗនោះ ក៏មិនបានស្មើគ្នាដែរ ។

រឿង សោភ័ណ្ឌ ជាអ្នកប្រដាល់មាន ចិត្តខ្លាំងបំផុត គេមិនងាយឲ្យថៃស៊ីងាយៗទេ ។ ជាអ្នកប្រដាល់ដែល មានកណ្ដាប់ដៃធ្ងន់ ជើងធ្ងន់នោះមិនញញើត Sen Sep មិនតិចណាទេ បើទោះជាធ្លាប់ ភ្លក្សម្តងហើយនេះ ។

រីឯអ្នកប្រដាល់ជើងខ្លាំង ផល សោភ័ណ្ឌ ក្លឹបតាឡីដំរីមានរិទ្ធ ជួបជាមួយអ្នកប្រដាល់ថៃ Tor Khit ក្នុងទម្ងន់ ៦៣,៥គីឡូក្រាម ។ Tor Khit អ្នកប្រដាល់ថៃរូបនេះ ជាជើងខ្លាំងនៅបាងកក ធ្លាប់ផ្តួលគូប្រកួត នៅស្រុកថៃ ជាច្រើននាក់ហើយ មកបើធៀបជាមួយ ផល សោភ័ណ្ឌ គឺច្រើនជាងតិចតួចប៉ុណ្ណោះ ដោយសោភ័ណ្ឌ ជាអ្នកប្រដាល់ជើងខ្លាំង នៅកម្ពុជា ដែលធ្លាប់ផ្ដួលថៃ ៦នាក់មកហើយ ហើយនេះជាលើកទី៧ របស់ សោភ័ណ្ឌ ហើយដែលជួបប្រកួត ជាមួយថៃនេះ ។

Tor Khit ដែលរាងចាញ់ កម្ពស់បន្តិចផងនោះ ប៉ះជាមួយសោភ័ណ្ឌ ដែលមានកណ្ដាប់ដៃខ្លាំង រហ័ស និងលឿននោះ មិនដឹងថាមានវាសនា ដូចអ្នកពីរនាក់មុន ឬយ៉ាងណានោះទេ ។ ចាំមើល ផល សោភ័ណ្ឌ ផ្ដួលអ្នកប្រដាល់ថៃ Tor Khit នេះ បានឬអត់? ចំណែកអ្នកប្រដាល់ ឈិន ក្វាន់ង៉ុយ ក្លឹបមកុដរាជសីហ៍ ត្រូវជួបជាមួយ អ្នកប្រដាល់ថៃ Chhai Rak ក្នុងទម្ងន់ ៦៣,៥គីឡូក្រាម ។ អ្នកប្រដាល់ថៃ Chhai Rak ដែលជាគូររបស់ ក្វាន់ង៉ុយ នេះ មិនធ្លាប់មកប្រកួតនៅលើ សង្វៀនភ្នំពេញនោះទេ ។

Chhai Rak ប៉ះជាមួយ ក្វាន់ង៉ុយ អាចថាល្អមើល ដោយសារមានកម្ពស់ ប្រហាក់ប្រហែលគ្នា តែយ៉ាងណារឿង លទ្ធផលឈ្នះចាញ់ គឺមិនអាចទាយ មុនបានទេ ។ ឈិន ក្វាន់ង៉ុយ បើមានការតាំងចិត្តប្រកួតនោះ គេប្រហែលជាមិនចាញ់ នោះឡើយ ប៉ុន្តែខ្លាចតែក្វាន់ង៉ុយចិត្តតូច ចាញ់ស្រាប់ អ្នកប្រដាល់ថៃនោះទេ ទើបអាចចាញ់ Chhai Rak បើគេរឹងមាំ ដូចជាប្រកួតជាមួយថៃ ៤នាក់លើកមុននោះ ក្វាន់ង៉ុយ មិនចាញ់នោះឡើយ ៕

កីទ្បាករ Sen Sep (ឆ្វេង) ប្រកួតជាមួយនឹងកីទ្បាករ រឿង សោភ័ណ្ឌ (ស្តំា)

កីទ្បាករ Tor Khit (ឆ្វេង) ប្រកួតជាមួយនឹងកីទ្បាករ ផល សោភ័ណ្ឌ (ស្តំា)

កីទ្បាករ Chhai Rak (ឆ្វេង) ប្រកួតជាមួយនឹងកីទ្បាករ ឈិន ក្វាន់ង៉ុយ (ស្តំា)