ឡៅ ចន្ទ្រា អ្នកប្រដាល់ជើងខ្លាំងវ័យក្មេង ត្រូវគេផ្គូផ្គងឲ្យជួបប្រកួតជាមួយឃីម បូរ៉ា អ្នកប្រដាល់ក្លិបរស្មីភូមិគាបខេត្តបន្ទាយមានជ័យ នាល្ងាចថ្ងៃអាទិត្យទី២៥ ខែមករា ឆ្នាំ២០១៥នេះ នៅលើសង្វៀនបាយ័នបឹងស្នោរ។ឃីម បូរ៉ានេះ គេក៏ជាអ្នកប្រដាល់ខ្លាំងវ័យក្មេងដែរ គ្រាន់តែមិនសូវត្រូវបានគេចាប់អារម្មណ៍ដូចជាឡៅ ចន្ទ្រា នោះ។ អ្នកប្រដាល់រូបនេះ មានកាយសម្បទាស្តើង ខ្ពស់ ដៃជើង វែង ដូច ឡៅ ចន្ទ្រា ដែរ។
អ្នកប្រដាល់វ័យក្មេងទាំងពីរនាក់នេះ គេបម្រុងផ្គូឲ្យជួបគ្នាតាំងពីយូរមកហើយ តែ ចេះតែឃ្វាងមិនបានជួបគ្នា។ បូរ៉ា ត្រូវគេមើលឃើញល្អនិងខ្លាំង ចាប់តាំងពីរូបគេវាយដណ្តើមខ្សែក្រវាត់ចំនួនពីរទម្ងន់កន្លងមក តែគេពុំមានសំណាងទទួលបាននោះ។ មួយទៀត គេបានមើលឃើញបន្ទាប់ពីគេវាយឈ្នះឈិត ង៉ុយ ជើងខ្លាំងនៃក្លិបអប្សរាគុនខ្មែរ។ប៉ុន្តែក៏មានអ្នកវិភាគកីឡាប្រដាល់ក្នុងស្រុកមួយចំនួនអះអាងថា ឃីម បូរ៉ានេះមិនល្អនិងខ្លាំងដូចឡៅ ចន្ទ្រា នោះឡើយ។ បូរ៉ា គ្រាន់តែមានផ្លែជង្គង់ កែងល្អ តែសម្រាប់កម្លាំងកាយសម្បទា និង ទិចនិចប្រកួត គឺនៅចាញ់ចន្ទ្រា។ឡៅ ចន្ទ្រា ក្នុងប្រភេទទម្ងន់៦០គ.ក្រនេះ គេហាក់ដូចជាចង់អស់គូប្រកួតជាមួយទៅហើយ។ សូម្បីតែជើងខ្លាំងមកពីថៃ ក៏នៅតែវាយចាញ់ចន្ទ្រាដែរ កាលពីថ្មីៗកន្លងមកនេះ។សម្រាប់ការប្រកួតចុងក្រោយរបស់ឡៅ ចន្ទ្រា គឺគេវាយស្មើជាមួយអ្នកប្រដាល់ថៃ Pheachngen ឯការប្រកួតចុងក្រោយរបស់ឃីម បូរ៉ា គឺវាយឈ្នះផៃ គឹមហឿត អ្នកប្រដាល់ក្លិបអាជ្ញាធរជាតិអាវុធគីមី ដោយពិន្ទុ។ទោះជាយ៉ាងណា សម្រាប់ការទស្សន៍ទាយថាអ្នកណាឈ្នះ អ្នកណាចាញ់នោះ ពុំមាននរណាហ៊ានទាយមុននោះឡើយ ប៉ុន្តែរវាងអ្នកប្រដាល់ទាំងពីរនាក់នេះ គេមានជំនឿចិត្ត លើ ឡៅ ចន្ទ្រា ច្រើនជាង។សយ សី អ្នកប្រដាល់ក្លិបពន្លឺវិបុលរិទ្ធី នឹងត្រូវជួបប្រកួតសងសឹកជាមួយសំណាង