កំពង់ស្ពឺ ៖ ការប្រកួតប្រដាល់ទេសចរណ៍លក្ខណៈអន្តរជាតិលើកទី៣សម្រាប់ខែ មករានេះ SEA -TV បានរៀបចំនៅទីរួមខេត្តកំពង់ស្ពឺ ដែលមានអ្នកប្រដាល់ជើងខ្លាំងរបស់កម្ពុជា៣រូប និងថៃ៣រូបជួបប្រកួតគ្នានាយប់ថ្ងៃសៅរ៍ ទី២៤ ខែមករានេះ។
ផុន ផាន់ណា អ្នកប្រដាល់ជើងខ្លាំងកម្ពុជានៃសមាគមកីឡាក្រសួងកសិកម្ម នឹងត្រូវស្វាគមន៍ជាមួយអ្នកប្រដាល់ជើងខ្លាំងមកពីប្រទេសថៃឈ្មោះ Noppa Kao ក្នុងទម្ងន់៧0គីឡូក្រាម។ Noppa Kaoនេះ មកវាយនៅស្រុកខ្មែរ៣ដងហើយ ដោយវាយឈ្នះ២ដង គឺឈ្នះពេជ្រ អារុណ ក្លឹបតាព្រហ្មមានជ័យក្នុងទឹកទី២-(ថ្ងៃទី២៩ ខែឧសភា ឆ្នាំ២០១៤) នឹងឈ្នះ លៀង ស៊ីពេជ្រ ក្លឹបប្រដាល់ខេត្តកោះកុង(ថ្ងៃទី២៦ ខែមិថុនា ឆ្នាំ២០១៤) ហើយចាញ់ម្តងនោះគឺចាញ់ ពុទ្ធ ហ៊ុច ក្លឹបពុទ្ធសេរីវង្សកីឡាក្នុងទឹកទី៣(ថ្ងៃទី២៨ ខែសីហា ឆ្នាំ២០១៤) លើសង្វៀន SEA-TVនេះ។Noppa Kao ប្រុងមកសងសឹក ពុទ្ធ ហ៊ុចវិញ តាំងពីចុងឆ្នាំ២០១៤មកម្ល៉េះ ឥឡូវបានមកហើយមិនបានជួប ពុទ្ធ ហ៊ុច ទៀត គឺជួប ផុន ផាន់ណាទៅវិញ ធ្វើឲ្យខកបំណងសងសឹករបស់គេ។ តែយ៉ាងណា ផាន់ណា មិនខ្សោយជាង ពុទ្ធ ហ៊ុច នោះទេ ផ្ទុយទៅវិញ ផាន់ ណា មានផ្លែល្អជាងពុទ្ធ ហ៊ុច ទៅទៀត។អ្នកប្រដាល់ថៃ Noppa Kao នេះ មិនជាអន់នោះទេ ដោយធ្លាប់ឆ្លងកាត់ប្រកួតចំនួន៦៥ដងវាយឈ្នះ៥២ដងទៅហើយ ដោយចាញ់១៣ដង និងមិនដែលស្មើ។ នេះជាគូប្រកួតដ៏អស្ចារ្យមួយ ដែលគេជឿថាអ្នកប្រដាល់ថៃរូបនេះគឺជាគូប្រកួតដ៏ខ្លាំងសម្រាប់ ផុន ផាន់ណា ហើយ។ ផាន់ណា ជាអ្នកប្រដាល់ជើងខ្លាំងរបស់កម្ពុជា គេក៏មានប្រវត្តិប្រកួតមិនតិចដងដែរ គឺប្រកួតចំនួន៧០ដង ឈ្នះ៦០ដង ចាញ់៦ដង និងស្មើ៤ដង ហើយគេធ្លាប់ផ្ដួលអ្នកប្រដាល់បរទេសអស់ច្រើនមកហើយ។ផាន់ ណា និង Noppa Kao អ្នកប្រដាល់ថៃនេះ គឺអាចស៊ីសងគ្នាបាន ព្រោះ ផាន់ ណា គេមានបទពិសោធន៍ច្រើនក្នុងការប្រកួត ហើយគេក៏មានកលល្បិចសម្រាប់ទប់ទល់ជាមួយអ្នកប្រដាល់ថៃនេះដែរ។ ទោះជាយ៉ាងណា សម្រាប់ការជួបគ្នារវាងអ្នកប្រដាល់ថៃ Noppa Kao និងផុន ផាន់ ណា នេះ គឺមិនអាចទស្សន៍ទាយមុនថានរណាជាអ្នកឈ្នះនោះទេ។ ចាំមើល តើ ផុន ផាន់ណា មានសំណាងល្អដូច ពុទ្ធ ហ៊ុច ឬអត់?