ព្រឹត្តិការណ៍ជម្រុះ១៦ក្រុមចុងក្រោយHun Sen-Cup ឆ្នាំ២០១៥នេះ ទោះជានៅសល់មួយប្រកួតម្នាក់ទៀតក្តី សម្រាប់ពូលCត្រូវបានគេរំពឹងទុកថា ក្រុមភ្នំពេញក្រោន និងក្រុមបឹងកេតអង្គរFC នឹងឡើងទៅវគ្គ៨ក្រុមចុងក្រោយ ខណៈដែលក្រុមការពារជាតិនិងក្រុមសហភាពសហព័ន្ធយុវជនកម្ពុជាខេត្តបាត់ដំបង នឹងជ្រុះធ្លាក់ហាលអាវត្រឹមនេះ។
ក្រុមការពារជាតិ និងក្រុមសហភាពសហព័ន្ធយុវជនកម្ពុជាខេត្តបាត់ដំបង បាត់បង់ឱកាសត្រឹមវគ្គ១៦ក្រុមចុងក្រោយនេះ ហើយបន្ទាប់ពីលេង២ ប្រកួតជួបបរាជ័យទាំង២ ប្រកួតនោះ ឯភ្នំពេញក្រោន និងក្រុមបឹងកេតអង្គរFC២ប្រកួតឈ្នះទាំងពីរប្រកួត។ក្នុងព្រឹត្តិការណ៍ Hun Sen-Cupឆ្នាំ២០១៥នេះ ក្រុមការពារជាតិដែលធ្លាប់ឈ្នះតំណែងជើងឯក Hun Sen-Cup ២០១០ ហើយក៏ជាក្រុមខ្លាំងមួយក្នុង Leagueនោះ ឆ្នាំជួបសំណាងមិនល្អដោយស្ថិតនៅពូល C ជាមួយក្រុមខ្លាំងភ្នំពេញក្រោននិងបឹងកេតអង្គរ FC រួមជាមួយក្រុមខ្សោយសហភាពសហព័ន្ធយុវជនកម្ពុជាខេត្តបាត់ដំបង។សល់មួយប្រកួតទៀតរបស់ការពារជាតិ ដែលជួបជាមួយសហភាពសហព័ន្ធយុវជនកម្ពុជាខេត្តបាត់ដំបងនោះ ទោះក្រុមមួយណាឈ្នះក្រុមមួយណាចាញ់ ក៏ហាលអាវដូចគ្នាដែរ។គួរបញ្ជាក់ថា ក្រុមការពារជាតិបន្ទាប់ពីចាញ់ភ្នំពេញក្រោន០ទល់៤នោះ បានលេងចាញ់ក្រុមបឹងកេតអង្គរ FC ០ ទល់ ១។ ចំណែក ក្រុមសហភាពសហព័ន្ធយុវជនកម្ពុជាខេត្តបាត់ដំបងវិញ បន្ទាប់ពីចាញ់បឹងកេតអង្គរFC ២ ទល់ ១០នោះ បានបន្តចាញ់ភ្នំពេញក្រោន ០ ទល់ ១៥ ទៀត។ភ្នំពេញក្រោន និង បឹងកេតអង្គរ FC ត្រូវជួបគ្នាចុងក្រោយហើយមួយណាចាញ់ ឬ ឈ្នះក៏ឡើងទៅវគ្គ ៨ ក្រុមចុងក្រោយជាមួយគ្នា គ្រាន់តែក្រុមឈ្នះបានលេខ ១ ក្នុងពូល ឯ ក្រុមចាញ់បានលេខ ២ ប៉ុណ្ណោះ។ 
ចំពោះពូល D ដែលឆ្លងកាត់ការប្រកួតថ្ងៃទី២៥ ខែមករានោះ ក៏គេសម្លឹងញើញក្រុមដែលត្រូវហាលអាវនិងក្រុមបានឡើងទៅ៨ក្រុមចុងក្រោយដែរ។ នោះគឺក្រុមអាជ្ញាធរអប្សរាខេត្តសៀមរាប និង ក្រុមខេត្តព្រៃវែង ដែល ២ ប្រកួតចាញ់ទាំង ២ ប្រកួតដូចគ្នា ទោះជានៅសល់មួយប្រកួតទៀតក៏ដោយ។អាជ្ញាធរអប្សរាខេត្តសៀមរាប លេងមួយប្រកួតដំបូងចាញ់ខេត្តស្វាយរៀង០ទល់៦ និងនៅជុំទី២នេះចាញ់ណាហ្គាវើល១ទល់៤។ ឯក្រុមខេត្តព្រៃវែង បន្ទាប់ពីចាញ់ណាហ្គាវើល០ទល់១៥ នោះ មកដល់លើកទី២ចាញ់ស្វាយរៀងយ៉ាងចាស់ដៃ១ទល់២៣ទៀត។សម្រាប់ពូលDនេះ ក្រុមដែលត្រូវឡើងគឺខេត្តស្វាយរៀងនិង ណាហ្គាវើល ដែលពីរប្រកួតឈ្នះទាំងពីរប្រកួតនោះ។ ស្វាយរៀងលេងលើកទី១ឈ្នះអាជ្ញាធរអប្សរា៦ទល់០ និងលើកទី២លេងថ្ងៃទី២៥ ខែមករានេះ បានយកឈ្នះព្រៃវែង២៣ទល់១។ ចំណែកណាហ្គាវើល លើកទី១ឈ្នះព្រៃវែង១៥ទល់០ និងលើកទី២ឈ្នះអាជ្ញាធរអប្សរា៤ទល់១។ស្វាយរៀងនិងណាហ្គាវើល ត្រូវជួបគ្នាក្នុងការប្រកួតបញ្ចប់ពូល ដែលក្រុមណាឈ្នះ ក្រុមនោះលេខ១ក្នុងពូលD ហើយក្រុមណាចាញ់គឺលេខ២ក្នុងពូល៕
Post a Comment