ឌីណា អ្នកប្រដាល់ក្លិបដួងសែនសុខគុនខ្មែរ។ ពីរនាក់នេះ ធ្លាប់ប៉ះគ្នាម្តងហើយកាលពីថ្ងៃទី២០ ខែធ្នូ ឆ្នាំ២០១៤ ក្នុងការប្រកួតផ្តាច់ព្រ័ត្រដណ្ដើមពានរង្វាន់អនុស្សាវរីយ៍បាយ័នវគ្គ៤ ហើយដែលសយ សីចាញ់ឌីណាដោយពិន្ទុ ។សយ សី ជាអ្នកប្រដាល់ស្រករក្រោយ អន់បច្ចេកទេសបន្តិច តែមានចិត្តធំ និងហ៊ានក្នុងការប្រកួត។ ការប្រកួតរបស់សី គឺភាគច្រើនគេវាយតាមលក្ខណៈផ្សងព្រេង ច្រើនជាងការច្បាស់ខ្លួនឯង។ គេប្រកួតចុងក្រោយ វាយចាញ់បឺត សង្ឃឹម អ្នកប្រដាល់ក្លិបរ៉ាហាប់ស្វាយប៉ាកក្នុងទឹកទី៣។ចំពោះ សំណាង ឌីណា គេមានស្នៀតប្រដាល់ច្បាស់ កណ្តាប់ដៃ និងជើងទាត់ខ្លាំង ប៉ុន្តែប្រកួតឆាប់ធ្លាក់ ដោយសារអន់កម្លាំងស៊ុហ្វ។ គេប្រកួតចុងក្រោយ វាយចាញ់អ្នកប្រដាល់ឯម សុធី ក្លិបឫទ្ធីពោធិសែនជ័យដោយពិន្ទុ។សម្រាប់ការជួបគ្នារវាងសយ សី និង សំណាង ឌីណានេះ តាមការវាយតម្លៃនិងសន្និដ្ឋានមុននោះ គេថាឌីណា មានសង្ឃឹមឈ្នះច្រើនជាង។ឃីម សាវ៉េត អ្នកប្រដាល់ក្លិបព្រះខ័នរាជ នឹងឡើងប្រកួតជាមួយវ៉ែន សុភ័ក្រ អ្នកប្រដាល់ក្លិបកងពលទ័ពឆត្រយោង៩១១។ ពួកគេពីរនាក់នេះ ពុំដែលជួបគ្នាទេកន្លងមក។ ទោះជាយ៉ាងនេះក្តី សម្រាប់ការជួបគ្នានេះ គេមិនមានជំនឿថាសុភ័ក្រឈ្នះសាវ៉េតនោះឡើយ។វ៉ែន សុភ័ក្រ ជាអ្នកប្រដាល់ស្រករក្រោយមិនជាពិបាកនឹងបង្ក្រាបនោះទេ ព្រោះគេវាយយឺតមិនសូវរហ័សរហួន និងមិនសូវមានកលល្បិចក្នុងការប្រកួត។ អ្នកប្រដាល់រូបនេះ មិនសូវជាចូលចិត្តវាយពីប្រយោលទេ គឺភាគច្រើនចូលកៀក និងចាប់ឲ្យវាយជង្គង់ កែង យកតែម្តង។ចំណែក ឃីម សាវ៉េត គេរាងស្ពឹកបន្តិច តែមានស្នៀតប្រដាល់ល្អ និងទិចនិចប្រកួតល្អផងដែរ។ តែយ៉ាងណាមិនដឹងថាគេអាចឈ្នះសុភ័ក្រ បានឬអត់នោះទេ នៅក្នុងការជួបគ្នាលើកនេះ។ ការប្រកួតចុងក្រោយ ឃីម សាវ៉េតវាយឈ្នះឈាន រស្មី អ្នកប្រដាល់ក្លិបបង្ក្រាបគ្រឿងញៀនខេត្តរតនគិរីដោយពិន្ទុ ឯវ៉ែន សុភ័ក្រ ប្រកួតចុងក្រោយវាយចាញ់ឃិត ទូច អ្នកប្រដាល់ក្លិបមជ្ឈមណ្ឌលកីឡាខ.