Pacquiao ៖ សង្ឃឹម១០០ភាគរយ ថាអាចផ្តួល Floyd បាន

Manny Pacquiao បានទៅដល់សណ្ឋារគារ Mandalay Bay ទីក្រុង Las Vegas កាលពីយប់ថ្ងៃច័ន្ទ ប៉ុន្តែក្នុងការបង្ហាញខ្លួននៅមុខទស្សនិកជន Money Team កាលពីយប់មិញនេះ កំពូលអ្នកប្រដាល់អាស៊ីវ័យ៣៦ឆ្នាំរូបនេះ បាននិយាយយ៉ាងជឿជាក់ថា លោកនឹងឈ្នះក្នុងការប្រកួតដ៏ធំបំផុត ក្នុងអាជីពរបស់ខ្លួន ដែលនឹងត្រូវប៉ះ Floyd Mayweather នៅ៣ថ្ងៃខាងមុខនេះ។

PacMan បានបង្ហាញខ្លួនជាមួយនឹងអារម្មណ៍រីករាយបំផុត ដោយបង្ហាញស្នាមញញឹម និងកំប្លែងលេងជាមួយនឹងអ្នកគាំទ្ររបស់ខ្លួនទៀតផង។ ជាមួយគ្នានោះ អាវយឺត Money Team ដែលមានរូបរំលេចជាមួយនឹងទង់ជាតិហ្វីលីពីន ក៏បានតាំងលក់នៅទីក្រុង Las Vegas ផងដែរ។

កំពូលអ្នកប្រដាល់អាស៊ី Pacquiao ជឿថាលោកនឹងបញ្ចប់កំណត់ត្រាមិនដែលចាញ់របស់ Floyd ដោយនិយាយថា៖ “នេះជាការប្រកួតដ៏សំខាន់បំផុត ក្នុងអាជីពជាអ្នកប្រដាល់របស់ខ្ញុំ ប៉ុន្តែខ្ញុំដឹង ថាខ្ញុំនឹងឈ្នះ។ យើងមានយុទ្ធសាស្ត្រច្រើន សម្រាប់ការប្រកួតនេះ ដូច្នេះខ្ញុំមានទំនុកចិត្តណាស់”។

អ្នកប្រដាល់សញ្ជាតិហ្វីលីពីនរូបនេះ បន្ថែមថា៖ “ខ្ញុំមិនដឹងថា Floyd គឺជាដៃគូគ្រោះថ្នាក់បំផុត សម្រាប់ខ្ញុំ ឬអត់ទេ ព្រោះខ្ញុំមិនដែលប៉ះគាត់។ ខ្ញុំខុសពីដៃគូ ដែលគាត់ធ្លាប់វ៉ៃឈ្នះទាំង៤៧នាក់នោះ ព្រោះខ្ញុំរហ័សជាងពួកគេ ដូច្នេះខ្ញុំនឹងឲ្យគាត់ស្គាល់បទពិសោធន៏ចាញ់ជាលើកដំបូង”។

Manny Pacquiao និង Floyd Mayweather នឹងប៉ះគ្នានៅសង្វៀន MGM Grand ទីក្រុង Las Vegas នៅថ្ងៃសៅរ៍ចុងសប្តាហ៍នេះ (ព្រឹកថ្ងៃអាទិត្យនៅកម្ពុជា)៕