អ្នកប្រដាល់វ័យក្មេង ឡៅ ចន្រ្ទានឹងបញ្ចប់រាល់មន្ទិលសង្ស័យរបស់អ្នកគាំទ្រដើម្បីបង្ហាញឲ្យឃើញថា នរណាជាជើងខ្លាំងពិតប្រាកដនៅលើសង្វៀនពេលរូបគេត្រូវប្រកួតនឹងអ្នកប្រដាល់ជើងខ្លាំង យ៉េន ឌីណាដើម្បីដណ្តើមពានគូប៊ូតានៅសង្វៀនបាយ័នរោងសៀកទល់មុខរដ្ឋសភានាថ្ងៃទី១៥ កុម្ភៈ ខាងមុខ។
កីឡាករ ឡៅ ចន្ទ្រា
ឡៅ ចន្រ្ទា ប្រាប់ថា វាជាការត្រៀមខ្លួនដ៏ពិសេសមួយសម្រាប់រូបគេពេលប៉ះដៃគូល្អដូចយ៉េន ឌីណា។ គេជាកីឡាករមួយរូបដែលពូកែប្រើកែង និងនិងកណ្ដាប់ដៃ ហើយចូលចិត្តវ៉ៃប្រយោល(ពីចម្ងាយ) «ស្នៀតសម្លាប់ដៃគូរបស់ឌីណា ខ្ញុំមិនអាចប្រាប់បានទេ ប៉ុន្តែខ្ញុំបានត្រៀមស្នៀតការពារអស់ហើយ។ ខ្ញុំអត់មានអីត្រូវខ្លាច យ៉េន ឌីណាទេ»។ ប្អូនប្រុសរបស់ឡៅ ស៊ីណាតរូបនេះបន្ថែមថា ការប្រកួតរបស់គេនឹងយ៉េន ឌីណាប្រាកដជាមានអ្នកទស្សនាច្រើន ពីព្រោះមានអ្នកគាំទ្រជាច្រើនបានប្រាប់ឲ្យរូបគេប្រកួតនឹង យ៉េន ឌីណាយូរមកហើយ។ 
កីឡាករ យ៉េន ឌីណា
«ខ្ញុំចង់បញ្ចប់រាល់មន្ទិលសង្ស័យរបស់អ្នកគាំទ្រ និងបង្ហាញឲ្យច្បាស់ថា នរណាជាអ្នកខ្លាំងពិតប្រាកដ? សម្រាប់ការប្រកួតនេះ ខ្ញុំសង្ឃឹមឈ្នះគេ៧០%»។ នេះជាការបញ្ជាក់របស់ ឡៅ ចន្ទ្រាដោយបន្តថា ក្រោយរូបគេល្បីក្នុងពិភពកីឡាប្រដាល់រយៈពេលប៉ុន្មានឆ្នាំចុងក្រោយនេះ យ៉េន ឌីណា អាចចាត់ទុកថាជាគូប្រកួតខ្លាំងក្នុងស្រុកទី២ បន្ទាប់ពីជើងខ្លាំង ផាន់ គ្រាន់ដែលរូបគេធ្លាប់ចាញ់ម្ដងកាលពីឆ្នាំ២០១៤។ ចំពោះ យ៉េន ឌីណាវិញមិនអាចទាក់ទងសុំការសម្ភាសន៍បានទេជុំការប្រកួតនឹង ឡៅ ចន្ទ្រានេះ៕ 
Post a Comment