វង្ស ណយ អ្នកប្រដាល់ជើងខ្លាំងនៃសមាគមប្រដាល់ក្រសួងការពារជាតិ ត្រូវផ្គូផ្គងឲ្យជួបជាមួយអ្នកប្រដាល់ជនជាតិថៃឈ្មោះRith Thy Chhai ឯ ម៉ន រដ្ឋា អ្នកប្រដាល់ក្លិបការិយាល័យទី៥ កងទ័ពជើងគោក ត្រូវជួបជាមួយអ្នកប្រដាល់ថៃដែរ ឈ្មោះRyrath Chhai នៅលើសង្វៀនSEA-TV នារសៀលថ្ងៃអាទិត្យទី០៨ ខែកុម្ភៈ ឆ្នាំ២០១៥។
Rith Thy Chhai អ្នកប្រដាល់ថៃនេះ គេមិនធ្លាប់មកប្រកួតនៅភ្នំពេញម្តងណាឡើយ។ គេជួបជាមួយវង្ស ណយ ក្នុងទម្ងន់៦៩គីឡូក្រាម។ អ្នកប្រដាល់ថៃរូបនេះ គេមានសមត្ថភាពមិនខ្សោយនោះឡើយ។
ក្នុងកំណត់ត្រាប្រកួតចំនួន៨៩លើក Rith Thy Chhaiវាយឈ្នះ៧៩លើក ដោយវាយចាញ់តែ៩លើក និងស្មើ១លើកប៉ុណ្ណោះ។ បើតាមការឲ្យដឹងរបស់លោកញាណ សុធី អ្នកគ្រប់គ្រងកម្មវិធីប្រដាល់SEA-TV នោះថា អ្នកប្រដាល់ថៃរូបនេះគេវាយរាងព្រហើន និងមានអំនួតណាស់។ ចាំមើលប៉ះជាមួយវង្ស ណយ ដែលមានកំណត់ត្រាប្រកួតរហូតដល់១៦៩លើក ឈ្នះ១២៥លើក ចាញ់៤៤លើកនោះ តើគេអួតបានដែរឬអត់?
វង្ស ណយ អ្នកប្រដាល់កម្ពុជាដែលកំពុងមានឈ្មោះបោះសំឡេង ហើយដែលមានបទពិសោធន៍ជោកជាំលើសង្វៀនវិញនោះ ក៏មិនទាន់ប្រាកដថាអាចឈ្នះអ្នកប្រដាល់ថៃRith Thy Chhai នោះដែរ។ ព្រោះ វង្ស ណយ កន្លងមកប្រកួតក៏ពុំសូវទៀងទាត់ប៉ុន្មានដែរ។ គេជួបប្រកួតជាមួយថៃលើកចុងក្រោយនេះថ្ងៃទី០៣ ខែកក្កដា ឆ្នាំ២០១៤ ហើយត្រូវថៃផ្តួលឲ្យចុះចាញ់ក្នុងទឹកទី២។
ចាំមើល តើវង្ស ណយ គេអាចផ្តួលអ្នកប្រដាល់ថៃRith Thy Chhaiនេះ បានដូចឬអត់? ការប្រកួតចុងក្រោយរបស់វង្ស ណយ គឺជាមួយឡៅ ស៊ីណាត អ្នកប្រដាល់ក្លិបកងពលតូចទ័ពឆត្រយោង៩១១ ដោយត្រូវឡៅ ស៊ីណាត វាយឲ្យបោះបង់ការប្រកួតក្នុងទឹកទី២ដែរ។
ម៉ន រដ្ឋា អ្នកប្រដាល់ជើងខ្លាំងវ័យក្មេងក្លិបការិយាល័យទី៥ កងទ័ពជើងគោក ដែលត្រូវជួបជាមួយអ្នកប្រដាល់ថៃRyrath Chhai មិនដឹងថាគេស៊ូជាមួយថៃនោះ បានឬអត់នោះទេ។ រដ្ឋា គេជួបអ្នកប្រដាល់ថៃនេះ ជាលើកទី២ប៉ុណ្ណោះ ដែលការប្រកួតលើកទី១(១២ មេសា ២០១៤) គេបានវាយចាញ់ថៃKhamthep Kongrian Kira ដោយពិន្ទុ។ តែគេក៏ធ្លាប់វាយឈ្នះបារាំង(Daniel)ក្នុងទឹកទី៤ម្ដងដែរ កាលពីថ្ងៃទី០២ ខែវិច្ឆិកា ឆ្នាំ២០១៤។
