អ្នកប្រដាល់លាស់ យីន( រាជសីហ៍ បាបា) ក្លឹបសម្រែករាជសីហ៍បង្ក្រាបគ្រឿងញៀន នឹងត្រូវជួបប្រកួតជាមួយជ័យ ប៊ុនសង់ អ្នកប្រដាល់ក្លឹបគីសែមានរិទ្ធ នាល្ងាចថ្ងៃអាទិត្យ ទី២៥ មករា ២០១៥នេះ នៅលើសង្វៀនSEA-TV។
លាស់ យីន តាំងពីដូរឈ្មោះមក គេប្រកួតពុំដែលស្គាល់ពាក្យចាញ់នៅឡើយទេ។ ការប្រកួតចុងក្រោយនេះ គេវាយឈ្នះអ្នកប្រដាល់ម៉ុង ហ្គោលីក្នុងទឹកទី៤ដែលបញ្ជាក់ថា គេខ្លាំងជាងមុន។ អ្នកប្រដាល់រូបនេះ មានផ្លែជង្គង់ល្អ ហើយដោយសារគេខ្ពស់ស្រាប់ផងនោះ រឹតតែធ្វើអោយការប្រកួតរបស់គេល្អជាងមុនទៅទៀត។ ម្នាក់នេះកណ្តាប់ដៃមិនសូវជាល្អទេ តែបើស្នៀតជង្គង់និងកែង គឺល្អតែម្តង។ជ័យ ប៊ុនសង់ ចាញ់កម្ពស់លាស់យីន។ តែយ៉ាងណាគេមិនខ្លាចញញើតលាស់ យីន នោះទេ។ កណ្តាប់ដៃនិងស្នៀតជើងទាត់របស់ប៊ុនសង់លឿន ហើយគេវាយទៅតាមលក្ខណៈបច្ចេកទេសល្អថែមទៀត។ជាអ្នកប្រដាល់ម្នាក់ដែលមានចិត្តធំ ប៊ុនសង់ វាយបុកទៅលើគូប្រកួតមុនជានិច្ច។ ជាមួយនឹងមានស្នៀតវាយលុកល្អ ជ័យ ប៊ុនសង់គេក៏មានស្នៀតការពារខ្លួនល្អផងដែរ។ ប៉ុន្តែយ៉ាងណា ជួបជាមួយលាស់ យីនលើកនេះ មិនជាស្រួលខ្លួនប៉ុន្មានទេ។ប៊ុនសង់ គេប្រកួតចុងក្រោយ វាយចាញ់សេន គឹមរួន អ្នកប្រដាល់ក្លឹបរត្នន៍សែនជ័យដោយពិន្ទុ។ ការវាយចាញ់សេន គឹមរួនហើយនោះ ប៊ុនសង់ជួបជាមួយលាស់ យីន គឺមិនសង្ឃឹមឈ្នះនោះទេ ព្រោះលាស់យីនខ្លាំងជាងសេន គឹមរួនទៅទៀត។ហ៊ល ដារ៉ា អ្នកប្រដាល់ក្លឹបសាលវ័ន្តកីឡា នឹងជួបប្រកួតជាមួយ ងួន គាអ្នកប្រដាល់ក្លឹបតាឡីដំរីមានរិទ្ធ។ ពួកគេពីរនាក់នេះ មិនដែលប៉ះគ្នាទេពីមុនមក ដោយសារតែងួន គា ជាអ្នកប្រដាល់ស្រករក្រោយ ហើយក៏ទើបតែមានការវិវត្តន៍រីកចំរើននាចុងឆ្នាំ២០១៤នេះប៉ុណ្ណោះ។ងួន គា ស្នៀតប្រដាល់របស់គេមិនសូវជាច្បាស់ និងមានផ្លែល្អប៉ុន្មានទេ តែគេមានចិត្តប្រដាល់ធំ វាយមិនចេះខ្លាចញញើតគូប្រកួតឡើយ។ បែបនេះហើយ ទើបការប្រកួតរបស់គេតែងទទួលលទ្ធផលឈ្នះលើគូប្រកួតជានិច្ច។ ប្រកួតចុងក្រោយនេះ គេប្រកួតស្មើជាមួយស្រិល ទ្រី អ្នកប្រដាល់ក្លឹបនិរោធមានជ័យ។សម្រាប់ការជួបជាមួយហ៊ល ដារ៉ាលើកនេះ ងួន គា ប្រហែលជាមិនជួបសំណាងល្អនោះទេ ដោយសារតែដារ៉ាជាអ្នកប្រដាល់ចាស់វស្សា មានស្នៀតប្រដាល់ល្អ ទិចនិចប្រកួតល្អ។ ប្រកួតចុងក្រោយនេះ ដារ៉ា វាយឈ្នះសេន កុសល ក្លឹបមោងឫស្សីមរតកគុនខ្មែរដោយពិន្ទុ។ សម្រាប់ការជួបគ្នានេះ គេរំពឹងថាហ៊ល ដារ៉ា នឹងឈ្នះងួន គា។សល់ រ៉ាជន អ្នកប្រដាល់ក្លឹបកុសលកីឡា នឹងត្រូវជួបជាមួយយ៉ន វិចិត្រ អ្នកប្រដាល់ក្លឹបកងទ័ពឆ័ត្រយោង៩១១ ក្នុងទម្ងន់៦០គីឡូក្រាម។ អ្នកប្រដាល់ទាំងពីរនាក់នេះ មិនធ្លាប់ដែលជួបគ្នាទេកន្លងមក។យ៉ន វិចិត្រ គេមិនជាល្អនោះទេ ប៉ុន្តែគេអាចល្អជាងរ៉ាជន ទាំងកម្លាំងកាយសម្បទា ទាំងស្នៀតប្រដាល់។ ការប្រកួតចុងក្រោយនេះ យ៉ន វិចិត្រ បានផ្តួលឯម ចាន់ឌី អ្នកប្រដាល់ក្លឹបឫទ្ធីពោធិសែនជ័យក្នុងទី១ ខណៈដែលការប្រកួតចុងក្រោយរបស់សល់ រ៉ាជន គេវាយចាញ់ថៃ សាក់សារះ អ្នកប្រដាល់ក្លឹបកងទ័ពជើងទឹកដោយពិន្ទុ។ដូច្នេះ សម្រាប់ការជួបគ្នារវាងសល់ រ៉ាជន និង យ៉ន វិចិត្រ នេះ ត្រូវបានក្រុមអ្នកវិភាគប្រដាល់អះអាងថា វិចិត្រនឹងឈ្នះការប្រកួតនេះ។ អ្នកប្រដាល់ម៉ន គឹមឡុង ក្លឹបការិយាល័យទី៥ កងទ័ពជើងគោក ត្រូវឡើងប្រកួតជា មួយខន សុខុន អ្នកប្រដាល់ក្លឹបរាជសីហ៍បង្ក្រាបគ្រឿងញៀនខេត្តរតនគិរី។ ពីរនាក់នេះ ពុំដែលជួបគ្នាទេពីមុនមក។ខន សុខុន គេឡើងប្រកួតមិនដែលឃើញឈ្នះអ្នកណានោះទេ ដូច្នេះសម្រាប់ការប្រកួតលើកនេះ គេមិនរំពឹងថា ឈ្នះម៉ន គឹមឡុងនោះទេ៕
Post a Comment