ភ.ម ដោយពិន្ទុដែរ។ដោយឡែក សូយ យក្សតឿ អ្នកប្រដាល់ក្លិបពោធិជ័យកីឡា ត្រូវគេផ្គូឲ្យជួបប្រកួតជាមួយ សរ រាជសីហ៍ អ្នកប្រដាល់ក្លិបមោងឫស្សីមរតកគុនខ្មែរខេត្តបាត់ដំបង។ ពីរនាក់នេះ នឹងជួបគ្នាលើសង្វៀនរោងសៀកមុខរដ្ឋសភា នារសៀលថ្ងៃអាទិត្យនេះដែរ។សរ រាជសីហ៍ ទំនងជាមិនអាចឈ្នះសូយ យក្សតឿ នោះឡើយ ដោយសារយក្សតឿ គេខ្លាំងជាង និងវាយមានផ្លែល្អជាង។ ណាមួយ រាជសីហ៍ ជាអ្នកប្រដាល់ចំណូលថ្មីថែមទៀត ដោយមកប្រកួតនៅភ្នំពេញមិនដល់ដប់ដងផងទេ។ គេប្រកួតចុងក្រោយនេះ វាយចាញ់ រឿងសោភ័ណ្ឌ អ្នកប្រដាល់ក្លិបម្កុដរាជសីហ៍ក្នុងទឹកទី២។យក្សតឿបច្ចុប្បន្ន គេវាយឡើងជាងមុន ដែលការប្រកួតចុងក្រោយនេះ គេវាយឈ្នះ ពេជ្រ ម៉ាប់ អ្នកប្រដាល់ក្លិបសាលវ័ន្តកីឡាក្នុងទឹកទី២។ចំណែក នូវ ស៊ីថា អ្នកប្រដាល់ក្លិបតាឡីដំរីមានរិទ្ធ នឹងជួបប្រកួតជាមួយអ្នកប្រដាល់ វ៉ែន ហុងជីវ៉ុង ក្លិបកងកេងខេត្តបាត់ដំបង។ ពីរនាក់នេះ មិនធ្លាប់ដែលជួបគ្នាទេកន្លងមក។វ៉ែន ហុងជីវ៉ុន នេះ ពុំសូវមាននរណាស្គាល់គេទេ។ គេបានបង្ហាញមុខនៅសង្វៀនភ្នំពេញម្តងកាលពីថ្ងៃទី២១ខែធ្នូកន្លងមកនេះ។ ទោះជាយ៉ាងណា ជីវ៉ុន គេមានកាយសម្បទា ល្អជាងនូវ ស៊ីថា។ស៊ីថា ប៉ុន្មានប្រកួតចុងក្រោយនេះ វាយចាញ់រហូត ដោយការប្រកួតចុងក្រោយគេនេះ ស៊ីថា ត្រូវថៃ ប៊ុនហាន វាយឲ្យចុះចាញ់ក្នុងទឹកទី១។ ចាំមើល ការប្រកួតជាមួយអ្នកប្រដាល់ចំណូលថ្មីវ៉ែន ហុងជីវ៉ុននេះ នូវ ស៊ីថាអាចយកឈ្នះបានឬអត់ ?
ចំពោះអ្នកប្រដាល់សំណាង ប៊ូកើត ក្លិបដួងសែនសុខគុនខ្មែរ ត្រូវជួបប្រកួតជាមួយសល់ អាវិន ក្លិបកុសលកីឡា ខណៈដែលឌួង នីកា អ្នកប្រដាល់ក្លិបរស្មីកុមារកំព្រា ជួបជាមួយចាន់ រ៉ាដេត អ្នកប្រដាល់ក្លិបនិរោធមានជ័យ៕
Post a Comment