Ryrath Chhai ដែលមកជួបជាមួយម៉ន រដ្ឋានេះ គេជាម្ចាស់ខ្សែក្រវាត់ប្រចាំស្រុកថៃ តែគេមិនដែលមកប្រកួតនៅស្រុកខ្មែរទេកន្លងមក ។ គេប្រកួតក្នុងទម្ងន់៥៤គីឡូក្រាម។ អ្នកប្រដាល់ថៃរូបនេះ មានប្រវត្តិប្រកួតតិចជាងរដ្ឋាទេ គឺមានចំនួន៥៤លើក ឈ្នះ៥០លើក ចាញ់៤លើក ខណះដែលម៉ន រដ្ឋា មានប្រវត្តិប្រកួតចំនួន៧០លើក ឈ្នះ៥៧លើក ចាញ់១២លើក និងស្មើ១លើក ។
អ្នកប្រដាល់ថៃរូបលើកនេះ មានកម្ពស់ប្រហាក់ប្រហែលជាមួយម៉ន រដ្ឋា គឺមិនដូចមុនដែលអ្នកដឹកនាំកីឡាករមកច្រើនតែតូចទាបជាងនោះ។ Ryrath Chhai មានកម្ពស់១,៦៤ម៉ែត្រ ឯ រដ្ឋា មានកម្ពស់១,៦៣ម៉ែត្រ។
លោក ញាណ សុធី បាននិយាយប្រាប់ឲ្យដឹងថា Ryrath Chhai នេះជាអ្នកប្រដាល់ម្នាក់ដែលខ្លាំង និងមានស្នៀតប្រដាល់ល្អនិងស្ទាត់ជំនាញ ។ លោកបន្តថា អ្នកប្រដាល់កម្ពុជាយើង មិនអាចមើលស្រាលចំពោះអ្នកប្រដាល់ថៃនេះបានឡើយ។
ម៉ន រដ្ឋា នៅក្នុងស្រុកគេហាក់ដូចជាគ្មានគូប្រកួតជាមួយទេ ដោយសារគេល្អហើយចាប់គូពុំបានប្រកួត។ ទោះជាបែបនេះក្តី សម្រាប់ការជួបប្រកួតជាមួយRyrath Chhaiអ្នកប្រដាល់ថៃចុងសប្តាហ៍នេះ ម៉ន រដ្ឋា ពុំដឹងថាអាចយកឈ្នះបានឬក៏អត់នោះឡើយ ?
សម្រាប់ការប្រកួតរវាងខ្មែរនិងខ្មែរវិញ សោម តឿទី អ្នកប្រដាល់ក្លិបខម្កុដរាជសីហ៍ ខ្លារខិនមានរិទ្ធ ត្រូវឡើងជម្រះបញ្ជីជាមួយនូវ ស៊ីថា អ្នកប្រដាល់ក្លិបតាឡីដំរីមានរិទ្ធ។ ជួបគ្នាលើកមុន(២៤កុម្ភៈ ២០១៣) ពួកគេទាំងពីរប្រកួតស្មើពិន្ទុគ្នា។ ការជួបគ្នាលើកនេះ ពុំដឹងថានរណាឈ្នះនោះទេ?
យ៉ន វិចិត្រ អ្នកប្រដាល់ក្លិបកងទ័ពឆត្រយោង៩១១ នឹងសាកកណ្តាប់ដៃជាមួយ អ្នកប្រដាល់ ពុទ្ធ សុជាតិ ក្លិបពុទ្ធសេរីវង្សកីឡា។ នេះជាការជួបប្រកួតរវាងអ្នកប្រដាល់ស្រករក្រោយដូចគ្នា។ សុជាតិចង់ឈ្នះវិចិត្រនោះ គឺរាងពិបាកដែរ ហើយវិចិត្រចង់ឈ្នះសុជាតិនោះ ក៏ពិបាកដូចគ្នាដែរ។ចាំមើល ពីរនាក់នេះ តើនរណាជួបសំណាងល្អនោះ?៕
Post a Comment