ខ្សែការពារ Edimar របស់ Cordoba ដែលត្រូវ Ronaldo ទាត់ពីក្រោយអំឡុងប្រកួតអាទិត្យមុននោះ ពេលនេះព្រមទទួលយកការសូមទោសពីខ្សែប្រយុទ្ធ Real Madrid ហើយ ថែមទាំងបានសុំឱ្យខាងសហព័ន្ធកីឡា បន្ថយការពិន័យមកត្រឹមមួយប្រកួតទៀតផង។
សហព័ន្ធកីឡារបស់ប្រទេសអេស្ប៉ាញបានពិន័យ Ronaldo ៣ប្រកួតបន្ទាប់ពីរូបគេទទួលបានកាតក្រហមដោយសារទាត់ខ្សែការពារ Edimar អំឡុងពេល Real Madrid ប្រកួតជាមួយ Cordoba កាលពីថ្ងៃសៅកន្លងទៅ។ ខណៈដែលម្ចាស់ពាន Ballon d’Or ៣សម័យរូបនេះក៏បានធ្វើការសូមទោសផងដែរ ចំពោះទង្វើរបស់ខ្លួនបន្ទាប់ពីដឹងថាត្រូវគេពិន័យ៣ប្រកួតនោះ។
ក្រោយពីដឹងថា Ronaldo សូមទោស ខ្សែការពារវ័យ២៨ឆ្នាំរបស់ Cordoba ខាងលើនេះក៏បានអភ័យទោសផងនិងនិយាយដែរថា៖ “នោះជាការប្រកួតដែល Cristiano មានកំហុសបន្តិចបន្តួច ព្រោះស្ថានការណ៍នាពេលនោះមិនសូវជាល្អនោះទេ ប៉ុន្តែរឿងដែលបានកើតឡើងរវាងខ្ញុំ និងគេនោះគឺខ្ញុំបានអភ័យទោសឱ្យគេទៅហើយ។ ខ្ញុំមិនទៅគុំកួនអីនឹងគេនោះទេ។ Cristiano គួរតែទទួលបានការពិន័យធម្មតា មិនមែនដល់ទៅ៣ប្រកួតឡើយ។ ខ្ញុំមិនចង់ឱ្យគេឈឺចាប់ដោយសាររឿងនេះនោះទេ ហើយខ្ញុំសង្ឃឹមថាគាត់នៅតែជាកីឡាករល្អជាងគេនៅលើលោកនេះដដែល”៕
Post a Comment