Chelsea ជាក្លិបបាល់ទាត់ដ៏មានឥទ្ធិពលមួយនៅក្នុងប្រទេសអង់គ្លេស ក្រោយមានមហាសេដ្ឋីរុស្សីលោក Roman Abramovich ចូលមកកាន់កាប់។ ក្លិបមានមូលដ្ឋាននៅភាគខាងលិចទីក្រុងឡុងដុងនេះ បានក្លាយជាទីចាប់អារម្មណ៍របស់កីឡាករល្អៗជាច្រើន ដែលតែងស្រមៃចង់លេងឲ្យក្លិបមួយនេះ។
ខាងក្រោមនេះ ជាកីឡាករ១០រូប ដែលផ្ទេរទៅកាន់កីឡដ្ឋាន Stamford Bridge ជាមួយនឹងក្ដីសង្ឃឹមយ៉ាងពេញលេញ ប៉ុន្តែបែរជាបរាជ័យ ដោយសារលេងមិនបានល្អទៅវិញ៖
១. Asier del Horno (ចូលនិវត្តន៍)
ខ្សែការពារអេស្ប៉ាញ គឺជាតួអង្គដ៏សំខាន់បំផុតរបស់ក្រុម Athletic Bilbao ជាច្រើនឆ្នាំ និងបានផ្ទេរមកកាន់ Chelsea ក្នុងតម្លៃ ៨លានផោន (ជាង១២លានដុល្លារ)។ ប៉ុន្តែរូបគេលេងមិនបានល្អទេ នៅក្រុមលីកកំពូលរបស់អង់គ្លេសមួយនេះ ហើយ១ឆ្នាំក្រោយមក ក៏ផ្ទេរទៅកាន់ក្រុម Valencia ក្នុងតម្លៃខាតពាក់កណ្ដាលវិញ។
២. Shaun Wright-Phillips (QPR )
ខ្សែបម្រើអង់គ្លេសលេងបានល្អណាស់ឲ្យក្រុម Manchester City កាលពីឆ្នាំ២០០៥ ប៉ុន្តែបន្ទាប់ពីផ្ទេរមកកាន់ Chelsea ក្នុងតម្លៃ ២១លានផោន (ជាង៣១លានដុល្លារ) ក៏ធ្លាក់ទម្រង់លេង និងក្លាយជាកីឡាករបម្រុង។ បន្ទាប់មកក្លិបតោខៀវព្រមលក់ខាតទៅឲ្យ Man City វិញ។ បច្ចុប្បន្នកីឡាករវ័យ៣៣ឆ្នាំរូបនេះ កំពុងលេងឲ្យក្រុម QPR។
៣. Scott Parker (Fulham)
ខ្សែបម្រើអង់គ្លេសរូបនេះ លេងឲ្យក្រុមនៅក្នុងទីក្រុងឡុងដុងស្ទើរតែទាំងអស់ ដែលរួមមានក្រុម Charlton Athletic, West Ham, Fulham, Tottenham Hotspur និងលេងបានល្អទៀតផង ប៉ុន្តែកំឡុងពេលដែលរូបគេលេងនៅក្រុម Chelsea បែរជាពុំបានល្អទៅវិញ។ បច្ចុប្បន្នកីឡាករវ័យ៣៤ឆ្នាំរូបនេះ កំពុងលេងឲ្យក្រុម Fulham។
៤. Steve Sidwell (Stoke City)
ខ្សែបម្រើសញ្ជាតិអង់គ្លេស គឺជាតួអង្គដ៏សំខាន់របស់ក្រុម Reading។ ក្រោយមក Chelsea ក៏បានចុះកិច្ចសន្យាយក ដោយគ្មានតម្លៃខ្លួន ប៉ុន្តែអាចទទួលបានតម្លៃខ្លួនប្រចាំសប្ដាហ៍ខ្ពស់។ លុះមកដល់ក្រុមតោខៀវ កីឡាកររូបនេះធ្លាក់ទម្រង់លេង និងក្លាយជាកីឡាករបម្រុងវិញ។ បច្ចុប្បន្នកីឡាករវ័យ៣២ឆ្នាំរូបនេះ កំពុងលេងឲ្យក្រុម Stoke City។
៥. Marko Marin (Anderlecht)
