ក្រុម Manchester City បានរៀបចំផែនការណ៍ពង្រឹងកំលាំងទ័ពទុកសម្រាប់រដូវកាលក្រោយនេះរួចទៅហើយ នៅពេលដែលពាក្យចចាមអារ៉ាមថាពួកគេក៌មាន ចំណាប់អារម្មណ៍ចង់បានខ្សែបម្រើលោក Kevin De Bruyne ជំរើសជាតិបែលហ្ស៊ិករបស់ក្រុម Wolfsburg ដែរហើយអាចនឹងប្រកួតប្រជែងជាមួយក្រុមបិសាចក្រហម Manchester United ក៌ថាបាន។
អតីតម្ចាស់ជើងឯកក្របខ័ណ្ឌ Premier League ក្លិប Manchester City មិនព្រមព្រងើយនៅស្ងៀមឡើយ ទោះបីជាទីផ្សារកីឡាករបិទហើយយ៉ាងណាក្តី។ មានពាក្យចចាមអារាមថា Manchester City កំពុងតាមដានស្ថានភាពរបស់លោក ខ្សែរបម្រើប្រយុទ្ធជំរើសជាតិបែលហ្ស៊ិករបស់ក្រុម Wolfsburg ក្នុងគោលបំណងដើម្បីពង្រឹងទ័ពនៅឆ្នាំក្រោយនេះ ក្រោយពីគាត់បានបង្ហាញទម្រង់លេងដ៍ឆ្នើមអោយ Wolfsburg ឈរជើងនៅលំដាប់ទីពីរក្នុងក្របខ័ណ្ឌ Bundesliga ក្នុងពេលបច្ចុប្បន្ននេះ។
លោក Kevin De Bruyne ធ្លាប់បរាជ័យជាមួយក្រុមតោខៀវ Chelsea ម្តងរួចមកហើយត្រូវបានបញ្ជូនទៅលេងអោយក្លិប Werder Bremen ខ្ចីជើងនៅរដូវកាល 2012-2013 មុននឹងលក់អោយ Wolfsburg នារដូវកាលមុន។ ហើយរដូវកាលនេះគាត់ស៊ុតបាន 8 គ្រាប់ហើយក្នុងលីក Bundes Liga ទើបតែថ្មីៗនេះព័ត៌មានថាក្រុម Manchester United និង Chelsea ចង់ទិញមកលេងនៅក្នុងប្រទេសអង់គ្លេសវិញជាថ្មីម្តងទៀតដែរ។
ក្លិប Wolfsburg មិនចង់លក់កីឡាករវ័យ 23 ឆ្នាំ ដែលមានតម្លៃប្រហែល 27 លានផោន នេះចេញពីក្រុមឡើយ ប៉ុន្តែក្រុម Manchester City នៅតែព្យាយាម និងត្រៀមខ្លួនជាស្រេចដើម្បីទិញមកពង្រឹងក្រុមអោយខ្លាំងនៅឆ្នាំក្រោយ។
Post a Comment