ប្រឹក្សាបច្ចេកទេសនៅគណៈកម្មាធិការជាតិអូឡាំពិកកម្ពុជា លោក Gabriel Ken Gadaffi បានជំរុញឲ្យម្ចាស់មេដាយមាសអាស៊ីឆ្នាំ២០១៤របស់កម្ពុជាកញ្ញា ស៊ន សៀវម៉ី វិលចូលសាលាវិញដើម្បីជាទុនសម្រាប់អនាគតរបស់នាង។
លោក Ken និងកញ្ញា ស៊ន សៀវម៉ី
លោកបានប្រាប់ថា លោកមិនស្រួលចិត្តទេនៅពេលឃើញម្ចាស់មេដាយមាសតេក្វាន់ដូទ្វីបអាស៊ី ស៊ន សៀវម៉ី មិនទាន់បន្តចូលរៀនមហាវិទ្យាល័យ បន្ទាប់ពីទទួលបានសញ្ញាប័ត្រមធ្យមសិក្សាទុតិយភូមិពីក្រសួងអប់រំ យុវជន និងកីឡាដោយស្វ័យប្រវត្តិ។ លោក Ken Gadaffi បានផ្តល់ដំបូន្មានថា ឥឡូវ ស៊ន សៀវម៉ី ដល់ពេលត្រូវចូលសាលារៀនវិញហើយដើម្បីបង្កើនចំណេះដឹងរបស់នាង។ «ការអប់រំពិតជាសំខាន់ណាស់ កីឡាគឺជារឿងបណ្ដោះអាសន្នប៉ុណ្ណោះ ហើយបើយើងមិនចោលកីឡា ក៏កីឡាចោលយើងវិញថ្ងៃណាមួយដែរ។ ខ្ញុំលេងបាល់ទាត់ឈានដល់កម្រិតកំពូល តែខ្ញុំមិនចោលសាលា ហើយទីបំផុតខ្ញុំបានបញ្ចប់ថ្នាក់បណ្ឌិត»។ សាស្ត្រាចារ្យនៅសាកលវិទ្យាល័យធនធានមនុស្សរូបនេះបានបន្តថា ៖«យើងរស់នៅក្នុងសង្គមមួយដែលសមត្ថភាពបុគ្គលម្នាក់ៗត្រូវពឹងផ្អែកលើការអប់រំ។ ខ្ញុំនិយាយទីនេះក្នុងគោលបំណងជំរុញឲ្យកញ្ញា ស៊ន សៀវម៉ីឲ្យវិលចូលបន្ទប់រៀនវិញ»។ ស៊ន សៀវម៉ីកាលពីពេលថ្មីៗនេះបានចូលរួមសិក្ខាសាលាស្តីពីភាពជាអ្នកដឹកនាំសម្រាប់ស្ត្រី និងកីឡា IOC នៅខេត្តសៀមរាបដែលនាងមានផលលំបាកក្នុងវគ្គនេះដោយសារភាសាអង់គ្លេសរបស់នាងនៅមានកម្រិត។ លោក Ken Gadaffi ជឿថា ការចាប់ផ្តើមចូលសាលារបស់ម្ចាស់មេដាយមាសរូបនេះចាប់ពីពេលនេះទៅនឹងជួយផ្តល់ឲ្យនាងកាន់តែល្អសម្រាប់ការងារនាពេលខាងមុខ។ 
ស៊ន សៀវម៉ី បង្ហាញមេដាយមាស
លោក Gadaffi បាននិយាយថា ៖«នាងកាន់តែមានផលល្អ ប្រសិនបើនាងរៀនភាសាអង់គ្លេសយ៉ាងពិសេស។ នាងជាទូតផ្សព្វផ្សាយឲ្យក្រុមហ៊ុនជាច្រើន ហើយនឹងមានក្រុមហ៊ុនជាច្រើនទៀតមករកនាង»។ ស៊ន សៀវម៉ីបានក្លាយជាវីរនារីកម្ពុជាក្នុងវិស័យកីឡាទីមួយកាលពីឆ្នាំ២០១៤កន្លងទៅ បន្ទាប់ពីនាងឈ្នះបានមេដាយមាសពីព្រឹត្តិការណ៍កីឡាទ្វីបអាស៊ីនៅប្រទេសកូរ៉េខាងត្បូង។ នាងទទួលបានសញ្ញាប័ត្របាក់ឌុបដោយស្វ័យប្រវត្តិពីក្រសួងអប់រំ យុវជន និងកីឡា ហើយនាងក៏ទទួលបានការបំពាក់គ្រឿងឥស្សរិយយសពីរដ្ឋាភិបាល ជាពិសេសនាងជាអ្នកកីឡាម្នាក់គត់ដែលបានចូលគាត់ព្រះមហាក្សត្រ៕
Post a Comment