ឯម ខ្លឹមខ្មៅ អ្នកប្រដាល់នៃក្លឹបឫទ្ធីពោធិសែនជ័យនឹងជួបប្រកួតជាមួយអ្នកប្រដាល់ថៃឈ្មោះSen Sep ក្នុងទម្ងន់៦៧គីឡូក្រាមដែរ។ Sen Sepនេះ តាមការស្រាវជ្រាវប្រវត្តិរបស់គេនោះ គឺប្រដំប្រសងជាមួយនឹងខ្លឹមខ្មៅរបស់កម្ពុជាយើងទេ។ អ្នកប្រដាល់ថៃរូបនេះ ធ្លាប់ប្រកួតចំនួន៧៨លើក ដោយឈ្នះ៦៤លើក ចាញ់១៤លើក មិនដែលស្មើ ខណៈដែលខ្លឹមខ្មៅមានប្រវត្តិប្រកួត៧៩ដង ឈ្នះ៦៦ដង ចាញ់១០ដងនិងស្មើ៣ដងគឺប្រហាក់ប្រហែលគ្នា។ ជាមួយគ្នានេះ Sen Sep នៅចាញ់កម្ពស់ ខ្លឹមខ្មៅបន្តិចថែមទៀត ដោយខ្លឹមខ្មៅមានកម្ពុជា១,៧២ ម៉ែត្រ ខណៈដែល Sen Sep គេមានកម្ពស់តែ១,៧០ម៉ែត្រនោះ។ខ្លឹមខ្មៅ ជាអ្នកប្រដាល់ដែលវាយកាចបំផុត ក្នុងចំណោមអ្នកប្រដាល់នៅក្នុងស្រុកខ្មែរ។ អ្នកប្រដាល់រូបនេះ ធ្លាប់ប្រកួតជាមួយអ្នកប្រដាល់បរទេស មាន ថៃ រុស្សី ប្រេស៊ីល ប្រមាណ៥លើកហើយ ដោយមានឈ្នះ៣លើក និងចាញ់២លើក។ ការប្រកួតជាមួយបរទេសចុងក្រោយនោះ ខ្លឹមខ្មៅវាយចាញ់អ្នកប្រដាល់ Rareung Luk Champachhai ក្នុងទឹកទី៣។ ការចាញ់របស់ខ្លឹមខ្មៅពេលនោះ ដោយសារតែគេចាញ់កម្ពស់ដាច់ពេក។ដូច្នេះហើយ សម្រាប់ការប្រកួតរបស់ ឯម ខ្លឹមខ្មៅលើកនេះ គេមិនហ៊ានអះអាងមុនថាខ្លឹមខ្មៅនឹងឈ្នះ Sen Sep នោះទេ ព្រោះអ្នកប្រដាល់ថៃរូបនេះ ក៏មិនជាអន់ប៉ុន្មានដែរ។ ហើយមួយទៀត ខ្លឹមខ្មៅគេក៏រកស៊ីជាមួយថៃមិនសូវកាក់កបដែរ។អ្នកប្រដាល់រឿង សោភ័ណ្ឌ មកពីក្លឹបមកុដរាជសីហ៍នឹងប្រកួតជាមួយអ្នកប្រដាល់ថៃឈ្មោះOr Rano ក្នុងទម្ងន់៦៧គីឡូក្រាមដែរ។ សោភ័ណ្ឌ ជាអ្នកប្រដាល់មានអំនួតបន្តិច គេត្រៀមចាំតែប្រកួតជាមួយអ្នកប្រដាល់បរទេសប៉ុណ្ណោះ។ ជាអ្នកប្រដាល់ដែលមានកណ្ដាប់ដៃធ្ងន់ ជើងធ្ងន់នោះ សោភ័ណ្ឌ ឆ្លងកាត់ការប្រកួតចំនួន១២៣ដង ក្នុងនោះឈ្នះ១០៤ដង ចាញ់១៤ដង និងស្មើពិន្ទុ៥ដង។ចំពោះអ្នកប្រដាល់ថៃ Or Ranoវិញនោះ មានប្រវត្តិប្រកួតចំនួន៦៨ដង ឈ្នះ៥៨ដង ចាញ់១០ដងនិងមិនដែលស្មើ។ Or Rano ពុំធ្លាប់មកប្រកួតនៅស្រុកខ្មែរទេ តែបើតាមការអះអាងពីលោក ញាន សុធី អ្នកគ្រប់គ្រងកម្មវិធីប្រដាល់SEA-TV នោះថា អ្នកប្រដាល់ថៃរូបនេះ មានសមត្ថភាពប្រហាក់ប្រហែលគ្នាជាមួយនឹង សោភ័ណ្ឌ ដែរទេ គឺពួកគេអាចវាយគ្នាបានល្អមើល។ ចាំមើល ការប្រកួតលើកនេះ រឿង សោភ័ណ្ឌ អាចយកឈ្នះOr Rano បានអត់៕
Post a Comment