កីឡាករសញ្ជាតិអាល្លឺម៉ង់បានផ្ទេរពីក្រុម Werder Bremen មកកាន់ Chelsea ក្នុងតម្លៃ៧លានផោន (ជាង១០,៥លានដុល្លារ) កាលពីឆ្នាំ២០១២។ ប៉ុន្តែរូបគេ ពុំបានបង្ហាញទម្រង់លេងណាមួយធ្វើឲ្យក្រុមតោខៀវចាប់អារម្មណ៍នោះទេ។ កីឡាករវ័យ២៥ឆ្នាំរូបនេះ បច្ចុប្បន្នកំពុងលេងឲ្យក្រុម Anderlecht ស្ថិតក្នុងកិច្ចសន្យាខ្ចីជើង។
៦. Andriy Shevchenko (ចូលនិវត្តន៍)
អតីតជម្រើសជាតិអ៊ុយក្រែន គឺជាខ្សែប្រយុទ្ធដ៏លេចធ្លោមួយរូបនៅអឺរ៉ុប។ ផ្ទេរមកកាន់ Chelsea ក្នុងតម្លៃ៣០,៨លានផោន (ជាង៤៥លានដុល្លារ) កាលវ័យ២៩ឆ្នាំ។ ទោះយ៉ាងណា បុរសវ័យ៣៨ឆ្នាំរូបនេះ ពុំបានរកគ្រាប់បញ្ចូលទីបានច្រើនសមនឹងតម្លៃខ្លួនឲ្យក្រុមតោខៀវនោះទេ។
៧. Fernando Torres (Atlético Madrid)
កីឡាករជម្រើសជាតិអេស្ប៉ាញ បានផ្ទេរពី Liverpool ទៅកាន់ Chelsea ក្នុងតម្លៃបំបែកកំណត់ត្រាប្រទេសអង់គ្លេស ៥០លានផោន (ជាង៧៥លានដុល្លារ)។ ប៉ុន្តែលុះទៅដល់កីឡដ្ឋាន Stamford Bridge បែរជាធ្លាក់ជើងខ្លាំងស្ទើរមិនគួរឲ្យជឿទៅវិញ។ បច្ចុប្បន្ន កីឡាករវ័យ៣០ឆ្នាំ កំពុងលេងឲ្យក្រុមចាស់របស់គេ Atlético Madrid។
៨. Gael Kakuta (Rayo Vallecano)
កីឡាករវ័យក្មេងសញ្ជាតិបារាំងបានផ្ទេរពីក្រុម Lens ប៉ុន្តែពុំទាន់បានចូលលេងឲ្យក្លិបផង ក៏ត្រូវបានគេពិន័យ ដោយសារក្លិប Chelsea សហព័ន្ធពិន័យមិនឲ្យចុះកិច្ចសន្យាយកកីឡាករក្មេងៗ។ កីឡាករវ័យ២៣ឆ្នាំរូបនេះ បច្ចុប្បន្នកំពុងលេងឲ្យក្រុម Rayo Vallecano លក្ខណៈខ្ចីជើង។
៩. Adrian Mutu (ចូលនិវត្តន៍)
អតីតកីឡាករជម្រើសជាតិរ៉ូម៉ានី គឺជាកីឡាករដែលក្លិប Chelsea ទិញដោយការសោកស្ដាយបំផុត ព្រោះកីឡាកររូបនេះ គេរកឃើញថា មានប្រើប្រាស់គ្រឿងញៀន ដែលធ្វើឲ្យអាជីពជាកីឡាកររបស់គេត្រូវបាត់បង់ផងដែរ។
១០. Yuri Zhirkov (Dynamo Moscow)
កីឡាករជម្រើសជាតិរុស្សី បានផ្ទេរទៅកាន់ Chelsea ក្នុងតម្លៃ ១៨លានផោន (ជាង២៧លានដុល្លារ)។ ប៉ុន្តែអំឡុងពេលនៅក្រុមតោខៀវ ខ្សែការពាររូបនេះលេងមិនបានល្អទេ។ ហើយចុងក្រោយកីឡាករវ័យ៣១ឆ្នាំ ក៏ត្រឡប់ទៅលេងឲ្យក្លិបនៅប្រទេសកំណើត Dynamo Moscow វិញ រហូតដល់បច្ចុប្បន្ន៕
ចុះប្រិយមិត្ត គិតថាមានកីឡាករណាផ្សេងទៀតដែលលេងធ្លាក់ជើងនៅ Chelsea ដែរទេ?
Post a Comment